အာရက္ခတိုင်းမ်စ် (၂၉ ဇွန် ၂၀၂၆)
ရက္ခိုင်ပြည် အာရက္ခတပ်တော်ထိန်းချုပ်ထားတဲ့ ခရိုင် ၃ ခုတွင် လယ်သမား ၁ ဦးလျင် ဓာတ်မြေသြဇာ ၁၀ အိတ်ထိ ဂိုထောင်ဈေးနဲ့ အာရက္ခပြည်သူ့တော်လှန်ရေးအစိုးရ စိုက်ပျိုးရေးနှင့်မွေးမြူရေးဌာန၊ စိုက်ပျိုးရေးဌာနခွဲက ရောင်းချပေးနေတယ်လို့ သိရပါတယ်။
“ လယ်သမားတစ်ဦးလျှင် မြေသြဇာအိတ် ၁ အိတ်ကနေ ၁၀ အိတ်အထိ ထောက်ခံစာမလိုဘဲ ဝယ်ယူနိုင်ပြီး အိတ်ရေ (၁၀) အိတ်နဲ့အထက် ဝယ်ယူလိုပါက လယ်သမားတစ်ဦးဖြစ်ကြောင်း သက်ဆိုင်ရာ ရပ်/ကျေး အုပ်ချုပ်ရေးမှူးရဲ့ ထောက်ခံစာနဲ့သာ ဝယ်ယူနိုင်တယ်” လို့ စိုက်ပျိုးရေးဌာနခွဲထံက သိရပါတယ်။
အာရက္ခပြည်သူ့တော်လှန်ရေးအစိုးရ စိုက်ပျိုးရေးနှင့်မွေးမြူရေးဌာန၊ စိုက်ပျိုးရေးဌာနခွဲအနေနဲ့ ဓာတ်မြေသြဇာ ဖြန့်ဖြူးရောင်းချမှုကို မောင်တော၊ ဘူးသီးတောင်၊ ရသေ့တောင်၊ ပုဏ္ဏားကျွန်း၊ ကျောက်တော်၊ မြောက်ဦး၊ မင်းပြား၊ မြေပုံ၊ ပေါက်တော၊ ရမ်းဗြဲ၊ တောင်ကုတ် နဲ့ သံတွဲမြို့များတွင် အိန္ဒိယ Urea (အဖြူဓာတ်မြေဩဇာ တစ်အိတ်လျှင် ၉၅,၀၀၀ ကျပ်၊ အိန္ဒိယ DAP (အမဲဓာတ်မြေသြဇာ) တစ်အိတ်လျှင် ၂၀၀,၀၀၀ ကျပ်၊ သဘာဝမြေဩဇာ (၁၅ ကီလို) တစ်အိတ်လျှင် ၃၂,၀၀၀ ကျပ်နဲ့ ဂိုထောင်ထုတ် ဈေးနှုန်းအတိုင်း တိုက်ရိုက် ရောင်းချပေးနေတာလည်း ဖြစ်ပါတယ်။
စိုက်ပျိုးရေးဌာနခွဲအနေနဲ့ လယ်သမားတွေကို စပါးထွက်နှုန်း ကောင်းမွန်စေပြီး၊ စျေးနှုန်းသက်သာစွာ လယ်လုပ်ကိုင်နိုင်စေရန် ရည်ရွယ်ပြီး ဓာတ်မြေဩဇာအိတ်များအပါအဝင် သဘာမြေဩဇာအိတ်များကို စျေးနှုန်းသက်သာစွာနဲ့ လယ်သမားများထံ တိုက်ရိုက် ဖြန့်ဖြူး ရောင်းချပေးနေတာလည်း ဖြစ်ပါတယ်။
ရပ်ရွာအလိုက် လယ်သမားများ စုပေါင်းပြီး ဓာတ်မြေဩဇာ အိတ်ရေ (၁၂၀) နဲ့အထက် ဝယ်ယူပါက စိုက်ပျိုးရေးဌာနခွဲက သယ်ယူစရိတ် အခမဲ့ ပို့ဆောင်ပေးပြီး ငွေကြေးကျပ်တည်းကာ ရင်းနှီးစရိတ် အခက်အခဲ ဖြစ်နေတဲ့ ဆင်းရဲနွမ်းပါးတဲ့ လယ်သမားများအတွက် တစ်လဆိုင်းငံ့ အကြွေးစနစ်နဲ့လည်း ရောင်းချပေးနေတယ်လို့ သိရပါတယ်။
