ကျောက်ထုအမြောက်တပ်ကို လက်နက်ခဲယမ်းတွေ အဆမတန်ပို့ဆောင်ပြီး ကံကြီးတွင် အထိုင်ချရန် လုပ်ဆောင်နေ

အာရက္ခတိုင်းမ်စ် (၂ မေ ၂၀၂၆)

ရက္ခိုင်ပြည်ရဲ့ ဝင်ပေါက် ထွက်ပေါက်တခုဖြစ်တဲ့ မကွေးတိုင်း ဂန့်ဂေါ်ခရိုင် ဆောမြို့နယ်က ကံကြီးကျေးရွာတွင် စစ်ကော်မရှင်က အထိုင်စခန်းဖွင့်ထားပြီး ကျောက်ထုအမြောက်တပ်ကို လက်နက်ခဲယမ်းတွေ အဆမတန် ဖြည့်တင်းနေတယ်လို့ သိရပါတယ်။

“ စစ်ကော်မရှင်ဟာ ကျောက်ထုမြို့ အမှတ် (၃၆၈) အမြောက်တပ်ထဲကို လေယာဉ်တွေနဲ့ ထောက်ပို့မှုတွေ ဆက်တိုက် လုပ်ဆောင်နေပါတယ်။ ဧပြီလ ၃၀ ရက်နေ့ နေ့လည် ၁ နာရီကျော်မှာ မကွေးလေတပ်က တက်လာတဲ့ Y-12 လေယာဉ်တစီးဟာ ရိက္ခာနဲ့ ခဲယမ်းထုပ်တွေကို လေထီးတွေနဲ့ ၈ ကြိမ်ခန့် ချပေးခဲ့တယ်” လို့ ယောအလင်းတန်းက ဆိုပါတယ်။

အလားတူ စစ်ကော်မရှင်တပ်ဟာ ဧပြီလ ၃၀ ရက်မှာပဲ မင်းတပ်နဲ့ ကျောက်ထုအစပ် နေရာတွေကို ဂျက်ဖိုက်တာ ၅ စီးနဲ့ ၁၀ ကြိမ်ထက်မနည်း ဗုံးကြဲတိုက်ခိုက်ခဲ့တယ်လို့ သိရပါတယ်။

ဧပြီလ ၂၆ ရက်က စစ်ကော်မရှင်တပ်သားအင်အား ၅၀၀ ခန့်ပါတယ် ယာဉ်တန်းဟာ ပြင်ဦးလွင်ကနေ မိတ္ထီလာ၊ ကျောက်ပန်းတောင်း ကတဆင့် ဆိပ်ဖြူ-ပေါက်လမ်း ဆယ်မိုင်လမ်းဆုံကို ရောက်ရှိနေပြီးတော့ ဆောမြို့နယ်ကို ဦးတည်လာနိုင်တယ်လို့ စစ်ရေးလေ့လာသုံးသပ်သူတွေက ဆိုပါတယ်။

လက်ရှိမှာ ကျောက်ထုအမြောက်တပ်ထဲကို လက်နက်ခဲယမ်းတွေ ထပ်မံရောက်ရှိနေတာကြောင့် အနီးနား ပတ်ဝန်းကျင်တွေကို လက်နက်ကြီးတွေနဲ့ ရမ်းသမ်းပစ်ခတ်လာနိုင်တဲ့အပြင်၊ လေကြောင်းတိုက်ခိုက်မှုတွေလည်း ဆက်ရှိနေနိုင်တာကြောင့် ယောနယ်နဲ့ ချင်းပြည်တောင်ပိုင်းက မိဘပြည်သူတွေအနေနဲ့ လေကြောင်းရန်ကို နေ့ရောညပါ အထူးသတိထားနေထိုင်ကြဖို့ ယောအလင်းတန်း က တိုက်တွန်း နှိုးဆော်ထားပါတယ်။