အာရက္ခတိုင်းမ်စ် (၂၇ သြဂုတ် ၂၀၂၅)
ရက္ခိုင်ပြည် စစ်တွေမြို့ကနေ စစ်ကော်မရှင်ဟာ ပုဏ္ဏားကျွန်းမြို့ကို လက်နက်ကြီးတွေနဲ့ ပစ်ခတ်မှုတွေ လုပ်ဆောင်နေတယ်လို့ သိရပါတယ်။
“ ပစ်သံတွေက မကြာ မကြာ ကြားရတယ်။ ဘယ်ပစ်မှန်း မသိကြဘူး။ မနေ့ကတော့ သတင်းထွက်လာတာက ပုဏ္ဏားကျွန်းကို ချိန်ပြီး ပစ်နေတာ” လို့ စစ်တွေမြို့ဒေသခံတဦးက အာရက္ခတိုင်းမ်စ်ကို ပြောပါတယ်။
စစ်ရေးအရ ရှုံးနိမ့်နေတဲ့ စစ်ကော်မရှင်ဟာ စစ်တွေကနေ ပုဏ္ဏားကျွန်းကို လက်နက်ကြီးနဲ့ ပစ်ခတ်နိုင်လို့ အာရက္ခတပ်တော်အနေနဲ့ စစ်တွေနဲ့ နီးတဲ့ ပုဏ္ဏားကျွန်းက ကျေးရွာတွေကို နေရာရွှေ့ပြောင်းနေထိုင်ဖို့ သတိပေးထားပါတယ်။
“ မနေ့က စစ်တွေက ပစ်လိုက်တဲ့ လက်နက်ကြီးဟာ ပုဏ္ဏားကျွန်းက ငှက်ကြီးကျွန်းရွာကို ကျတယ်။ နေအိမ်အချို့ ပျက်စီးသွားတယ်” လို့ ပုဏ္ဏားကျွန်းမြို့ဒေသခံတဦးက အာရက္ခတိုင်းမ်စ်ကို ပြောပါတယ်။
စစ်ကော်မရှင်ဟာ စစ်တွေမြို့ ပါဒလိတ်အခြေစိုက် တပ်စခန်းကနေ ရက္ခိုင်ပြည် လွတ်မြောက်နယ်မြေဖြစ်တဲ့ ပုဏ္ဏားကျွန်း၊ ရသေ့တောင် နဲ့ ပေါက်တော တို့ကို လက်နက်ကြီးတွေနဲ့ ပစ်ခတ်နေတာလည်း ဖြစ်ပါတယ်။
ဓာတ်ပုံ – စကမ လက်နက်ကြီးကြောင့် ငှက်ကြီးကျွန်းရွာက ပျက်စီးသွားတဲ့ နေအိမ်
6 comments