အာရက္ခတိုင်းမ်စ် (၁၇ ဇွန် ၂၀၂၅)
ရက္ခိုင်ပြည် သံတွဲမြို့နယ်က ၃ နေရာကို စစ်ကောင်စီက လေယာဉ်နဲ့ ဗုံးလာကြဲလို့ ဒဏ်ရာရရှိသူတွေထဲက ၁ ဦး ထပ်မံသေဆုံးသွားတယ်လို့ သိရပါတယ်။
၂၀၂၅ ခုနှစ် ဇွန်လ ၇ ရက် ည ၁၀ နာရီကျော်တွင် သံတွဲမြို့ကို စစ်ကောင်စီက လေကြောင်းကနေ ဗုံးကြဲတိုက်ခိုက်တာကြောင့် ပြည်သူ ၄ ဦး သေဆုံးပြီး ၁၀ ဦးထက်မနည်း ထိခိုက်ဒဏ်ရာရရှိခဲ့ပါတယ်။
အဆိုပါ ဒဏ်ရာရရှိသူတွေထဲက အသက် ၄၂ နှစ်အရွယ် ဒေါ်တင်တင်ဝင်းဟာ ဆေးကုသနေစဉ် ဇွန်လ ၁၄ ရက် မနက် ၆ နာရီကျော်တွင် ဒဏ်ရာပြင်းထန်လို့ သေဆုံးသွားတယ်လို့ သိရပါတယ်။
ညီနောင်မဟာမိတ် ၃ ဖွဲ့က ဖော်ဆောင်တဲ့ ၁၀၂၇ စစ်ဆင်ရေးအတွင်း အာရက္ခတပ်တော် (AA) က ရက္ခိုင်ပြည် နဲ့ ချင်းပြည်အတွင်းရှိ မြို့နယ်အများအပြားအပါအဝင် တိုင်းစစ်ဌာနချုပ် တစ်ခုကို သိမ်းပိုက်ရရှိခဲ့ပါတယ်။
အဲဒီနောက် စစ်ကောင်စီဟာ အာရက္ခတပ်တော် သိမ်းပိုက်ထားတဲ့ မြို့နယ်တွေကို မကြာခဏ ဆိုသလို လေကြောင်းတိုက်ခိုက်မှု၊ လက်နက်ကြီး ပစ်ခတ်မှုတွေ လုပ်ဆောင်နေတယ်လို့ သိရပါတယ်။
7 comments