စကမဟာ အပြောပဲရှိတဲ့အတွက် ပြဿနာက ဘယ်တော့မှ ဖြေရှင်းနိုင်မှာမဟုတ်

အာရက္ခတိုင်းမ်စ် (၁၇ မတ် ၂၀၂၆)

စစ်ကော်မရှင်ဟာ လက်ရှိ မြန်မာ့နိုင်ငံရေး အခင်းအကျင်းနဲ့ပတ်သက်ပြီး ငြိမ်းချမ်းရေး၊ တွေ့ဆုံ ဆွေးနွေးရေးတွေဟာ အပြောပဲရှိပြီး လက်တွေ့လုပ်ပြတာမရှိတဲ့အတွက် တိုင်းပြည်ပြဿနာကို ဘယ်တော့မှ ဖြေရှင်းနိုင်မှာမဟုတ်ဘူးလို့ တိုင်းရင်းသားနိုင်ငံရေးလေ့လာသုံးသပ်သူတဦးက အာရက္ခတိုင်းမ်စ်ကို ပြောပါတယ်။

“ပြောရမယ်ဆိုရင် ဒီအာဏာသိမ်းစစ်တပ်က အပြောကတော့ ကောင်းတာပေါ့။ ဒါပေမယ့် လက်တွေ့လုပ်တဲ့နေရာမှာ ငါ့နောက်လိုက်မှ၊ ငါ့စကားနားထောင်မှ အနေအထားဖြစ်တယ်လေ။ ဒို့တာဝန်အရေးသုံးပါးမှာလည်း ပါတယ်။ တိုင်းရင်းသားစည်းလုံးညီညွတ်ရမယ်ဆိုတဲ့ဟာက အမှန်က စည်းလုံးညီညွတ်လို့ ပြည်ထောင်စုကို တည်ဆောက်နိုင်တာလေ။ သူတို့က အာဏာဆက်တိုက် ဆက်တိုက် သိမ်းလို့သာ စည်းလုံးညီညွတ်မှုက ပြိုကွဲတယ်။ မပြိုကွဲရင်လည်း သူတို့က သွေးခွဲပြီးတော့မှ သပ်လျှိုဖြိုခွဲတယ်။ အဲဒီလိုအနေအထားဆိုတော့ ဒါက အပြောနဲ့ အလုပ်ကတော့ အာဏာရှိတဲ့သူတွေ၊ အာဏာရှင်တွေ ခေတ်အဆက်ဆက် သုံးနေကြ အသုံးအနှုန်းပေါ့။ လက်တွေ့နဲ့တော့ မညီညွတ်ပါဘူး။ အဖက်ဖက်က တိုင်းပြည်အတွက် တကယ်စေတနာရှိလို့ ရှိရင်တော့ သေချာအသံတွေ နားထောင်ရမယ်။ ဥပမာ ဒီနိုင်ငံရေးပါတီတွေရဲ့ အသံတွေ နားထောင်ရမယ်။ ဒေသတခုလုံးမှာ ပျံ့နှံ့နေထိုင်နေတဲ့ တိုင်းရင်းသားလူမျိုးစုတွေရဲ့ အသံတွေ နားထောင်ရမယ်။ မတူကွဲပြားမှုတွေကို ဘယ်လိုမျိုး စုပေါင်းပြီးတော့မှ တိုင်းပြည်တိုးတက်ရာ တိုးတက်ကြောင်း အခွင့်အလမ်းဖြစ်အောင် လုပ်မလဲဆိုတဲ့ စဉ်းစားချက်တွေ အကောင်အထည်ဖော်မှသာလျှင် တကယ့်ဖြစ်နေတဲ့ နိုင်ငံရေးပြဿနာကို ဖြေရှင်းနိုင်မှာပေါ့။ အခုက အပြောပဲရှိတယ်၊ အလုပ်ကမရှိဘူး ဆိုတော့ ပြဿနာက ဘယ်တော့မှ ဖြေရှင်းနိုင်မှာမဟုတ်ဘူးပေါ့” လို့ သူက ပြောပါတယ်။

စစ်ခေါင်းဆောင်ဟာ စစ်ပွဲတိုင်း၊ လက်နက်ကိုင် ပဋိပက္ခတိုင်း နိုင်ငံရေးနဲ့ မလွတ်ကင်းတဲ့အတွက် နိုင်ငံရေးနည်းလမ်းနဲ့ အဖြေရှာရမှာဖြစ်တယ်လို့ ၂၀၂၆ ခုနှစ်၊ မတ်လ ၁၃ ရက်က မြန်မာ့မျက်နှာစာသစ်ဖိုရမ် အဖွင့်မိန့်ခွန်းမှာ ပြောကြားခဲ့ပါတယ်။

ပြီးတော့ စစ်တပ်ဟာ နိုင်ငံရေးအပြောင်းအလဲကို အောင်အောင်မြင်မြင် ဆောင်ရွက်နိုင်ခဲ့ကြောင်းနဲ့ လက်နက်ကိုင် ပဋိပက္ခတွေနဲ့ ပြည်တွင်းငြိမ်းချမ်းရေးမရသေးတာဟာ ပြည်တွင်း၊ ပြည်ပ သွေးထိုးနှောင့်ယှက်မှုတွေကြောင့် ဖြစ်တယ်လို့လည်း ဆိုပါတယ်။

ဒါ့အပြင် မတ်လ ၁၀ ရက်က အာဏာသိမ်းမှု ၅ နှစ်တာကာလကို ပြန်လည်သုံးသပ်တဲ့ အခမ်းအနားမှာလည်း မြန်မာနိုင်ငံ ငြိမ်းချမ်းရေးအတွက် ပြည်သူလူထုအကျိုးကို ရှေးရှုပြီး ဖြစ်ချင်တာထက် ဖြစ်သင့်တာကိုသာ ဆောင်ရွက်ကြဖို့ စစ်ခေါင်းဆောင်က ပြောဆိုခဲ့တာပါ။

၅ နှစ်တာကာလအတွင်း စစ်ခေါင်းဆောင်ဟာ သူ့အလိုကို လိုက်တဲ့ နိုင်ငံရေးပါတီတွေ အင်အားမရှိတဲ့ NCA လက်မှတ်ထိုးထားတဲ့ လက်နက်ကိုင် ၇ ဖွဲ့တို့နဲ့သာ ငြိမ်းချမ်းရေးဖိုရမ်တွေ၊ တွေ့ဆုံဆွေးနွေးတာကို လုပ်ဆောင်ခဲ့တာပါ။

မြေပြင်မှာ တိုက်ပွဲဝင်နေတဲ့ လက်နက်ကိုင်အဖွဲ့အစည်းအချို့ကိုလည်း တရုတ်အားကိုးပြီး အပစ်ရပ်ထားတာကလွဲရင် ကျန်တဲ့ တိုင်းရင်းသားလက်နက်ကိုင်တပ်ဖွဲ့တွေနဲ့တော့ တစုံတရာ ဆွေးနွေးမှုတွေ မရှိသေးပါဘူး။