အာရက္ခတိုင်းမ်စ် (၂၈ မတ် ၂၀၂၅)
ရက္ခိုင်ပြည် သံတွဲမြို့နယ်တွင် ရောင်ခြည်ဦးကျေးရွာသားတစ်ဦး မတ်လ ၂၆ရက်က စစ်ကောင်စီထောင်ထားခဲ့တဲ့ မြေမြှုပ်မိုင်း နင်းမိလို့ ဘယ်ဘက်ခြေထောက် ပြတ်သွားတယ်လို့ ဒေသခံတွေက အာရက္ခတိုင်းမ်စ်ကို ပြောပါတယ်။
“အခုက မီးရှို့ရာသီဆိုတော့ သူ့တောင်ကို မီးတားဖို့သွားတာမှာ နင်းမိတာ၊ ဘယ်ဘက်ခြေထောက် ဖြတ်လိုက်ရတယ်” လို့ သံတွဲမြို့ဒေသခံတစ်ဦးက ပြောပါတယ်။
စစ်ကောင်စီရဲ့ မြေမြှုပ်မိုင်းကြောင့် ဘယ်ဖက်ခြေထောက် ပြတ်သွားသူမှာ အသက် ၆၀ အရွယ် ဦးစိုးသန်း ဖြစ်တယ်လို့ သိရပါတယ်။
“မြေမြှုပ်မိုင်း အသိပညာပေးတွေ၊ စစ်ကျန်လက်နက် အသိပညာပေးတွေတော့ တောက်လျောက်လုပ်ပေးတယ်။ လမ်းဆုံ၊ လမ်းခွတွေမှာ လက်ကမ်းစာစောင်တွေ ကပ်တယ်။ တတ်နိုင်သလောက်တော့ လုပ်ပေးပါတယ်” လို့ သံတွဲမြို့က ပရဟိတလူငယ်တစ်ဦးက အာရက္ခတိုင်းမ်စ်ကို ပြောပါတယ်။
စစ်ကောင်စီဟာ ရက္ခိုင်ပြည် ကျိန္တလီမြို့တွင် သူတို့တွေ မြေမြှုပ်မိုင်းများ ထောင်ထားကြောင်းကို တရားဝင်ထုတ်ဖော် ပြောကြားခဲ့ပါတယ်။
