အာရက္ခတိုင်းမ်စ် (၂၇ စက်တင်ဘာ ၂၀၂၆)
ရက္ခိုင်ပြည်၊ အဥ္ဇနပူရမြို့ကို စစ်ကောင်စီတပ်က ဒီကနေ့ စက်တင်ဘာလ ၂၇ ရက် မိုးလင်းဝအချိန်မှာ Y-12 စစ်ထောက်ပံ့ရေး လေယာဉ်ကို အသုံးပြုပြီး ဗုံးတွေ အဆက်မပြတ် ကြဲချ တိုက်ခိုက်ခဲ့တယ်လို့ သိရပါတယ်။
မကွေးလေတပ်က ထွက်လာတဲ့ စစ်ကောင်စီရဲ့ Y-12 လေယာဉ်တစ်စီးဟာ ဒီကနေ့ မိုးလင်းဝ ၁၂ နာရီ ၃၀ မိနစ်ကနေ ၁၂ နာရီ ၄၅ မိနစ်လောက်အထိ အဥ္ဇနပူရမြို့ထဲကို ဒရော့ဗုံး (Drop Bomb) အလုံး ၁၀ လုံးနီးပါး ကြဲချ တိုက်ခိုက်ခဲ့တာလည်း ဖြစ်ပါတယ်။
ကနဦး ရရှိတဲ့ သတင်းတွေအရ အဲဒီလို လေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သားပြည်သူ တစ်ဦး ထိခိုက်ဒဏ်ရာရရှိခဲ့ပြီး ဒေသခံတွေရဲ့ နေအိမ်အချို့လည်း ထိခိုက် ပျက်စီးခဲ့ရတယ်လို့ သိရပါတယ်။
ထိခိုက်ဒဏ်ရာ ရရှိသွားသူကတော့ ဈေးဟောင်းပိုင်းရပ်ကွက်က ဒေသခံ အသက် ၅၀ အရွယ် ဦးခင်မောင် ဖြစ်ပြီး ဗုံးစထိမှန်တာကြောင့် ညာဘက်နဲ့ ဘယ်ဘက် ခြေဖနောင့်တွေ၊ လက်နှစ်ဖက်နဲ့ ခန္ဓာကိုယ်အနှံ့မှာ ဒဏ်ရာတွေ ရရှိသွားခဲ့ပါတယ်။
အဥ္ဇနပူရမြို့ပေါ်မှာ ထိခိုက်ဒဏ်ရာ ရရှိသွားသူတွေနဲ့ နေအိမ်တွေ ပျက်စီးဆုံးရှုံးရတဲ့ အခြေအနေတွေကို ဆက်လက် စုံစမ်းနေဆဲ ဖြစ်ပါတယ်။
