စစ်တွေတိုက်ပွဲ နာရီကန်ရွာနားထိ ရောက်လာ

အာရက္ခတိုင်းမ်စ် (၁၂ ဇွန် ၂၀၂၆)

ရက္ခိုင်ပြည် စစ်တွေမြို့ရဲ့ နောက်ဆုံးခံတပ်ဖြစ်တဲ့ ရွေးတုအစိုးရတပ်ရဲ့ ရွှေမင်းဂံရေတပ်စခန်းနဲ့ ဒေသကွပ်ကဲမှုစစ်ဌာနချုပ် (ဒကစ) အနီးရှိ နာရိကန်ကျေးရွာအထိ အာရက္ခတပ်တော်က ထိုးစစ်ဆင် တိုက်ခိုက်နေတယ်လို့ သိရပါတယ်။

“နာရီကန်ရွာတံတားနားမှာကို တိုက်ပွဲတွေက ပြင်းထန်နေတယ်။ ဒကစနဲ့ဆို ၁ မိုင်လောက်ပအဲဆိုတော့ တော်တော်လေးကို နီးနေပြီ။ ခလရ ၂၇၂ နဲ့ လည်း နီးတယ်။ အခု တိုက်ပွဲဖြစ်နေတဲ့ နေရာတွေကလေ” လို့ စစ်တွေမြို့နယ်ဒေသခံတဦးက အာရက္ခတိုင်းမ်စ်ကို ပြောပါတယ်။

လက်ရှိမှာတော့ အာရက္ခတပ်တော်နဲ့ ရွေးတုအစိုးရတပ်တို့ဟာ နာရီကန်၊ ပါဒလိတ်နဲ့ တောကန်ကျေးရွာ အနီးတဝိုက်မှာ တိုက်ပွဲတွေ ဖြစ်ပွားနေပြီး စစ်တွေမြို့ အနောက်ဘက် မယူမြစ် အရှေ့ဘက်ကမ်းက အမြင့်ကျွန်း၊ ကြွီတဲကျေးရွာတို့မှာလည်း တိုက်ပွဲတွေ ဖြစ်ပွားနေတယ်လို့ သိရပါတယ်။

စစ်ရေးအရ ရှုံးနိမ့်နေတဲ့ ရွေးတုအစိုးရဟာ အနောက်ပိုင်းတိုင်းစစ်ဌာနချုပ် (ယာယီ) တပ်စခန်း ဖွင့်လှစ်ရာဖြစ်တဲ့ စစ်တွေမြို့ကို လက်လွှတ်ဆုံးရှုံးမှာ စိုးရိမ်နေတဲ့အတွက် မေလ ၂၅ ရက်က သန္ဓေစစ်သားတွေကို ရာထူး ၁ ဆင့် တိုးပေးပြီး စစ်တွေကို ပို့ဆောင်ခဲ့တယ်လို့လည်း သိရပါတယ်။

“အခုက တပ်တော်က တိုက်စစ်စုံ သုံးတယ် ပြောရမှာပေါ့။ ဒကစရော ရွေမင်းဂံကိုရော ထိုးနေတယ်။ ပင်လယ်ထဲက စစ်သင်္ဘောတွေကိုလည်း လက်နက်ကြီးနဲ့ပစ်နေတယ်။ စစ်တပ်ဖက်ကတော့ လေကြောင်းက လာကူတာပေါ့။ ဒရုန်းတွေလည်း နှစ်ဖက်စလုံး တော်တော်သုံးကြတယ်” လို့ မြေပြင်စစ်ရေးသတင်းရင်းမြစ်တဦးက အာရက္ခတိုင်းမ်စ်ကို ပြောပါတယ်။

ပြီးခဲ့တဲ့ ဇွန်လဆန်းကလည်း စစ်တွေနဲ့ ပုဏ္ဏားကျွန်းမြို့နယ်အစပ်မှာ ရွေးတုအစိုးရရဲ့ စစ်ရေယာဉ် ၃ စီးကို အာရက္ခတပ်တော်က လက်နက်ကြီးနဲ့ ပစ်ခတ်တိုက်ခိုက်လို့ ၁ စီး မီးလောင်နစ်မြုပ်သွားပြီး ၁ စီးက မီးခိုးအူပြီး ထွက်ပြေးသွားခဲ့ပါတယ်။

ရက္ခိုင်ပြည် စစ်တွေမြို့ထဲကို အာရက္ခတပ်တော် ဝင်ရောက်မှာကို စိုးရိမ်တာကြောင့် စစ်တွေမြို့တွင်း အဝင်အထွက်တွေကို တင်းကြပ်ခိုင်းထားပြီး အဓိကအားဖြင့် မွတ်ဆလင်တွေကို မြို့တွင်းကို ဝင်ရောက်ခွင့် မပြုထားဘူးလို့လည်း သိရပါတယ်။

ဒါ့အပြင် ရက္ခိုင်ပြည် စစ်တွေမြို့မှာ ည ၉ နာရီမှ မနက် ၅ နာရီအထိ ညမထွက်ရ အမိန့်အပြင် အဲဒီ သတ်မှတ်ကာလမှာ အပြင်ထွက်ပါက ပစ်မိန့်ပါ ထုတ်ထားတယ်လို့လည်း သိရပါတယ်။