အာရက္ခတိုင်းမ်စ်( ၁၀ ဒီဇင်ဘာ ၂၀၂၅)
ရက္ခိုင်ပြည်၊ တောင်ကုတ်မြို့ကို ပို့ဆောင်မယ့် ငွေကျပ် ၁၂ ဘီလီယံကျော် တန်ဖိုးရှိ စိတ်ကြွဆေးများ ဖမ်းမိခဲ့ကြောင်း စစ်ကော်မရှင် က ဒီကနေ့ (ဒီဇင်ဘာ ၁၀ ရက်) မှာ ထုတ်ပြန်ခဲ့ပါတယ်။
အဆိုပါ စိတ်ကြွဆေးတွေကို ရှမ်းပြည်နယ်ကတဆင့် ရက္ခိုင်ပြည်၊ တောင်ကုတ်မြို့ကို သယ်ဆောင် ရောင်းဝယ်တာ ဖြစ်တယ်လို့ ထုတ်ပြန်ထားပါတယ်။
ပြီးခဲ့တဲ့ (နိုဝင်ဘာ ၂၉ ရက်) နံနက် ၈ နာရီမှာ မန္တလေးတိုင်း၊ ပြင်ဦးလွင်မြို့နယ်၊ ထုံးဘိုကျေးရွာအနီးကို ဝေလင်းထွန်း မောင်းနှင်ပြီး အောင်သူဖြိုးနဲ့ ပြည့်ဖြိုးဟိန်း (ခ) ဖက်တီးတို့ လိုက်ပါလာတဲ့ ALPHARD မော်တော်ယာဉ်ကို စကမရဲ့အဖွဲ့တွေက စစ်ဆေးရာမှာ စိတ်ကြွဆေးပြား ၂၃ ဒသမ ၉ သိန်းကို ဖမ်းမိခဲ့တယ်လို့ သိရပါတယ်။
ဆက်လက် စစ်ဆေးချက်အရ အဆိုပါရက်မှာပဲ ပြင်ဦးလွင်မြို့နယ်၊ ခြေမြစ်ပင်ကျေးရွာအနီးရှိ ချုံအတွင်းမှ ဆာလာအိတ်များနဲ့ ထည့်ထားတဲ့ စိတ်ကြွဆေးပြား ၆၂ သိန်းကို ထပ်မံ သိမ်းဆည်းရမိခဲ့တယ်လို့လည်း ထုတ်ပြန်ထားပါတယ်။
သိမ်းဆည်းရမိတဲ့ စိတ်ကြွဆေးပြား စုစုပေါင်း ၈၅ ဒသမ ၉ သိန်းရှိပြီး တန်ဖိုးအနေနဲ့ ၁၂ ဒသမ ၈၈၅ ဘီလီယံ တန်ဖိုးရှိတယ်လို့လည်း စစ်ကော်မရှင်ရဲ့ ထုတ်ပြန်ချက်မှာ ဖော်ပြထားပါတယ်။
အဆိုပါ စိတ်ကြွဆေးပြားများ သယ်ဆောင်ရာတွင် ပူးပေါင်းပါဝင်သူဖြစ်တဲ့ ကျော်မိုးထွန်းကို (ဒီဇင်ဘာလ ၁ ရက်)၊ ည ၁ဝ နာရီမှာ ပဲခူးတိုင်း၊ ပန်းတောင်းမြို့နယ်၊ ဥသျှင်ပင်မြို့၊ ရတနာပုံရပ်ကွက်ရှိ နေအိမ်မှာ ဖမ်းမိခဲ့ပြီး ရွှေတောင်မြို့နေသူ ကျော်မောင်မောင်လှိုင် (ခ) ကိုချိုကိုတော့ ဖမ်းဆီးရမိခြင်း မရှိသေးကြောင်း သိရပါတယ်။
ဖမ်းဆီးရမိသူတွေကို မူးယစ်ဆေးဝါးနဲ့ စိတ်ကို ပြောင်းလဲစေသော ဆေးဝါးများဆိုင်ရာ ဥပဒေအရ အရေးယူထားပြီး ကွင်းဆက် ပြစ်မှုကျူးလွန်သူများကို ဆက်လက် ဖော်ထုတ်လျက် ရှိတယ်လို့လည်း စစ်ကော်မရှင်က ထုတ်ပြန်ထားပါတယ်။
29 comments