စကမထံမှ အလင်းဝင်လာသူ ၁၃ ဦး ကျောင်းသားလက်ရုံးတပ်တော်တွင် တာဝန်ထမ်းဆောင်နေ

အာရက္ခတိုင်းမ်စ် (၁၃ ဇန်နဝါရီ ၂၀၂၆)

မကွေးတိုင်း ငဖဲမြို့နယ် အမ်း-ပဒါန်းလမ်းပိုင်းနဲ့ ပုသိမ်-မုံရွာလမ်းမကြီး တို့တွင် အလင်းဝင်လာခဲ့ကြတဲ့ စစ်ကော်မရှင် စစ်သား ၁၃ ဦးဟာ ကျောင်းသားလက်ရုံးတပ်တော်ရဲ့ ရဲဘော်များအဖြစ် တာဝန်ထမ်းဆောင်နေတယ်လို့ သိရပါတယ်။

“ နှစ်လအတွင်း အဆိုပါ စစ်မြေပြင်ရှိ ရန်သူစစ်ကော်မရှင်တပ်မက တပ်ကြပ်ကြီး ၁ ဦး နဲ့ ဒုတပ်ကြပ် ၁ဦး တို့ အပါအဝင် မိမိတို့ထံ အလင်းဝင်ခိုလှုံလာသူ စစ်ကော်မရှင်တပ်ဖွဲ့ဝင် စုစုပေါင်း ၁၃ ဦး ရှိခဲ့ပါတယ်။ အလင်းဝင်ခိုလှုံလာသူများဟာ အခု တပ်ဦး/တပ်တော်ရဲ့ ရဲဘော်များအဖြစ် ဆက်လက် တာဝန်ထမ်းဆောင်နေပါတယ်” လို့ ကျောင်းသားတပ်ဦး/ကျောင်းသားလက်ရုံးတပ်တော်က ဆိုပါတယ်။

ဒါ့အပြင် အဆိုပါ စစ်ဆင်ရေး နယ်မြေအတွင်း စစ်ကော်မရှင်တပ်ကနေ ထွက်ပြေးလာသူများ နဲ့ တိုက်ပွဲများမှ ဖမ်းဆီးရမိသူ စုစုပေါင်း ၁၆ ဦး ရှိခဲ့ပြီး ဖမ်းဆီးရရှိခဲ့တဲ့ စစ်သုံ့ပန်းများကို တပ်ဦး/တပ်တော်ရဲ့ မူဝါဒများ၊ နိုင်ငံတကာစစ်ဥပဒေများနဲ့အညီ ထိန်းသိမ်းထားတယ်လို့လည်း ဆိုပါတယ်။

ကျောင်းသားတပ်ဦး/ကျောင်းသားလက်ရုံးတပ်တော် အနေနဲ့ အဖိနှိပ်ခံလူထုကို မျက်နှာမူကာ တော်လှန်ရေးတာဝန် ထမ်းဆောင်လိုသူ မည်သူမဆို အတူတိုက်ပွဲဝင်ရန် လက်ကမ်းကြိုဆိုပါတယ်လို့လည်း ထုတ်ပြန်ထားပါတယ်။