ဧရာဝတီတိုင်း ဝန်ကြီးချုပ်ဟောင်းကို ရက္ခိုင်သို့ ကုန်စည်ပို့ဆောင်ပေးမှုနဲ့ ဖမ်းဆီးစစ်ဆေးနေ

by Rakhita Timesဇူလိုင် 4, 2026ဇူလိုင် 4, 202645 158

အာရက္ခတိုင်းမ်စ် (၄ ဇူလိုင် ၂၀၂၆)

ဧရာဝတီတိုင်း ဝန်ကြီးချုပ်ဟောင်းလည်းဖြစ် လက်ရှိတွင် ပြည်ထောင်စုရာထူးဝန်အဖွဲ့ ဥက္ကဌဖြစ်သူ ဒုတိယဗိုလ်ချုပ်ကြီး (ငြိမ်) တင်မောင်ဝင်းကို ရက္ခိုင်ပြည်သို့ ကုန်စည်ပို့ဆောင်ပေးမှုနဲ့ ပတ်သက်ဆက်နွယ်တယ်ဆိုပြီး ခေါ်ယူစစ်ဆေးနေတယ်လို့ သိရပါတယ်။

“ဝန်ကြီးဟောင်း ဦးတင်မောင်ဝင်းကို လက်ရှိ တာဝန်ယူထားတဲ့ ဧရာဝတီတိုင်းအစိုးရအဖွဲ့က ဝန်ကြီးတစ်ဦးက ဒုသမ္မတ ဦးညိုစောထံ တိုင်ကြားစာပို့လို့ ခေါ်ယူစစ်ဆေးနေတယ်လို့ ကြားတယ်။ တိုင်တာကတော့ အများကြီးပဲ။ အဂတိလိုက်စားမှုတွေရော ရက္ခိုင်ကို ကုန်စည်တွေပို့ဆောင်တာမှာ ပါဝင်ပတ်သတ်တယဆိုပြီးလည်း ပါတယ် ပြောနေကြတယ်” လို့ ဧရာဝတီတိုင်းက ရွေးတုအစိုးရ ဝန်ထမ်းတစ်ဦးက အာရက္ခတိုင်းမ်စ်ကို ပြောပါတယ်။

ဒါ့အပြင်း ဧရာဝတီတိုင်း ဝန်ကြီးချုပ်ဟောငိး ဦးတင်မောင်ဝင်းရဲ့ သားဖြစ်သူ ရေတပ်ဗိုလ်ကြီး ရဲထွန်းဝင်းကို ကျောက်ဖြူရေတပ်ဌာနချုပ်ကနေ ခေါ်ယူပြီး မြန်မာ့စီးပွားရေးဦးပိုင် အများနှင့်သက်ဆိုင်သော ကုမ္ပဏီလီမိတက် (ဦးပိုင်) တွင် ရာထူးပေးထားတဲ့အပေါ်မှာလည်း တိုင်ကြားထားတယ်လို့ သိရပါတယ်။

“အခုက ဧရာဝတီမှာ ထိပ်တန်းပုဂ္ဂိုလ်တွေ လန့်နေကြတယ်။ အရင် ဝန်ကြီးဟောင်းတွေရော၊ နတခ (အနောက်တောင်တိုင်းစစ်ဌာနချုပ်) က အရာရှိတွေရော အကုန် လန့်နေကြတာ။ သူတို့ပါ လာနွယ်မှာ စိုးရိမ်နေကြတယ်” လို့ သူက အာရက္ခတိုင်းမ်စ်ကို ဆက်ပြောပါတယ်။

ဧရာဝတီတိုင်း ဝန်ကြီးချုပ်ဟောင်း ဦးတင်မောင်ဝင်းဟာ တပ်မတော် (ကြည်း) ဗိုလ်သင်တန်းကျောင်း (OTS) အပတ်စဉ် – ၆၄ ဆင်း ဖြစ်ပြီး ပြန်တမ်းဝင်အမှတ် ကြည်း ၁၇၆၀၆ နဲ့ စစ်မှုထမ်းခဲ့ပြီး ပြည်ထဲရေးဝန်ကြီးဟောင်း ဦးစိုးထွဋ် နဲ့ တစ်ပတ်စဉ်ထဲဖြစ်ပါတယ်။

၂၀၁၀ ပြည့်နှစ် ဩဂုတ်လတွင် အနောက်တောင်တိုင်း စစ်ဌာနချုပ် တိုင်းမှူး၊ ၂၀၁၁ ခုနှစ်တွင် အရှေ့တောင်တိုင်းစစ်ဌာနချုပ်တိုင်းမှူး စတဲ့ တာဝန် ပေးခံရပြီးနောက် ၂၀၁၆ ခုနှစ်တွင် ဒုတိယဗိုလ်ချုပ်ကြီး တင်မောင်ဝင်းကို တပ်မတော် လေကြောင်းရန်ကာကွယ်ရေးအရာရှိချုပ်နဲ့ ၂၀၂၀ ပြည့်နှစ်တွင် တပ်မတော်အရံအင်အားကို ပြောင်းရွှေ့ခံခဲ့ရပါတယ်။