စစ်တွေမှာ ဆိုလာပြားတွေနဲ့ မီးပွိုင့်စနစ်တွေကို ပြန်လည်လုပ်ဆောင်နေ

အာရက္ခတိုင်းမ်စ် (၇ ဖေဖော်ဝါရီ ၂၀၂၆)

လျှပ်စစ်မီး မရရှိတာ ၂ နှစ်ကျော်ရှိပြီဖြစ်တဲ့ ရက္ခိုင်ပြည်၊ စစ်တွေမြို့မှာ မီးပွိုင့်စနစ်တွေကို ဆိုလာပြားတွေ တပ်ဆင်ပြီး ပြန်လည်လုပ်ဆောင်နေတယ်လို့ ဒေသခံတဦးက အာရက္ခတိုင်းမ်စ်ကို ပြောပါတယ်။

“လက်ရှိ စစ်တွေမြို့မှာ မီးမရပေမယ့် ဆိုလာပြားတွေနဲ့ လမ်းဆုံလမ်းခွမှာလေ။ လမ်းဆုံ လေးဘက်ရှိတဲ့ နေရာတို့၊ အရင်တုန်းက လုပ်ထားတဲ့ မီးပွိုင့်နေရာတို့ဆိုရင် ဆိုလာပြားနဲ့ အခု ပြန်ပြီးတော့ မီးပွိုင့်လေးတွေ တပ်ဆင်ပေးထားတယ်။ အဲဒီမီးပွိုင့်တွေမှာလည်း အကုန်လုံး CCTV တပ်ထားတဲ့ ပုံစံမျိုးလေးတွေ တွေ့ရတယ်။ CCTV တပ်ထားတာကတော့ ကောင်းပါတယ်။ ဘာလို့ဆို ယာဉ်တိုက်မှုတွေ ဖြစ်သော်လည်းကောင်း၊ ဖမ်းပြီးခိုးသွားလို့ရှိရင် ဘာပစ္စည်းတွေ၊ ဘယ်လိုဆိုတာကို ပြန်ကြည့်လို့ရတဲ့ ပုံစံမျိုးနဲ့တော့ ကိုယ်တွေအမြင်ကတော့ လက်ရှိအနေအထားကတော့ လုံခြုံရေးအရ လုပ်ထားတာဆိုတော့ ကောင်းပါတယ်။ အဆင်ပြေပါတယ်” လို့ သူက ပြောပါတယ်။

၂ နှစ်ကျော် မီးပွိုင့်တွေမရှိဘဲ မောင်းနှင်သွားလာနေရတာဖြစ်တာကြောင့် သတိထားပြီး မောင်းနှင်ခဲ့ကြရကြောင်း၊ အခုလိုမျိုး မီးပွိုင့်တွေ ပြန်အသက်ဝင်လာတဲ့အပြင် CCTV တွေလည်း မီးပွိုင့်မှာ တပ်ဆင်ထားတာကြောင့် လုံခြုံမှု ပိုရှိတယ်လို့ ခံစားရကြောင်း စစ်တွေဒေသခံတဦးက အာရက္ခတိုင်းမ်စ်ကို ပြောပါတယ်။

“အရင်တုန်းကတော့ မီးပွိုင့်မှာ အနီ၊ အစိမ်းမရှိဘဲနဲ့ ဒီတိုင်းသွားကြတယ်။ ဒီတိုင်းသွားရင် ထိန်းသွားတဲ့သူ ရှိသလို၊ မထိန်းဘဲနဲ့ သွားတဲ့သူလည်း ရှိတာပေါ့နော်။ ဆိုတော့ ကိုယ့်ဟာကိုယ်ကိုယ် ရှောင်နေရတဲ့ ပုံစံမျိုးပေါ့။ ဖြတ်သွား ဖြတ်လာကြတော့ ကိုယ်မောင်းတဲ့ယာဉ်ကို ကိုယ့်ဟာကို သတိထားပြီးတော့ မောင်းနှင်နေရတဲ့ ပုံစံအနေအထားမျိုးတွေ ရှိခဲ့တယ်လေ။ အခုက အဲဒီလိုမျိုး တွေ့လိုက်တော့ အးလုံး ဆင်ဆင်ခြင်ခြင်ပေါ့နော်။ မီးနီလို့ရှိရင် ရပ်ပေး၊ တချို့ကြတော့လည်း ခါတိုင်းပုံမှန် အရင်တုန်းကလည်း ရှိပါတယ်။ မီးနီလို့ရှိရင် မီးစိမ်းအောင် မစောင့်ဘဲနဲ့ ထွက်သွားတာတို့ ဘာတို့တွေရှိတာပဲ။ အခု အဲဒီထွက်သွားတဲ့အခါမှာ CCTV တပ်ထားတာဆိုတော့လည်း ပိုပြီး လုံခြုံမှုရှိတာပေါ့နော်။ safe ဖြစ်တယ်လို့တော့ ခံစားရပါတယ်” လို့ သူက ပြောပါတယ်။

စစ်တွေမှာ ရွေးကောက်ပွဲ ကျင်းပပြီးနောက်ပိုင်း စစ်ကော်မရှင် ခန့်အပ်ထားတဲ့ ရက္ခိုင်ပြည် အစိုးရအဖွဲ့ဟာ လမ်းမတွေမှာ CCTV တွေတပ်ဆင်တာ၊ လမ်းတွေ ပြုပြင်တာ၊ လျှပ်စစ်မီးကို ဆိုလာစနစ်နဲ့ ပေးဖို့ စတာတွေကို လုပ်‌ဆောင်လာနေတာကို တွေ့လာရပါတယ်။

ဒါပေမယ့် ည ၉ နာရီနောက်ပိုင်း ညမထွက်ရ အမိန့်တွေကိုတော့ မပယ်ဖျက်သေးတဲ့အတွက် ပြီးခဲ့တဲ့ ရက်ပိုင်းက ငလျင်လှုပ်ခတ်တုန်းက‌ အပြင်ကို ထွက်ကြဖို့တောင် ကြောက်လန့်စွာနဲ့ ထွက်ရတဲ့ အနေအထားတွေ ရှိတယ်လို့လည်း ဒေသခံတွေထံက သိရပါတယ်။