အာရက္ခတိုင်းမ်စ် (၂၀ ဇန်နဝါရီ ၂၀၂၆)
ရက္ခိုပြည်၊ အမ်းမြို့နယ်တွင် ဇန်နဝါရီလ ၁၉ ရက်၊ ညနေ ၄ နာရီခွဲခန့်တွင် စစ်ကျန်ဗုံးတလုံး ပေါက်ကွဲခဲ့လို့ ကလေးငယ် ၁ ဦး သေဆုံးခဲ့တယ်လို့ ဒေသခံတွေက ဆိုပါတယ်။
“ဆော့ကစားရင်းနဲ့ ငှက်ပျော်ခင်းဖက်ရောက်သွားတာ။ အဲဒီမှာ စစ်ကျန်ဗုံးပေါက်ကွဲပြီး ဆုံးသွားတာ” လို့ အမ်းမြို့နယ်ဒေသခံတဦးက အာရက္ခတိုင်းမ်စ်ကို ပြောပါတယ်။
စစ်ကော်မရှင်ရဲ့ စစ်ကျန်ဗုံးကြောင့် သေဆုံးသွားသူမှာ ရက္ခိုင်ပြည် အမ်းမြို့နယ် ဆီဆိုင်ကုန်း အောက်ရွာနေ အသက် ၈ နှစ်အရွယ် မောင်မင်းထက်သာ ဖြစ်တယ်လို့ သိရပါတယ်။
ရက္ခိုင်ပြည်တွင် စစ်ရေးအရ ရှုံးနိမ့်သွားတဲ့ စစ်ကော်မရှင်ဟာ သူစွန့်ခွာသွားတဲ့ နယ်မြေတွေမှာ မြေမြှုပ်မိုင်းများစွာ မြှုပ်နှံထားခဲ့ပြီး အာရက္ခတပ်တော်အနေနဲ့ မိုင်းရှင်းလင်းရေးနဲ့ မိုင်းအန္တရာယ် အသိပညာပေးများ လုပ်ဆောင်နေတယ်လို့ သိရပါတယ်။
