အာရက္ခတိုင်းမ်စ် (၄ သြဂုတ် ၂၀၂၆)
စစ်ရေးအရ ရှုံးနိမ့်နေတဲ့ ရွေးတုအစိုးရရဲ့ စစ်သင်္ဘောကနေ ရက္ခိုင်ပြည် လွတ်မြောက်နယ်မြေက ကမ်းစပ် ၃ နေရာကို သြဂုတ်လ ၃ ရက်က လက်နက်ကြီးနဲ့ ပစ်ခတ်လို့ ရေလုပ်သားပြည်သူ ၁ ဦး သေဆုံးခဲ့ပြီး ငါးဖမ်းလှေ ၁ စီး မီးလောင် ပျက်စီးသွားတယ်လို့ သိရပါတယ်။
“ရသေ့တောင်က ငါးရှာသမား ၃ ယောက်က နံ့သာကျွန်းနားမှာ ငါးသွားရှာတာကို စစ်တပ်က သေနတ်တွေနဲ့ ပစ်သတ်လို့ ၁ ယောက်တော့ သေကျန်ခဲ့တယ်။ ၂ ယောက်ကတော့ ထွက်ပြေးလို့ လွတ်လာတယ်” လို့ ရသေ့တောင်မြို့နယ်ဒေသခံတစ်ဦးက အာရက္ခတိုင်းမ်စ်ကို ပြောပါတယ်။
အလားတူ ရွေးတုအစိုးရဟာ ရက္ခိုင်ပြည်က ဂွကမ်းခြေနဲ့ ငပလီကမ်းခြေကိုလည်း လက်နက်ကြီးတွေနဲ့ ပစ်ခတ် တိုက်ခိုက်ခဲ့တယ်လို့ ဒေသခံတွေက ဆိုပါတယ်။
“မနေ့က စစ်တပ်ကနေ လေယာဉ်နဲ့ ဗုံးလာကြဲတဲ့ အချိန်မှာပဲ ပင်လယ်ထဲမှာ ရပ်ထားတဲ့ နေဗီကနေပြီးတော့ လက်နက်ကြီးတွေနဲ့ ပစ်လို့ ငါးဖမ်းလှေပေါ် ကျတယ်လေ။ လှေတော့ ပျက်စီးသွားတာပေါ့” လို့ ငပလီမြို့ဒေသခံတစ်ဦးက အာရက္ခတိုင်းမ်စ်ကို ဆိုပါတယ်။
ရွေးတုအစိုးရဟာ သြဂုတ်လ ၃ ရက် မနက် ၁၀ နာရီခွဲခန့်က ငပလီမြို့ ဂျိတ်တော် အမှတ် ၉ ရပ်ကွက်ကို လေယာဉ် ၄ စီးနဲ့ ဗုံးအလုံးရေ ၆၀ နီးပါး ကြဲချ တိုက်ခိုက်ခဲ့လို့ အသက် ၄၁ နှစ်အရွယ် ဦးကျော်သူနိုင် နဲ့ အသက် ၆၀ အရွယ် ဒေါ်မစန်းမြင့် တို့ ထိခိုက် ဒဏ်ရာ ရရှိခဲ့ပြီး ကာလတန်ဖိုး သိန်း သုံးထောင်ကျော် တန်ဖိုးရှိ လူနေအိမ် နဲ့ တည်းခိုခန်း ၂၀ ခန့် ပျက်စီးသွားတယ်လို့လည်း အာရက္ခတပ်တော်က သတင်း ထုတ်ပြန်ထားပါတယ်။
