အာရက္ခတိုင်းမ်စ် (၁၇ မတ် ၂၀၂၆)
အာရက္ခတပ်တော်နဲ့ ပူးပေါင်းမဟာမိတ်တပ်တို့ရဲ့ ထိုးစစ်ကို ခုခံရန်အတွက် ဆုံကုန်းအမြောက်တပ် (အမြောက်စစ်ဆင်ရေးကွပ်ကဲမှုဌာနချုပ်) ကို စစ်ကူနဲ့ လက်နက်ခဲယမ်း အများအပြား ဖြည့်တင်းထားတယ်လို့ သိရပါတယ်။
အဆိုပါ ဆုံကုန်းအမြောက်တပ်ဟာ နတ်ရေကန်ဗျူဟာကုန်းမကျစေရေးအတွက် လက်နက်ကြီးနဲ့ ပစ်ကူပေးနေတဲ့ နေရာတခုလည်း ဖြစ်ပါတယ်။
“ ကျနော် သိရသလောက်တော့ ပဒါန်းတက်ကနေ စစ်ကူပို့ပေးတဲ့ စစ်ယာဉ်တန်း နဲ့ လက်နက်ခဲယမ်းတွေ မစခ – ၉၀၅ (အမြောက်စစ်ဆင်ရေးကွပ်ကဲမှုဌာနချုပ်) ကို ရောက်သွားပြီ။ ပစ်ကူပေးဖို့နဲ့ ခံစစ်လုပ်ဖို့ပေါ့” လို့ မြေပြင်စစ်ရေးလေ့လာသုံးသပ်သူတဦးက အာရက္ခတိုင်းမ်စ်ကို ပြောပါတယ်။
နတ်ရေကန်ဗျူဟာကုန်း မကျစေရေးအတွက် စစ်ကူနဲ့ လက်နက်ခဲယမ်းများကို အမြောက်စစ်ဆင်ရေးကွပ်ကဲမှုဌာနချုပ်ကနေ ပဇီရွာနဲ့ ဂုတ်ကြီးရွာဘက်က ပို့ဆောင်ပေးနေပေမယ့် အာရက္ခတပ်တော်နဲ့ ပူးပေါင်းမဟာမိတ်တပ်တို့ရဲ့ ပိတ်ဆို့တိုက်ခိုက်မှုကြောင့် အကျအဆုံးများကာ ရှေ့တို့းမရဘဲ နောက်ပြန်ဆုတ်သွားတယ်လို့ စစ်ရေးသတင်းရင်းမြစ်က ဆိုပါတယ်။
ရက္ခိုင် – မကွေးအစပ်ရှိ အမ်း – ပဒါန်းလမ်းပိုင်းက မထုံး၊ လင်းတဲ၊ စွန်တက် ၊ ဂုတ်စည်း ၊ ကံမြင့်ကန်၊ ဂုတ်ကြီး၊ ကြက်ရေစမ်း၊ ပိန်ရေစမ်းနဲ့ ပဇီကျေးရွာတွေကိုလည်း အာရက္ခတပ်တော် နဲ့ ပူးပေါင်းမဟာမိတ်တပ်တွေက သိမ်းပိုက်ထိန်းချုပ်ထားပြီး ဖြစ်ပါတယ်။
စစ်ကော်မရှင်ရဲ့ နတ်ရေကန်ဗျူဟာကုန်းကို အာရက္ခတပ်တော်၊ ချင်းကာကွယ်ရေးတပ်၊ အရှိုချင်းကာကွယ်ရေးတပ်၊ မကွေးတိုင်း အခြေစိုက် PDF တပ်ရင်းများ၊ ကျောင်းသားလက်ရုံးတပ်တော် (SAF)၊ ပြည်သူ့လွတ်လပ်ရေးတပ်တော် (PIA)၊ လူထုတော်လှန်ရေး မဟာမိတ်အင်အားစု PRA (မကွေး) တပ်များ ပူးပေါင်းပြီး ထိုးစစ်ဆင်နေတာလို့လည်း သိရပါတယ်။
