အာရက္ခတိုင်းမ်စ် (၂၉ မတ် ၂၀၂၅)
စစ်ကိုင်းမြို့တွင် မတ်လ ၂၈ ရက်က လှုပ်ခတ်တဲ့ ငလျင်ဒဏ်ကြောင့် ဒေသခံပြည်သူ ၄၀၀ ကျော် သေဆုံးခဲ့ပြီး အများအပြား ထိခိုက်ဒဏ်ရာ ရရှိခဲ့တယ်လို့ ဒေသခံတွေက အာရက္ခတိုင်းမ်စ်ကို ပြောပါတယ်။
“ လှုပ်တဲ့ အချိန်က ဗလီတက်နေချိန်ဖြစ်လို့ ဗလီတက်နေသူတွေ အကုန်နီးပါး သေဆုံးတယ်။ ပိတ်မိနေတာက သီလရှင်ကျောင်းတွေနဲ့ မူကြိုကျောင်းတွေမှာ ကလေးတွေ ပိုများတယ်” လို့ စစ်ကိုင်းမြို့ဒေသခံတစ်ဦးက ပြောပါတယ်။
စစ်ကိုင်းမြို့ စစ်ကိုင်းတောင်ပေါ် သီလရှင်ကျောင်းများ၊ စေတီပုထိုးများ၊ ဗလီများ၊ လူနေအိမ် အများအပြားလည်း ပြိုကျသွားတယ်လို့ ဆိုပါတယ်။
“ ကယ်တဲ့လူနဲ့ ပိနေ ပိတ်နေတဲ့ သူတွေက အင်အားမမျှဘူး။ အခြားက အကူအညီတွေလည်း မရောက်လာသေးဘူး။ ဒီမှာဖြစ်နေတာတွေကို အများပြည်သူသိအောင် ဇက်နဲ့ မန်းလေးကို လာပြီး ဖုန်းပြောတာပါ။ ဟိုမှာ ဖုန်းလိုင်းလည်းမရ၊ အင်တာနက်လည်း မရဘူး” လို့ သူက အာရက္ခတိုင်းမ်စ်ကို ပြောပါတယ်။
အဆိုပါငလျင်ကြောင်း စစ်ကိုင်တံတားအဟောင်းမှာ ပြိုပျက်သွားပြီး တံတားအသစ်ကိုလည်း ခံနိုင်ရည်အားမရှိတော့တာကြောင့် ပေးမဖြတ်လို့ မန္တလေး – စစ်ကိုင်းကို ဇက်နဲ့ သွားလာနေရတယ်လို့လည်း ဆိုပါတယ်။
အမေရိကန်အစိုးရ ဘူမိဗေဒ စစ်တမ်း (USGS) ရဲ့ ထုတ်ပြန်ချက်အရ မနေ့က မြန်မာနိုင်ငံတွင် လှုပ်ခတ်တဲ့ အင်အားပြင်းငလျင်ကြောင့် သေဆုံးသူဦးရေ ၁၀,၀၀၀ မှ ၁၀၀,၀၀၀ ကြားရှိနိုင်ပြီး စီးပွားရေးအရ ထိခိုက်မှုမှာ မြန်မာနိုင်ငံ GDP ရဲ့ ၇၀ ရာခိုင်နှုန်းအထိ မြင့်မားနိုင်တယ်လို့ ထုတ်ပြန်ထားပါတယ်။
21 comments