အာရက္ခတိုင်းမ်စ် (၂၉ ဇွန် ၂၀၂၆)
ရွေးတုအစိုးရကနေ တက်လာတဲ့ အယောင်ဆောင်သမ္မတတု မင်းအောင်လှိုင်ရဲ့ တရုတ်ပြည်ခရီးစဉ်အတွင်း အင်တာဗျူးဖြေကြားချက်အရ စစ်ရေးက ပိုပြင်းထန်လာဦးမယ့် အနေအထားဖြစ်တယ်လို့ တရုတ်-မြန်မာအရေးလေ့လာသုံးသပ်သူ ဒေါက်တာလှကျော်ဇောက အာရက္ခတိုင်းမ်စ်ကို ပြောပါတယ်။
“အဲဒါကတော့ ရှင်းတယ်။ တရုတ်က အပစ်အခတ် ရပ်စဲပါ၊ ငြိမ်းချမ်းရေး ရှာပါဆိုပေမယ့် ကျမတို့ လုပ်သင့်လုပ်ထိုက်တာ ဆက်လုပ်ရမှာပဲ။ မင်းအောင်လှိုင်ကလည်း ပြတ်တယ်။ သူ့အင်တာဗျူးတွေမှာ ကြည့်လေ။ နိုင်ငံရေးအရ အဖြေရှာပါ့မယ် အဲဒီလိုတော့ ပြောတယ်။ ဒါပေမယ့် လုပ်သင့်လုပ်ထိုက်တာ တွေလည်း ရှင်းအောင်လုပ်ရဦးမယ်လို့ ပြောသွားတယ်။ ဒီ တရုတ်ပြည်မှာ ပြောသွားတဲ့ အင်တာဗျူးမှာ။ အဲဒီတော့ သဘောက လုပ်သင့်လုပ်ထိုက်တာနဲ့ ရှင်းအောင်က စစ်ရေးအရ ပြဿနာတွေ ရှင်းရဦးမယ် ဆိုတဲ့ သဘောထားပဲ။ အဲဒီတော့ သူတို့တိုက်လာရင် ကျမတို့ဘက်ကလည်း တိုက်မယ်။ တိုက်ပွဲတွေ ကတော့ ပိုပြီး ပြင်းထန်လာမယ်။ ဆက်တိုက်ကြရမှာပါပဲ။ ဘာဖြစ်လို့လဲဆို တရုတ်ကလည်း ဒီဟာနဲ့ ပတ်သက်လို့ ဘာမှ ပြောလို့မရဘူးလေ။ တရုတ်က သူနယ်နိမိတ် ဆက်နေတဲ့နေရာတွေပဲ ပြောလို့ရတာ။ မင်းအောင်လှိုင်က အခုချိန်ထိ မင်းအောင်လှိုင်အပါ စစ်ကောင်စီတွေက ခါတိုင်းလိုပဲ ပြင်းပြင်းထန်ထန် နှိပ်ကွပ်လိုက်ရင် ငြိမ်မယ်လို့ တွက်ထားတာ။ ကမ္ဘာ့အခြေအနေရော၊ လူတွေရဲ့ စိတ်ဓာတ်ရော သူတို့တွက်တာ တောက်လျှောက် မှားတာပါ။ သူတို့ ဆက်တိုက်မှာပဲ။ ဒီကာလမှာ ဘယ်သူက ခံနိုင်လဲ၊ ခံနိုင်တဲ့သူက ဆက်တိုက်ကြရမှာပဲ” လို့ သူက ပြောပါတယ်။
ရွေးတုအစိုးရကနေ တက်လာတဲ့ အယောင်ဆောင်သမ္မတတု မင်းအောင်လှိုင်ဟာ ဇွန်လ ၁၅ ရက်မှ ၁၉ ရက်ထိ တရုတ်ပြည်ခရီးစဉ် သွားရောက်ခဲ့ပြီး တရုတ်သမ္မတရှီနဲ့လည်း တွေ့ဆုံ ဆွေးနွေးခဲ့တာပါ။
နယ်စပ်ဒေသ စီမံခန့်ခွဲမှု၊ ကုန်သွယ်မှုဟာ အစိုးရနဲ့သာ သက်ဆိုင်ပြီး ဘယ်အဖွဲ့အစည်းနဲ့မှ မသက်ဆိုင်ကြောင်း တရုတ်နိုင်ငံ Phoenix သတင်းဌာနနဲ့ အင်တာဗျူးမှာ ထည့်သွင်း ပြောကြားခဲ့တာပါ။
မင်းအောင်လှိုင်ဟာ လူတွေရဲ့ အတွေးတွေကို ပြောင်းလဲဖို့ဆိုရင် ၁၅ နှစ်လောက် လုပ်မှရမယ်လို့ ပြောသွားတဲ့အတွက် တော်လှန်ရေးအင်အားစုတွေအနေနဲ့ မတိုက်ဘဲ နေလို့မရကြောင်း တရုတ်-မြန်မာအရေးလေ့လာသုံးသပ်သူ ဒေါက်တာလှကျော်ဇောက အာရက္ခတိုင်းမ်စ်ကို ပြောပါတယ်။
“ပြည်သူကတော့ အလျှော့ပေးတာ့မှာ မဟုတ်ဘူး။ ကျမတို့ ဒီတစ်ခေါက် လျှော့လိုက်ရင်လည်း တစ်သက်လုံး ဖြစ်တော့မှာလေ။ မင်းအောင်လှိုင် ပြောသွားတဲ့စကားထဲမှာ ပါတယ်။ လူ့ရဲ့ mindset ကို ပြင်ဖို့ဆိုတာ ၁ နှစ်၊ ၂ နှစ်နဲ့ မရဘူးတဲ့။ ၅ နှစ်၊ ၁၀ နှစ်လည်း မရဘူးတဲ့၊ ၁၅ နှစ်လောက် လုပ်မှ ရမယ်ဆိုတော့ မအေဘေးက ၁၅ နှစ်လောက် ဆက်နေမယ့်ပုံမျိုး ပြောသွားတာ။ အဲဒီတော့ စဉ်းစားကြည့် ကျမတို့က မတိုက်လို့ ဘယ်လိုလုပ်မလဲ ဒီကောင်ကို” လို့ သူက ပြောပါတယ်။
လက်ရှိမှာတော့ ရွေးတုအစိုးရကနေ တက်လာတဲ့ အယောင်ဆောင်သမ္မတတု မင်းအောင်လှိုင်ရဲ့ တရုတ်နဲ့ အိန္ဒိယခရီးစဉ်ပြီးနောက် ကချင်ပြည်နယ်က ဒေသအချို့မှာ စစ်ရေးတွေဟာ ပိုမိုပြင်းထန်လာသလို ရက္ခိုင်၊ ဧရာဝတီနဲ့ စစ်ကိုင်းဘက်တွေမှာလည်း စစ်ရေးလှုပ်ရှားမှုတွေကို မြင်တွေ့လာရပါတယ်။
