အာရက္ခတိုင်းမ်စ် (၅ ဒီဇင်ဘာ ၂၀၂၄)
ရက္ခိုင်ပြည် အမ်းမြို့နယ်ရှိ အနောက်တိုင်းစစ်ဌာနချုပ် (နပခ) ကို ရိက္ခာပို့ရန် လာတဲ့ စစ်ကောင်စီအင်အား ၅၀ ခန့် ပါဝင်သော ရိက္ခာကား ၃ စီးကို မနေ့က (၄ ဒီဇင်ဘာ) က PRA-Magway က ခြုံခိုမိုင်းဆွဲ တိုက်ခိုက်သဖြင့် စစ်ကောင်စီတပ်သား ၉ ဦးထပ်မနည်း သေဆုံးခဲ့ပြီး ရိက္ခာကား ၂စီမှာလည်း လုံးဝပျက်စီးသွားကြောင်း သိရပါတယ်။
မကွေးတိုင်း ငဖဲမြို့နယ် အမ်း-ပဒါန်း ကားလမ်းပေါ်ရှိ စွန်တက်ရွာ နဲ့ လင်းတဲရွာ ကြားတွင် စစ်ကောင်စီတပ်သား အင်အား ၅၀ ခန့်ပါသော ရိက္ခာက ၃ စီးကို မနေ့က နေ့လည် ၁နာရီခန့်က ခြုံခို မိုင်းခွဲတိုက်ခိုက်သဖြင့် နှစ်ဖက်ထိတွေ့မှုမှာ ၁၀ မိနစ်ခန့် ကြာမြင့်ကာ စစ်ကောင်စီဘက် မှ ၉ ဦး သေဆုံးခဲ့ပြီး ရိက္ခာကား ၂ စီးမှာလည်း လုံးဝ ပျက်စီးသွားတယ်လို့ PRA-Magway က ဒီကနေ့မှာ သတင်းထုတ်ပြန်ခဲ့ပါတယ်။
အလားတူ နိုဝင်ဘာလ ၂၃ ရက်နေ့ကလည်း ငဖဲမြိုနယ် ဘုံးဘောကျေးရွာသို့ စစ်ကြောင်းထိုးလာတဲ့ အင်အား ၉၀ ပါ စစ်ကောင်စီ စစ်ကြောင်းကို လူထုတော်လှန်ရေးမဟာမိတ်အင်အားစု (PRA-Magway)၊ အရှိချင်းကာကွယ်ရေးတပ် (ACDF)၊ မင်းဘူး ခရိုင်တပ်ရင်း (၂) တို့ ပူးပေါင်း တိုက်ခိုက်ခဲ့ကြောင်းလည်း သိရပါတယ်။
အဆိုပါ တိုက်ပွဲမှာ ၅ နာရီကြာမြင့်ခဲ့ပြီး စစ်ကောင်စီဖက်က လက်နက်ကြီး၊ လက်နက်ငယ်များဖြင့် အသာစီး ပစ်ခတ်မှုများကြောင့် တော်လှန်ရေးပူးပေါင်းတပ်ဖွဲ့မှ ဆုတ်ခွာပေးခဲ့ရပြီး စစ်ကောင်စီဖက်က တပ်သား ၁၄ ဦးထက်မနည်း သေဆုံးသွားပြီး အများအပြားလည်း ထိခိုက်ဒဏ်ရာရရှိသွားတယ်လို့ ဆိုပါတယ်။
ထိုတိုက်ပွဲကြောင့် PRA-Magway, ACDF, မင်းဘူးခရိုင်တပ်ရင်း ၂ တို့မှ ရဲဘော်တပ်သားတစ်ဦး မစိုးရ ဒဏ်ရာရရှိသွားတယ်လို့ သိရပါတယ်။
ရက္ခိုင်ပြည် အမ်းမြို့နယ်ရှိ စစ်ကောင်စီရဲ့ အနောက်ပိုင်းတိုင်းစစ်ဌာနချုပ် (နပခ) မှ စစ်ရှုံးသဖြင့် ထွက်ပြေးလာသော စစ်ကောင်စီတပ်ပြေးများကို မိမိတို့ PRA-Magway မှ ကင်းပုန်းချ ပိတ်ဆို့ဖမ်းဆီးမှုများ ပြုလုပ်လျက်ရှိပြီး ထိတွေ့တိုက်ပွဲများလည်း အခါမလပ် ဖြစ်ပွားလျက်ရှိကြောင်း ဆိုပါတယ်။
တိုက်ပွဲအသီးသီးရဲ့ မှတ်တမ်းများအရ မိမိတို့ PRA-Magway သည် နိုဝင်ဘာ နှင့် ဒီဇင်ဘာလ ပထမပတ်အတွင်း ရန်သူစစ်ကောင်စီအင်အား ၅၀ ကျော်ကို ချေမှုန်းနိုင်ခဲ့ပြီး လက်နက်ငယ် (၈) လက်၊ ခဲယမ်းနှင့် စစ်အသုံးအဆောင် များကိုလည်း သိမ်းဆည်းရမိခဲ့ကြောင်း ဆိုပါတယ်။
