အာရက္ခတိုင်းမ်စ် (၁၄ နိုဝင်ဘာ ၂၀၂၄)
ရက္ခိုင်ပြည်သူ နဲ့ အာရက္ခတပ်တော်ရဲ့ အဓိက ရည်မှန်းချက်တစ်ခုဖြစ်သော အာရက္ခဒေသတွင်းရှိ စစ်ကောင်စီတပ်ဖွဲများအားလုံး အလုံးစုံချုပ်ငြိမ်းစေရေးကို မိမိတို့ ဆက်လက်အကောင်အထည် ဖော်လျက်ရှိတယ်လို့ AA က ထုတ်ပြန်ပြောဆိုပါတယ်။
ရက္ခိုင်ပြည် နဲ့ ပလက်ဝဒေသကို အာရက္ခတပ်တော်က ၂၀၂၃ ခုနှစ်၊ နိုဝင်ဘာ ၁၃ ရက်နေ့မှာ စတင် ထိုးစစ်ဆင်တိုက်ခိုက်ခဲ့ပြီး စစ်ဆင်ရေး ၁ နှစ်အတွင်း မြို့ ၁၁ မြို့ နဲ့ စစ်ကောင်စီရဲ့ တပ်စခန်းအများအပြားကို သိမ်းပိုက်နိုင်ခဲ့တယ်လို့ သိရပါတယ်။
၂၀၂၃ ခုနှစ်၊ နိုဝင်ဘာ ၁၃ ရက်နေ့က ရသေ့တောင်မြို့နယ် ချိန်ခါလီနယ်ခြားစောင့်စခန်း အပါအဝင် စစ်ကောင်စီ၏ အရေးပါသော တပ်စခန်းများကို AA က ထိုးစစ်ဆင်တိုက်ခိုက်မှုနှင့်အတူ စစ်ကောင်စီ တပ်စခန်းများအား မရပ်မနား တိုက်ခိုက်ခဲ့တယ်လို့ ဆိုပါတယ်။
လက်ရှိမှာ ပလက်ဝဒေသ၊ ကျောက်တော်၊ မင်းပြား၊ မြောက်ဦး၊ ရသေ့တောင်၊ ဘူးသီးတောင်၊ ပုဏ္ဏားကျွန်း၊ ရမ်းဗြဲ၊ မြေပုံ၊ ပေါက်တော၊ သံတွဲ နဲ့ ကျိန္တလီမြို့တွေရှိ စစ်ကောင်စီစခန်းအားလုံးကို စစ်ဆင်ရေး ၁ နှစ် မပြည့်မီကာလအတွင်း သိမ်းပိုက်ထိန်းချုပ်ထားနိုင်ခဲ့ပြီးဖြစ်တယ်လို့ AA ရဲ့ ထုတ်ပြန်ချက်မှာ ဖော်ပြထားပါတယ်။
လက်ရှိမှာလည်း စစ်ကောင်စီရဲ့ အမ်းမြို့အခြေစိုက် အနောက်ပိုင်းတိုင်းစစ်ဌာနချုပ်ကို အာရက္ခတပ်တော်က ထိုးစစ်ဆင်တိုက်ခိုက်နေပြီး ခမရ (၃၇၃)-အမှတ် (၃၇၃) ခြေမြန်တပ်ရင်း၊ အမတ (၃၇၄)-အမှတ် (၃၇၄) အမြောက်တပ်ရင်း၊ လလစ (၇၅၇)-အမှတ် (၇၅၇) လျှပ်စစ်အလုပ်ရုံတပ်ခွဲ၊ စနခ (၃၄၅)-အမှတ် (၃၄၅) စစ်လက်နက်ပစ္စည်းတပ်ခွဲ၊ တစသ (၈)- အမှတ် (၈) တိုက်ပွဲဝင်စည်းရုံးရေးသင်တန်းကျောင်း၊ တဆရ(၂/၃၀၀)-အမှတ်-၂ /ကုတင် ၃၀၀ တပ်မတော်စစ်ဆေးရုံ၊ လကရ-လေကြောင်းရန်ကာကွယ်ရေးတပ်၊ စရဖ-စစ်ဖက်ရေးရာလုံခြုံရေးတပ်တို့ကို အာရက္ခတပ်တော်မှ သိမ်းပိုက်ရရှိထားသည်။
အနောက်ပိုင်းတိုင်း စစ်ဌာနချုပ် အပါအဝင် ကျန်ရှိနေသော စစ်ကောင်စီရဲ့ တပ်ရင်း၊ တပ်ခွဲများကို သိမ်းပိုက်နိုင်ရေး အာရက္ခတပ်တော်က ထိုးစစ်ဆင်တိုက်ခိုက်လျက်ရှိနေပြီး အမ်း၊ နပခဌာနချုပ်ရှိရာ ပတ်ဝန်းကျင်မှာ တိုက်ပွဲတွေ ဆက်လက်ပြင်းထန်နေတယ်လို့ ဆိုပါတယ်။
5 comments