နတ်ရေကန်တွင် ပိတ်မိနေတဲ့ စကမ တပ်သားတွေဟာ တောကြက်မနဲ့ တူနေ

အာရက္ခတိုင်းမ်စ် (၂၀ ဧပြီ ၂၀၂၆)

မကွေးတိုင်း ငဖဲမြို့နယ်ရှိ နတ်ရေကန်ဗျူဟာကုန်းတွင် ပိတ်မိနေတဲ့ စစ်ကော်မရှင်တပ်သားတွေဟာ တောကြက်မတွေနဲ့ တူလာနေပြီလို့ နိုင်ငံရေးလေ့လာသုံးသပ်သူတွေက ဆိုပါတယ်။

“ နတ်ရေကန်ကို တပ်တော် (အာရက္ခတပ်တော်) နဲ့ ပူးပေါင်းအဖွဲ့တွေက မသိမ်းဘူး။ ပိတ်ဆို့ထားတာ၊ အထဲမှာ ပိတ်မိနေတဲ့ ကောင်တွေ (စစ်ကော်မရှင်တပ်သား) ကတော့ တောကြက်မလိုပေါ့။ ကြက်မရှိတော့ ကြက်ဖတွေက လာကြတယ်တယ်။ လာတဲ့ ကြက်ဖတွေကို အသင့် ဖမ်းစားလိုက်ရုံပဲ။ အခုလည်း ဒီလိုပဲ သူတို့လူတွေ ရှိနေတော့ စကမ က စစ်ကူပို့ရတယ်။ အဲဒါကို တော်လှန်ရေးအဖွဲ့တွေက ကြားကဖြတ်တိုက်လိုက်၊ ခြုံခိုက်တိုက်လိုက်နဲ့ စောင့်ပြီး တည်ကြက်လုပ်ပြီး ချွေချနေတာ” လို့ စစ်ရေးလေ့လာသုံးသပ်သူတဦးက အာရက္ခတိုင်းမ်စ်ကို ပြောပါတယ်။

စစ်ကော်မရှင်ရဲ့ နတ်ရေကန်ဗျူဟာကုန်း နောက်ဆုံးကာကင်းဖြစ်တဲ့ ကြက်ခြံကုန်းကာကင်းကို အာရက္ခတပ်တော်နဲ့ ပူးပေါင်းမဟာမိတ်တပ်တွေဟာ မတ်လဆန်းကတည်းက သိမ်းပိုက်ထားပါတယ်။

နတ်ရေကန်ဗျူဟာကုန်းတွင် ပိတ်မိနေတဲ့ စစ်ကော်မရှင်တပ်သားတွေကို လေကြောင်းကနေ ရိက္ခတွေချပေးနေပေမယ့် ပေးတဲ့ ရိက္ခာတွေကတော့ အသင့်စား ဆန်ပြုတ်ထုတ်တွေသာ ဖြစ်နေတယ်လို့လည်း သိရပါတယ်။

ရက္ခိုင် – မကွေးအစပ်ရှိ အမ်း – ပဒါန်းလမ်းပိုင်းက မထုံး၊ လင်းတဲ၊ စွန်တက် ၊ ဂုတ်စည်း ၊ ကံမြင့်ကန်၊ ဂုတ်ကြီး၊ ကြက်ရေစမ်း၊ ပိန်ရေစမ်းနဲ့ ပဇီကျေးရွာတွေကိုလည်း အာရက္ခတပ်တော် နဲ့ ပူးပေါင်းမဟာမိတ်တပ်တွေက သိမ်းပိုက်ထိန်းချုပ်ထားပြီး ဖြစ်ပါတယ်။

နတ်ရေကန်ဗျူဟာကုန်းဟာ မကွေးတိုင်း၊ ငဖဲမြို့နယ်မှာ တည်ရှိပြီး ရက္ခိုင်၊ မကွေးနဲ့ ပဲခူးအတွက် စစ်ရေးအရ အချက်အချာကျတဲ့ စစ်ကော်မရှင်ရဲ့ အမာခံစခန်းကြီး တခုလည်း ဖြစ်ပါတယ်။