စစ်တွေအကျဉ်းထောင်တွင် နိုင်ကျဉ်း နှစ်ဦး ဆေးကုသခွင့်မရလို့ သေဆုံး

အာရက္ခတိုင်းမ်စ် (၃၁ ဇန်နဝါရီ ၂၀၂၆)

ရက္ခိုင်ပြည်၊ စစ်တွေအကျဉ်းထောင်တွင် နိုင်ငံရေးအကျဉ်းသား နှစ်ဦး ဆေးကုသခွင့်မရတဲ့အတွက် သေဆုံးခဲ့တယ်လို့ Justice Network For Political Prisoners (JNPP) က ထုတ်ပြန်ထားပါတယ်။

သေဆုံးခဲ့သူတွေကတော့ ပုဒ်မ ၁၇ (၁)၊ ပုဒ်မ ၅၂ (က)၊ ပုဒ်မ ၅၀၅ တို့နဲ့ ထောင်ဒဏ် အနှစ် (၄၀) ချမှတ်ခံထားရသူ အသက် ၄၂ နှစ်အရွယ် နိုင်ငံရေးအကျဉ်းသား ကိုသိန်းထွန်းစိန်၊ ပုဒ်မ ၁၇(၁) နဲ့ ထောင်ဒဏ် (၃) နှစ် ချမှတ်ခံထားရသူ အသက် ၃၂ နှစ်အရွယ် နိုင်ငံရေးအကျဉ်းသူ မစောတင်မေ တို့ပဲ ဖြစ်ပါတယ်။

ကိုသိန်းထွန်းစိန်ဟာ ဗိုက်အောင့်ဝေဒနာကို ကြာမြင့်စွာ ခံစားနေခဲ့ရပြီး ဆေးကုသခွင့်မရခဲ့တာကြောင့် ဝေဒနာမှာ ပိုမိုဆိုးရွားလာပြီး မသေဆုံးမီ ရက်ပိုင်းအတွင်း ဝမ်းဗိုက်မှာ မခံမရပ်နိုင်အောင် အောင့်လာခြင်း၊ အော့အန်ခြင်းအပြင် ဝမ်းဗိုက်သိသိသာသာ ဖောင်းတက်လာခြင်းအထိ ဝေဒနာခံစားခဲ့ရတာဖြစ်တယ်လို့ JNPP က ဆိုပါတယ်။

ဒီလို ဝေဒနာခံစားနေရပေမယ့် အာဏာပိုင်အဖွဲအစည်းနဲ့ အကျဉ်းထောင် တာဝန်ခံတွေက ဆေးကုသခွင့် မပေးခဲ့ဘဲ ၂၀၂၅ ခုနှစ်၊နိုဝင်ဘာလ ၁၈ ရက်တွင် အဆိုးဝါးဆုံးအခြေအနေ ရောက်ရှိလာချိန်မှသာ ဆေးရုံကို အရေးပေါ်ပို‌့ဆောင်ခဲ့ပေမယ့် ဆေးရုံရောက်တဲ့အချိန်မှာပဲ သေဆုံးခဲ့ရတာ ဖြစ်ပါတယ်။

အလားတူပဲ မစောတင်မေဟာလည်း စစ်ကြောရေးက ရရှိခဲ့တဲ့ ဒဏ်ရာတွေကို အကျဉ်းထောင်အတွင်း ကုသခွင့်မရရှိခဲ့တာကြောင့် အဆိုပါ ဒဏ်ရာများကြောင့် ၂၀၂၅ ခုနှစ် (ရက်အတိအကျမသိရှိရ) အတွင်းမှာ စစ်တွေအကျဉ်းထောင်တွင်းမှာပဲ သေဆုံးခဲ့တယ်လို့ JNPP က ဆိုပါတယ်။

“ စစ်ကောင်စီ လက်ပါးစေများရဲ့ ကျူးလွန်မှုတွေကို မှတ်တမ်းအဖြစ် ထိန်းသိမ်းထားပြီး နောင်တချိန်မှာ မိမိတို့ရဲ့ ကျူးလွန်မှုတွေအတွက် အပြည့်အဝ တာဝန်ယူရမှာဖြစ်ပြီး ၎င်းတို့၏ ကျူးလွန်မှုတွေကို ထိရောက်စွာ အရေးယူ ဆောင်ရွက်နိုင်အောင် ကြိုးစားသွားမှာ ဖြစ်တယ်” လို့ JNPP က ဆိုထားပါတယ်။

Justice Network For Political Prisoners (JNPP) အနေနဲ့ စစ်အာဏာရှင်ရဲ့ လက်ပါးစေတွေဖြစ်တဲ့ စစ်တွေအကျဉ်းထောင် တာဝန်ခံနဲ့ အရာရှိ၊ ဝန်ထမ်းများဟာ နိုင်ငံရေးအကျဉ်းသားများအပေါ် အသက်သေဆုံးတဲ့အထိ ဆေးကုသခွင့် မပေးဘဲ ရည်ရွယ်ချက်ရှိရှိ လူအခွင့်အရေး ချိုးဖောက်နေကြခြင်းကို ဆက်လက်ဖော်ထုတ်သွားမှာဖြစ်တယ်လို့လည်း ထုတ်ပြန်ထားပါတယ်။