အာရက္ခတိုင်းမ်စ် (၁၉ ဇန်နဝါရီ ၂၀၂၆)
ရက္ခိုင်ပြည် စစ်တွေနဲ့ ကျောက်ဖြူကို လေယာဉ်ပြေးဆွဲမှုတွေရှိပေမယ့် ခရီးသွားလာမှု ရှားပါးနေတယ်လို့ ခရီးသွားအေဂျင်စီတွေက ဆိုပါတယ်။
စစ်တွေနဲ့ ရန်ကုန်ကို နေ့စဉ် လေယာဉ်ပြေးဆွဲမှုရှိနေပြီး ကျောက်ဖြူဘက်ကိုတော့ လေယာဉ်ပြေးဆွဲမှု နေ့စဉ်မရှိဘူးလို့ သိရပါတယ်။
“ ထွက်တယ်။ ဈေးက စစ်တွေ – ရန်ကုန်ဆို အသက်သာဆုံးက ၄ သိန်း ၂ သောင်း။ နေ့တိုင်းရှိတယ်။ ကျောက်ဖြူဘက်ကတော့ နေ့တိုင်းမရှိဘူး။ ဒါပေမယ့် အသွားတော့ နည်းတယ်။ အမတောင် ကျောက်ဖြူဘက်ကို လက်မှတ်မဖြတ်တာ ကြာပြီ။ ၆ သိန်း နဲ့ ၁ သောင်း ရှိတယ် အရင်တုန်းကတော့။ ဈေးကလေ လေယာဉ်ကတော့ တစီးနဲ့တစီးတော့ မတူဘူး။ ဈေးက ၄ သိန်း ၂ သောင်း ရှိတယ်။ ၄ သိန်း ၈ သောင်းကျော် ရှိတယ်။ ၅ သိန်းကျော် ရှိတယ် အဲ့ဒီလိုမျိုးပေါ့။ စစ်တွေ-ရန်ကုန်ကတော့ ပုံမှန်လိုပါပဲ။ ရန်ကုန်-စစ်တွေပဲ တက်တာ။ အခုက ခရီးသွားတွေက အရင်ထပ်စာရင် သိပ်မရှိဘူး” လို့ ခရီးသွားအေဂျင်စီတခုက အာရက္ခတိုင်းမ်စ်ကို ပြောပါတယ်။
လက်တလောမှာတော့ ရက္ခိုင်ပြည်၊ စစ်တွေနဲ့ ကျောက်ဖြူမြို့ အပြင် ရက္ခိုင်ပြည် နယ်စပ်ဒေသ ၃ ခု မှာလည်း စစ်ကော်မရှင်နဲ့ အာရက္ခတပ်တော်တို့အကြား တိုက်ပွဲတွေ ပြင်းထန်လျက် ရှိပါတယ်။
အဆိုပါ တိုက်ပွဲများကြောင့် ဒေသခံပြည်သူတွေဟာ ဘေးလွတ်ရာသို့ တိမ်းရှောင်နေရပြီး ကျောက်ဖြူမြို့နယ်မှာ စစ်ဘေးရှောင် ၂၅,၀၀၀ ခန့်၊ ရမ်းဗြဲမြို့နယ်မှာ ကျောက်ဖြူ စစ်ဘေးရှောင် ၈၀၀၀ ခန့် နဲ့ တောင်ကုတ်မြို့နယ်မှာ ကျောက်ဖြူ စစ်ဘေးရှောင် ၅၀၀၀ ခန့် ရှိတယ်လို့ သိရပါတယ်။
