အာရက္ခတိုင်းမ်စ် (၁၄ မေ ၂၀၂၆)
စစ်ကော်မရှင်အနေနဲ့ ရက္ခိုင်ပြည် တောင်ပိုင်းကို စစ်ရေးပြနေတာဟာ စစ်မြှူတာသာဖြစ်ပြီး တကယ် ထိုးစစ်ဆင်နိုင်တာက မင်းတပ်ကနေ ပလက်ဝကိုသာဖြစ်နိုင်တယ်လို့ စစ်ရေးလေ့လာသုံးသပ်သူတွေက ပြောပါတယ်။
“သံတွဲနဲ့ ဂွမှာဆိုရင် ကမ်းခြေနားကို စစ်သင်္ဘောနဲ့ ကပ်လာလိုက်၊ ရေထဲကနေ လက်နက်ကြီးနဲ့ ပစ်လိုက် လုပ်နေတာ နှစ်ချီလာပြီ။ ဘာမှ ရှေ့ဆက်ဖြစ်မလာဘူး။ အဲဒီမှာ တိုးမရတော့ တောင်ကုတ်နဲ့ ရမ်းဗြဲဖက်ကို လှည့်လာတယ်။ ဒါလည်း အလုပ်မဖြစ်ဘူး။ အခုလည်း ကွင်းကောက်ကနေ စစ်ကြောင်းထိုးဖို့ ပြင်ဆင်နေတယ်။ ဒါကလည်း စစ်မြှူတာပဲ ဖြစ်နိုင်ပါတယ်” လို့ စစ်ရေးလေ့လာသုံးသပ်သူတဦးက အာရက္ခတိုင်းမ်စ်ကို ပြောပါတယ်။
လက်ရှိမှာ စစ်ကော်မရှင်က ဧရာဝတီတိုင်း အင်္ဂပူမြို့နယ် ကွင်းကောက်မြို့ရှိ တပ်မတော်တန်းမြင့်လေ့ကျင့်ရေးသင်တန်းကျောင်း (တတက-၅) ကို ခံစစ်စခန်းအသွင်ပြောင်းပြီး စစ်အင်အား ထောင်ချီဖြည့်တင်းကာ ရက္ခိုင်ပြည်တောင်ပိုင်းကို ထိုးစစ်ဆင်ရန် ပြင်ဆင်နေတာလည်း ဖြစ်ပါတယ်။
ရက္ခိုင်တောင်ပိုင်းကို စစ်ကော်မရှင်က ထိုးစစ်ဆင်ရန် ပြင်ဆင်နေချိန်မှာ အာရက္ခတပ်တော်နဲ့ ပူးပေါင်းမဟာမိတ်တပ်တွေဟာ ဧရာဝတီတိုင်း ရေကြည်မြို့နယ် ဂွ – ငသိုင်းချောင်းလမ်း မြောက်စမ်းရွာအနီးရှိ အမြောက်တပ် အမတ ၃၄၄ ကို ပြန်လည်ထိုးစစ်ဆင် တိုက်ခိုက်နေတာလည်း ဖြစ်ပါတယ်။
“တကယ့်တကယ်တန်း အခု ထိုးစစ်တွေတကယ်ထိုးနေတာက ယောနယ်ကိုလေ၊ ကံကြီးမှာလည်း အခိုင်အမာ ခံစစ်စခန်းဆောက်ထားပြီ။ အင်အားလည်း နောက်ထပ် ထောင်ချီပြီးပို့နေတယ်။ သူတို့က (စစ်ကော်မရှင်) မင်းတပ်-မတူပီ-ပလက်ဝ လမ်းကြောင်းကို ထိုးမယ်လို့တော့ မှန်းရတယ်” လို့ သူက အာရက္ခတိုင်းမ်စ်ကို ဆက်ပြောပါတယ်။
စစ်ကော်မရှင်ဟာ မကွေးတိုင်း တောင်ယောဒေသအတွင်းကို မေလ ၁၂ ရက်က စတင်ကာ လောင်းရှည်မြို့ အခြေစိုက် ကပစ (၂၅) ကနေ စစ်ကား ၁၇ စီး၊ အင်အား ၅၀၀ ဝန်းကျင် ပါရှိတဲ့ စစ်ကြောင်းတကြောင်းဟာ ဆောမြို့ဘက်ကို ဦးတည်ထွက်ခွာသွားပြီး ပေါက်မြို့နယ် ကပစ (၂၄) ကနေလည်း အင်အား ၅၀၀ ဝန်းကျင် ပါရှိတဲ့ စစ်ကြောင်းတကြောင်းလည်း ကျောက်ထုမြို့ဘက်ကို ဦးတည်ထွက်ခွာလာနေတယ်လို့ ယောအလင်းတန်းက ထုတ်ပြန်ထားပါတယ်။
စစ်ကော်မရှင်က ထိုးစစ်ဆင်လာလို့ ကျောက်ထု – ပေါက် လမ်းပိုင်းနဲ့ ဆော – လောင်းရှည် လမ်းပိုင်းများပေါ်တွင် ဖြတ်သန်းသွားလာခြင်း မပြုဘဲ ဘေးကင်းရာ နေရာများတွင် သတိရှိရှိ နေထိုင်ကြရန်လည်း ပြည်သူတွေကို ယောအလင်းတန်းက အသိပေးထားပါတယ်။
