အာရက္ခတိုင်းမ်စ် (၁၄ မေ ၂၀၂၆)
ဘင်္ဂလားပင်လယ်အော်မှာ ဖြစ်နေပေါ်တဲ့ လေဖိအားနည်း ရပ်ဝန်းအရှိန်ကြောင့် ရက္ခိုင်ပြည်တွင် မေလ ၁၇ ရက် မတိုင်ခင်အထိ နေရာကွက်ပြီး မိုးကြီးနိုင်ပြီး လေပြင်းအန္တရာယ် သတိထားရန်လိုလို့ သိရပါတယ်။
“မေလ ၁၇ ရက်အထိ မိုးရွာနိုင်ပြီး ကချင်၊ စစ်ကိုင်း (အထက်ပိုင်း)၊ မကွေး၊ ရက္ခိုင်၊ မွန်၊ ရန်ကုန် နဲ့ ဧရာဝတီ တို့မှာ နေရာကွက်ပြီး မိုးကြီးနိုင်တယ်” လို့ အမျိုးသားညီညွတ်ရေးအစိုးရ လူမှုရေးရာ အလုပ်သမားနဲ့ လူသားချင်းစာနာထောက်ထားရေးဝန်ကြီးဌာန (MOHADM) က သတိပေး ထုတ်ပြန်ထားပါတယ်။
ဘင်္ဂလားပင်လယ်အော် အနောက်တောင်ပိုင်းမှာ မေလ ၁၁ ရက်ကစပြီး လေဖိအားနည်းရပ်ဝန်း ဖြစ်ပေါ်နေပြီး လေဖိအားနည်းရပ်ဝန်းဟာ ပိုအားကောင်းလာနိုင်ပြီး မုန်တိုင်းငယ် ဖြစ်လာနိုင်တယ်လို့လည်း သတိပေးထားပါတယ်။
“သံတွဲမှာတော့ မုန်တိုင်းရှိတယ်ကြားလို့ ကြိုတင်ကာကွယ်ရေးတွေ ကြိုတင်လုပ်ဆောင်နေပါတယ်။ ဒီလ ၆ ရက်ကတည်းကပဲ အစည်းအဝေးတွေလုပ်ပြီး မုန်တိုင်းလာခဲ့ရင် ဘယ်လိုကာကွယ်ဖို့ဆိုတာတွေ ပြင်ဆင် လုပ်ဆောင်ထားပါတယ်” သံတွဲမြို့နယ်ဒေသခံတဦးက ပြောပါတယ်။
အိန္ဒိယ မိုးလေဝသဌာနရဲ့ မေလ ၁၃ ရက် ထုတ်ပြန်ချက်မှာ လေဖိအားနည်းရပ်ဝန်းဟာ ပိုအားကောင်းလာပြီး ဆိုင်ကလုန်းမုန်တိုင်း ဖြစ်မလာသေးပေမယ့် မြန်မာနဲ့ ဘင်္ဂလားဒေ့ရှ် ကမ်းရိုးတန်းဒေသတွေ မိုးနဲ့ လေပြင်းအန္တရာယ် သတိထားနေထိုင်ကြရန် သတိပေးထားပါတယ်။
မနက်ဖြန် (မေ ၁၅) က စတင်ပြီး မြန်မာနိုင်ငံတောင်ပိုင်းနဲ့ ကမ်းရိုးတန်းဒေသတွေမှာ မိုးပိုကြီးနိုင်ပြီး ကမ်းရိုးတန်းဒေသတွေမှာ လေပြင်းတိုက်ခတ်ခြင်းနဲ့ လှိုင်းကြီးခြင်းတို့ကို သတိပြုဖို့လည်း သတိပေးထားပါတယ်။
197 comments