ဒေါက်တာအေးမောင်ကို မအလ က လွတ်ငြိမ်းချမ်းသာခွင့်ပေး

by Rakhita Timesစက်တင်ဘာ 11, 2025စက်တင်ဘာ 11, 202553 392

အာရက္ခတိုင်းမ်စ် (၁၁ စက်တင်ဘာ ၂၀၂၅)

ပြီးခဲ့တဲ့ NLD အစိုးရလက်ထက်မှာ ရခိုင့်ဦးဆောင့်ပါတီ (AFP) ဥက္ကဋ္ဌ ဒေါက်တာအေးမောင် အပေါ် စွဲထားတဲ့ ပြစ်မှုတွေအားလုံးကို လွတ်ငြိမ်းချမ်းသာခွင့် ပြုလိုက်တယ်လို့ စစ်ခေါင်းဆောင်က ၂၀၂၅ ခုနှစ်၊ စက်တင်ဘာ ၁၁ ရက်မှာ ထုတ်ပြန်လိုက်ပါတယ်။

ပြီးခဲ့တဲ့ NLD အစိုးရလက်ထက် ၂၀၁၈ ခုနှစ်အတွင်းက ရက္ခိုင်ပြည်၊ မြောက်ဦးမြို့မှာ ပြုလုပ်တဲ့ ဟောပြောပွဲတစ်ခုမှာ ဟောပြောချက်တွေကြောင့် စစ်တွေခရိုင်တရားရုံးကနေ ပြီးခဲ့တဲ့ ၂၀၁၉ ခုနှစ်တုန်းက နိုင်ငံတော်ပုန်ကန်မှု ပုဒ်မ ၁၂၂၊ နိုင်ငံတော်အကြည်ညိုပျက်စေမှု ပုဒ်မ ၅၀၅ (ခ) တို့နဲ့ ထောင်အနှစ် ၂၀ ချမှတ်ခဲ့တာ ဖြစ်ပါတယ်။

ဒါပေမယ့်၂၀၂၁ ခုနှစ် ဖေဖော်ဝါရီ ၁၂ ရက်ပြည်ထောင်စုနေ့မှာပဲ အာဏာသိမ်းထားတဲ့ စစ်ခေါင်းဆောင်က သူ့ကို လွတ်ငြိမ်းချမ်းသာခွင့်ပေးခဲ့ပါတယ်။

ဒေါက်တာအေးမောင်ဟာ ပြည်ထောင်စုမပြိုကွဲရေး၊ တိုင်းရင်းသားစည်းလုံးညီညွတ်မှုမပြိုကွဲရေး၊ အချုပ်အခြာအာဏာတည့်တံခိုင်မြဲရေးဆိုတဲ့ နိုင်ငံတော်ဦးတည်ချက်တွေကို စွဲမြဲစွာ စောင့်ထိန်းသွားမယ်လို့ သန္နိဌာန်ပြုပြီး ဒီမိုကရေစီနဲ့ ဖက်ဒရယ်စနစ်ကို အခြေခံတဲ့ ပြည်ထောင်စုတည်ဆောက်ရာမှာ တစ်တပ်တအားပါဝင်ဆောင်ရွက်ဖို့ ကတိကဝတ်ပြုထားတာကြောင့် သူ့ကို ပြစ်မှုစီရင်ထားတဲ့ ပြစ်မှုနဲ့ ပြစ်ဒဏ်တွေကို စစ်ခေါင်းဆောင်က လွတ်ငြိမ်းချမ်းသာခွင့် ပြုလိုက်တာ ဖြစ်ပါတယ်။

လက်ရှိ ထုတ်ပြန်ခဲ့တဲ့ လွတ်ငြိမ်းချမ်းသာခွင့်ကြောင့် ဒေါက်တာအေးမောင်ဟာ လွှတ်တော်ကိုယ်စားလှယ်အဖြစ်ဝင်ရောက်ယှဥ်ပြိုင်ခွင့်လည်း ရရှိမှာလည်း ဖြစ်ပါတယ်။

ဒေါက်တာအေးမောင်က ရက္ခိုင်ပြည်၊ စစ်တွေခရိုင် မဲဆန္ဒနယ်ကနေ အမျိုးသားလွှတ်တော်ကိုယ်စားလှယ်အဖြစ် ဝင်ရောက်အရွေးခံရန်မယ်လို့လည်း သိရပါတယ်။