‌ရွေးတုအစိုးရရဲ့ အဓိက ပစ်မှတ်က EAO တွေထက် NUG-PDF တို့ဖြစ်

အာရက္ခတိုင်းမ်စ် (၁၅ ဩဂုတ် ၂၀၂၆)

ရွေးတုအစိုးရရဲ့ အဓိကပစ်မှတ်ဟာ တိုင်းရင်းသားလက်နက်ကိုင် အဖွဲ့အစည်းတွေထက် မြန်မာပြည်အလယ်ပိုင်းမှာရှိတဲ့ NUG-PDF တွေကိုသာ အဓိကဖြစ်တယ်လို့ တရုတ်-မြန်မာအရေးလေ့လာသုံးသပ်သူ ဒေါက်တာလှကျော်ဇောက အာရက္ခတိုင်းမ်စ်ကို ပြောပါတယ်။

“သူ့ရဲ့အဓိက ပစ်မှတ်က NUG တို့ PDF တို့ အဲဒါပဲ။ ဒီအလယ်ပိုင်းက ကျမတို့ ဗမာပြည်အလယ်ပိုင်းက လူတွေက အဓိက သူပစ်ဖို့ပဲ။ အဲဒါကို သူ အဓိက ရှင်းချင်တာ။ ဒါကြောင့်မို့လို့ တိုင်းရင်းသားလက်နက်ကိုင် အဖွဲ့အစည်းတွေကို တတ်နိုင်သမျှ သူလိုက်ပြီး ငြိမ်းအောင် လုပ်နေတယ် ထင်တယ်” လို့ သူက ပြောပါတယ်။

လက်ရှိမှာတော့ ရွေးတုအစိုးရဘက်က NSPNC အဖွဲ့ဟာ တိုင်းရင်းသားလက်နက်ကိုင်အဖွဲ့တွေနဲ့ ငြိမ်းချမ်းရေးတွေ့ဆုံမှုတွေကို ဆက်တိုက် ပြုလုပ်နေတာဖြစ်ပြီး ရက် ၁၀၀ အတွင်း ၁၃ ဖွဲ့နဲ့ တွေ့နိုင်ခဲ့တယ်လို့ ဦးမင်းအောင်လှိုင်က ပြောပါတယ်။

ဒါပေမယ့် လက်ရှိ မြေပြင်မှာ တိုက်ပွဲတွေဖြစ်နေတဲ့ KIA၊ AA တို့နဲ့ကတော့ ငြိမ်းချမ်းရေးတွေ့ဆုံ ဆွေးနွေးကြဖို့ တစ်စုံတစ်ရာ အသံမထွက်သေးပေမယ့် KIA ဘက်က ကိုယ်စားလှယ်တွေနဲ့ စစ်တပ်ဘက်က ကိုယ်စားလှယ်တွေကတော့ အမြဲလိုလို တွေ့ဆုံဆွေးနွေးနေကြတယ်လို့ အားလုံးက ထောက်ပြကြပါတယ်။

ပြီးခဲ့တဲ့ ရက်ပိုင်းက KIA ‌ခေါင်းဆောင် ဗိုလ်ချုပ်အင်ဘန်လရဲ့ ပြောဆိုမှုအရ KIA အနေနဲ့ စစ်တပ်နဲ့ ငြိမ်းချမ်းရေးဆွေးနွေးမှုတွေကို လက်ခံကောင်း လက်ခံနိုင်တယ်လို့ တရုတ်-မြန်မာအရေးလေ့လာသုံးသပ်သူ ဒေါက်တာလှကျော်ဇောက အာရက္ခတိုင်းမ်စ်ကို ပြောပါတယ်။

“KIA ကို ချဉ်းကပ်ပြီးပြီ။ ဒါပေမယ့် KIA ကလည်း သူတို့ကလည်း အကြိမ်ကြိမ် သွားဖူးထားတာလေ။ ဗိုလ်ချုပ်ဂွမ်မော် ပြောသလိုပဲ။ သူတို့ မသွားတာမှ မဟုတ်ပဲ။ ခေါ်တိုင်းလည်း သွားနေတာပဲ။ ဒါပေမယ့် ဒီတစ်ခေါက်တော့ KIA ပဲဖြစ်ဖြစ်၊ AA ပဲဖြစ်ဖြစ် သူတို့က တတ်နိုင်သမျှ နည်းနည်းတော့ သတိထားမယ် ထင်တယ်။ သူတို့လည်း အကြိမ်ကြိမ် ထိထားပြီးသား ဖြစ်တာကို။ အဲဒီတော့ လောလောဆယ် ဒါပေမယ့် ဗိုလ်ချုပ်အင်ဘန်လ ပြောတာတော့ နိုင်ငံရေးကိစ္စတွေကို နိုင်ငံရေးနည်းနဲ့ ဖြေရှင်းမှု လိုတယ်လို့ ဘာလို့ ပြောတော့ ဒီဆွေးနွေးမှုတွေကိုလည်း လက်ခံကောင်း လက်ခံနိုင်တယ်” လို့ သူက ပြောပါတယ်။

ငြိမ်းချမ်းရေးအတွက် တွေ့ဆုံဆွေးနွေးကြရမှာ တိုင်းရင်းသားလက်နက်ကိုင်အဖွဲ့အချို့က ပြည်နယ်သစ် တောင်းဆိုကြသလို အချို့ကတော့ ပြည်နယ် ဒါမှမဟုတ် ကိုယ်ပိုင်အုပ်ချုပ်ခွင့်ရဒေသ အဖြစ် ပေးဖို့ တောင်းဆိုနေကြပါတယ်။

ပြည်နယ်သစ်တောင်းဆိုတဲ့အထဲမှာတော့ ဝ နဲ့ မိုင်းလားတို့လို့ လက်နက်ကိုင်အဖွဲ့ကြီးတွေလည်း ပါဝင်နေတာပါ။

လက်ရှိမှာတော့ NSPNC ဟာ “ဝ” နဲ့ မိုင်းလားတို့ကို ငြိမ်းချမ်းရေးတွေ့ဆုံဆွေးနွေးမှု ၂ ကြိမ်တိုင် တွေ့ဆုံဆွေးနွေးထားတာဖြစ်ပါတယ်။