စစ်တွေမှာ စကမ ရောင်းတဲ့ စျေးပေါဆန် စားပြီး ရောဂါတွေရနေ

အာရက္ခတိုင်းမ်စ် (၁ စက်တင်ဘာ ၂၀၂၅)

ရက္ခိုင်ပြည် စစ်တွေမြို့မှာ စစ်ကော်မရှင် ရောင်းချတဲ့ စျေးပေါတဲ့ ဆန်တွေစားပြီး ဒေသခံတွေ ရောဂါတွေ ရရှိနေတယ်လို့ သိရပါတယ်။

အရင်က ဒေသခံတွေဟာ ဆန်ကြမ်းကို စားကြပေမယ့်လက်ရှိမှာတော့ ဒေသအခေါ် ကိုရီးယားဆန် အိတ်မှာ ကိုရီးယားနိုင်ငံရဲ့ အလံပါတဲ့ ဆန်က ဈေးနှုန်းသက်သာတာကြာင့် ၀ယ်စားကြတာ ဖြစ်ပါတယ်။

ဒါပေမယ့် အဲဒီဆန်ကို စားတဲ့အခါမှာ လေးဘက်နာရောဂါလို အဆစ်အမြစ်ကိုက်ခဲတာ၊ ဒူးနာ၊ ခေါင်းကိုက်တဲ့ရောဂါ ဖြစ်တယ်လို့ စစ်တွေဒေသခံတစ်ယောက်က ပြောပါတယ်။

“၁ လကို ၁ သောင်းလောက် တက်တယ်။ ၁ လ ၁ ခါ တက်တယ်။ ဆန်က ကိုရီးယားဆန်ဆိုပြီးတော့လေ ကိုရီးယားတံဆိပ်နဲ့ ကိုရီးယားဆန် ၁ သိန်း ၃ သောင်းခွဲလား၊ ၁ သိန်းခွဲလား မသိဘူး။ အဲဒီကိုရီးယားဆန် တော်တော်များများ စားနေကြတယ်။ အဲဒီကိုရီးယားဆန်စားပြီးတော့ နောက်ပိုင်း လူတွေ ကိုက်ခဲ အဲဒီရောဂါတွေ ဖြစ်ကြတယ်လို့ ပြောတယ်။ တော်တော်များများ ခြေထောက်တွေ လေးဘက်နာလို အဆစ်အမြစ်ကိုက်တာ” လို့ ပြောပါတယ်။

အဲဒီဆန်က ဆန်ချောအမျိုးအစားဖြစ်တဲ့ ပေါ်ဆန်းမွှေးဆန်လိုဖြစ်နေပြီး ချက်တဲ့အခါမှာ အိုးတက်တာကြောင့် ပုံမှန်ထက် ထမင်းပိုရတယ်လို့​ ပြောပါတယ်။

“အဲဒါတွေက ဈေးတော်တာ မဟုတ်ဘူး။ အဲဒါတွေကလေ ပေါ်ဆန်းမွှေးလိုပဲတဲ့ အိစက်ပြီးတော့ မွှေးအိနေတာ။ ဖွာဖွာကြီး ဖြစ်မနေဘဲ စေးပြီး အိနေတာပဲလို့ ပြောတယ်။ လူတိုင်း မိသားစု များတဲ့သူတွေ စားဖို့အတွက် အိုးတက်တယ်တဲ့” လို့ ပြောပါတယ်။

လက်ရှိ စစ်တွေမှာ ရောင်းချနေတဲ့ ကိုရီးယားဆန်ဟာ ဆန်အိတ်မှာ ကိုရီးယားနိုင်ငံရဲ့ အလံပါနေတာရယ်၊ မြန်မာမှာ စိုက်ပျိုးတဲ့ ဆန်အမျိုးအစားတွေနဲ့ မတူတာကြောင့် ဒီဆန်တွေက ကိုရီးယားနိုင်ငံက မြန်မာနိုင်ငံကို အကြောင်းအရာ တစ်ခုခုနဲ့ ထောက်ပံ့မှုအနေနဲ့ လှူဒါန်းထားတဲ့ ဆန်တွေ ဖြစ်နိုင်တယ်လို့ ဒေသခံတွေက သုံးသပ်ကြပါတယ်။

ဒါကို အာဏာပိုင်တွေက လိုအပ်တဲ့နေရာတွေကို မထောက်ပံ့ဘဲ ရောင်းစားနေကြတာ ဖြစ်တယ်လို့ ပြောပါတယ်။