စကမ ကြောင့် မတ်လအတွင်း ရက္ခိုင်ပြည်သူ ၄၀ နီးပါး ထိခိုက် သေဆုံး

အာရက္ခတိုင်းမ်စ် (၂ ဧပြီ ၂၀၂၆)

စစ်ကော်မရှင်ရဲ့ စစ်ရာဇဝတ်မှု ကျူးလွန်မှုကြောင့် ၂၀၂၆ ခုနှစ် မတ်လအတွင်း ရက္ခိုင်ပြည်သူ ၃၇ ဦး ထိခိုက် သေဆုံးခဲ့တယ်လို့ Arakan Responders for Emergency (ARE) က ဧပြီလ ၁ ရက်မှာ ထုတ်ပြန်ခဲ့ပါတယ်။

အဆိုပါ ထုတ်ပြန်ချက်တွင် ၂၀၂၆ ခုနှစ် မတ်လ ၁ ရက်ကနေ ၃၁ ရက်အထိ တလတာကာလအတွင်း ရက္ခိုင်ပြည်ရှိ မြို့နယ် ၇ မြို့နယ်နဲ့ မကွေးတိုင်း မင်းတုန်းမြို့နယ်တို့တွင် စစ်ကော်မရှင်ရဲ့ လေကြောင်းတိုက်ခိုက်မှု၊ စစ်ရေယာဉ်များကနေ လက်နက်ကြီးပစ်ခတ်မှု၊ ဒရုန်းနဲ့ တိုက်ခိုက်မှု၊ စစ်ကျန်လက်နက် ပေါက်ကွဲမှုတွေကြောင့် ရက္ခိုင်ပြည်က အရပ်သားပြည်သူ စုစုပေါင်း ၃၇ ဦး ထိခိုက် သေဆုံးခဲ့ရတယ်လို့ ဆိုထားပါတယ်။

အဆိုပါ ထိခိုက် သေဆုံးသူ ၃၇ ဦးတွင် သေဆုံးသူ ၁၈ ဦးနဲ့ ဒဏ်ရာရသူ ၁၉ ဦးရှိပြီး သေဆုံးသူ ၁၈ ဦးတွင် အသက် ၁၈ နှစ်အောက် ကျား ၅ ဦး၊ အသက် ၁၈ နှစ်ကနေ ၆၀ နှစ်ကြား ကျား ၁၁ ဦး၊ မ ၁ ဦးနဲ့ အသက် ၆၀ နှစ်အထက် ကျား ၁ ဦး ဖြစ်ပြီး ဒဏ်ရာရသူ ၁၉ ဦးတွင် အသက် ၁၈ နှစ်အောက် ကျား ၅ ဦး၊ မ ၁ ဦး၊ အသက် ၁၈ နှစ်ကနေ ၆၀ နှစ်ကြား ကျား ၆ ဦး၊ မ ၆ ဦး နဲ့ အသက် ၆၀ နှစ်အထက် မ ၁ ဦး တို့ပဲ ဖြစ်ပါတယ်။

Arakan Responders for Emergency အနေနဲ့ မကွေးတိုင်း မင်းတုန်းမြို့နယ်ရှိ ကုန်သွယ်ရေးစခန်းကို လေကြောင်းကနေ တိုက်ခိုက်ခဲ့မှုတွင် သေဆုံးသူ ၂၅ ဦးနဲ့ ဒဏ်ရာရရှိသူ ၂၀ ဦးအထိ ရှိခဲ့ကြောင်း သိရှိခဲ့ရသော်လည်း လမ်းပန်းဆက်သွယ်ရေး အခက်အခဲများကြောင့် မိမိတို့ အတည်ပြုနိုင်တဲ့ စာရင်းများအရ လက်ရှိတွင် သေဆုံးသူ ၈ ဦးနဲ့ ဒဏ်ရာရသူ ၄ ဦးကိုသာ အမည်စာရင်း ပြုစုနိုင်ပါသေးတယ်လို့ ဆိုပါတယ်။

ထုတ်ပြန်ချက်တွင် တဦးချင်းစီရဲ့ အသက်ဟာ မိသားစုနဲ့ လူ့အဖွဲအစည်းအတွက် အစားထိုးမရနိုင်တဲ့ ဆုံးရှုံးမှုတွေ ဖြစ်ပြီး မတ်လအတွင်း လက်တွေ့ထိခိုက်မှုစာရင်းမှာ ယခုထက် ပိုမို များပြားနိုင်တယ်လို့လည်း ဆိုပါတယ်။

အဆိုပါ စာရင်းတွင် အရပ်သားပြည်သူများရဲ့ ထိခိုက်သေဆုံးမှုကိုသာ အဓိကထား ဖော်ပြထားခြင်း ဖြစ်တာကြောင့် အမ်းမြို့နယ် ဒါးလက်ချောင်းရှိ စစ်သုံ့ပန်းအကျဉ်းစခန်းကို စစ်ကော်မရှင်က လေယာဉ်နဲ့ ဗုံးကြဲတိုက်ခိုက်ခဲ့လို့ စစ်သုံ့ပန်း ၁၁၆ ဦး မီးလောင်သေဆုံးခဲ့တဲ့ ဖြစ်စဉ်ကို အရပ်သားစာရင်းတွင် ထည့်သွင်းဖော်ပြထားခြင်း မရှိပါဘူးလို့လည်း Arakan Responders for Emergency က ဆိုပါတယ်။