အာရက္ခတိုင်းမ်စ် (၄ ဇူလိုင် ၂၀၂၆)
ရက္ခိုင်ပြည် မောင်တောမြို့နယ်တွင် ရွေးတုအစိုးရတပ်နဲ့ ARSA၊ RSO တို့ ထောင်ထားခဲ့တဲ့ မြေမြှုပ်မိုင်း ၃၅ လုံးကို အာရက္ခတပ်တော်က တစ်ရက်တည်း ရှင်းလင်းနိုင်ခဲ့တယ်လို့ သိရပါတယ်။
“မနေ့က ၃ ရက်နေ့ကပေါ့ လဘော်ဇားတံတားနားကနေပြီးတော့ ဂေါင်ညာရွာနားအထိ မိုင်းရှင်းလင်းရေးတွေ လုပ်တာမှာ မြေမြှုပ်မိုင်း ၃၅ လုံးကို ရှင်းလင်းပေးနိုင်ခဲ့တာ” လို့ မောင်တောမြို့နယ်ဒေသခံတစ်ဦးက အာရက္ခတိုင်းမ်စ်ကို ပြောပါတယ်။
အာရက္ခတပ်တော်အနေနဲ့ ရှင်းလင်းနိုင်ခဲ့တဲ့ မြေမြှုပ်မိုင်း အမျိုးအစားတွေကတော့ M-14 အမျိုးအစား မြေမြှုပ်မိုင်းတွေဖြစ်တယ်လို့ သိရပါတယ်။
ဇန်နဝါရီလ ၂၁ ရက် ကလည်း မောင်တောမြို့က ရွေးတုအစိုးရတပ် တပ်စွဲနေခဲ့တဲ့ အမှတ် (၇၆၆) တပ်ရင်းနေရာ၊ ကားလမ်းမနဲ့ မြကန်သာဆည်အနားတွင် စစ်ကျန် M-14 မိုင်း (၇၈) လုံးကို ရှင်းလင်းပေးခဲ့ပါတယ်။
အလားတူ အာရက္ခတပ်တော်က ၂၀၂၅ ခုနှစ် စက်တင်ဘာလ ၅ ရက် နဲ့ ၆ ရက် မှာ မောင်တောမြို့နယ်အတွင်းက မြေမြှုပ်မိုင်း ၁၂၈ လုံးကိုလည်း ရှင်းလင်းပေးခဲ့ပါတယ်။
စစ်ရေးအရ ရှုံးနိမ့်နေတဲ့ စစ်ကော်မရှင်ဟာ သူစစ်ရှုံးနယ်မြေတွေမှာ မြေမြှုပ်မိုင်း မြောက်များစွာကို မြှုပ်နှံထားခဲ့တာလည်း ဖြစ်ပါတယ်။
အာရက္ခတပ်တော်အနေနဲ့ မြေမြှုပ်မိုင်း၊ စစ်ကျန်လက်နက်အန္တရာယ်ပညာပေးဟောပြောပွဲများ၊ မိုင်းအန္တရာယ်ဆိုင်ရာ သတိပေးဆိုင်းဘုတ်များ၊ မိုင်းအန္တရာယ်ဆိုင်ရာအသိပညာပေး လက်ကမ်းစာစောင်ဖြန့်ဝေမှုများလည်း ဆက်လက် လုပ်ဆောင်ပေးနေတယ်လို့ သိရပါတယ်။
1 comment
I like this web blog so much, saved to my bookmarks.