အာရက္ခတိုင်းမ်စ် (၁၆ မေ ၂၀၂၅)
စစ်ကောင်စီရဲ့ လေကြောင်းကနေပြီး ဗုံးကြဲတိုက်ခိုက်မှုကြောင့် မေလ ၁၃ ရက်ကနေ ၁၅ ရက်အတွင်း အရပ်သားပြည်သူ ၂၀ သေဆုံးခဲ့ပြီး ၃၇ ဦး ထိခိုက်ဒဏ်ရာရရှိခဲ့ပါတယ်။
စစ်ကောင်စီရဲ့ လေကြောင်းတိုက်ခိုက်မှုကြောင့် သေဆုံးသွားသူများမှာ ကျောက်တော်မြို့နယ်တွင် ၈ ယောက် နဲ့ ရသေ့တောင်မြို့နယ်တွင် ၁၂ ယောက်ဖြစ်ပြီး ထိခိုက်ဒဏ်ရာရရှိသူတွေကတော့ ကျောက်တော်မြို့နယ်တွင် ၁၄ ယောက် နဲ့ ရသေ့တောင်မြို့နယ်တွင် ၂၃ ယောက် ဖြစ်ပါတယ်။
စစ်ကောင်စီဟာ ရသေ့တောင်မြို့နယ် ထွန်းရဝေရွာဟောင်းကို မေလ ၁၃ ရက် မနက် ၁၀ နာရီ ၅ မိနစ်က ဂျက်ဖိုက်တာနဲ့ လာရောက်ဗုံးကြဲမှုကြောင့် အရပ်သားပြည်သူ ၁၂ ဦး သေဆုံးခဲ့ပြီး ၂၃ ဦး ထိခိုက်ဒဏ်ရာ ရရှိခဲ့တယ်။
အလားတူ မေလ ၁၄ ရက် ညနေ ၃ နာရီ ၅၀ မိနစ်တွင် ကျောက်တော်မြို့ကို ဂျက်ဖိုက်တာနဲ့ လာရောက် ဗုံးကြဲခဲ့လို့ အရပ်သားပြည်သူ ၃ ဦး သေဆုံးခဲ့ပြီး ၅ ဦး ထိခိုက်ဒဏ်ရာ ရရှိခဲ့ပါတယ်။
နောက်တစ်နေ့ မေလ ၁၅ ရက်တွင်လည်း ကျောက်တော်မြို့ကို ဂျက်ဖိုက်တာနဲ့ နေ့လည် ၂ နာရီ ၂ မိနစ်တွင် တစ်ကြိမ်၊ ၂ နာရီ ၁၀ မိနစ်တွင် တစ်ကြိမ်၊ ၂ နာရီ ၁၄ မိနစ်တွင် တစ်ကြိမ် စုစုပေါင်း ၃ ကြိမ်တိုင်တိုင် ဗုံး ၁၀ လုံးကျော် ကြဲချခဲ့လို့ အရပ်သားပြည်သူ ၅ ဦး သေဆုံးခဲ့ပြီး ၉ ဦး ထိခိုက်ဒဏ်ရာ ရရှိခဲ့ပါတယ်။
အထက်ပါကဲ့သို့ စစ်ကောင်စီရဲ့ လေကြောင်းတိုက်ခိုက်မှုကြောင့် ရသေ့တောင်မြို့နယ် ထွန်းရဝေရွာဟောင်းတွင် လူနေအိမ် ၃၁ လုံး နဲ့ ကျောက်တော်မြို့တွင် လူနေအိမ် ၂၇ အိမ်လည်း ပျက်စီးခဲ့ရပါတယ်။
2 comments