အာရက္ခတိုင်းမ်စ် (၁၅ မေ ၂၀၂၆)
အာရက္ခတပ်တော် (AA) ရဲ့ ခေါင်းဆောင်ဖြစ်တဲ့ ဗိုလ်ချုပ်ထွန်းမြတ်နိုင် ပြောတဲ့အတိုင်း ၂၀၂၆ ခုနှစ်နဲ့ ၂၀၂၇ ခုနှစ်အတွင်း ကျန်ရှိတဲ့ ၃ မြို့ကို သိမ်းပိုက်ဖို့ကို ဒေသခံတွေအနေနဲ့လည်း လိုအပ်နေတာ ဖြစ်တယ်လို့ အာရက္ခတိုင်းမ်စ်ကို ပြောပါတယ်။
လက်ရှိ နေထိုင်နေတဲ့ ဒေသခံလူထုတွေဟာ တနေ့စာ စားဝတ်နေရေးအတွက်တောင် အင်မတန် ရုန်းကန်နေရတာကြောင့် မြို့သိမ်းတိုက်ပွဲကို အမှန်တကယ် ဖြစ်စေချင်ပြီး လိုအပ်နေတယ်လို့ စစ်ဘေးဒုက္ခသည်တဦးက အာရက္ခတိုင်းမ်စ်ကို ပြောပါတယ်။
“၂၀၂၆-၂၇ အတွင်းမှာ ကျန်ခဲ့တဲ့ စစ်တွေ၊ ကျောက်ဖြူ၊ မာန်အောင်တို့ကို အပြီးတိုင်သိမ်းဖို့လို့ ဗိုလ်ချုပ်က ပြောခဲ့တယ်လို့တော့ ပြောသံကြားပါတယ်။ ၂၀၂၆-၂၇ သိမ်းဖို့ဆိုရင်လည်း ကျမတို့ လက်ရှိနေကြတဲ့ မြို့ခံအနေနဲ့ပြောရမယ်ဆို ကောင်းကောင်း အကျပ်အတည်း ရှိပါတယ်။ အလုပ်အကိုင်လည်း ရှားပါးပါတယ်။ အလုပ်တွေလည်း မရှိပါ။ ထမင်းဆို စားရတာလည်း ဒီနေ့စားရင် မနက်ဖြန်စားဖို့အတွက်ကို ဒုက္ခ အရမ်းများပါတယ်။ ၂၀၂၆-၂၇ မှာ ဗိုလ်ချုပ် ပြောသွားတဲ့အတိုင်း အမှန်တကယ် ဖြစ်မယ်ဆိုရင် တိုက်ပွဲဖြစ်ဖို့ဆိုတာကို ကျမတို့ လိုအပ်နေတာပါ။ ဘာလို့လဲဆိုရင် ဖြစ်ရင်လည်း ဖြစ်ပစ်လိုက်။ ဖြစ်ပြီးရင် သေရင်လည်းသေ ရှင်ရင်လည်းရှင်ပေါ့။ ပြီးသွားရင် အားလုံးသူအတွက် အဆင်ပြေပါဖို့။ ကျမတို့မှာ ဒီနေရာမှာ အခု ထိုင်စောင့်နေတယ်ဆိုတာကလည်း ရန်ကုန်သွားဖို့လည်း ပိုက်ဆံမရှိပါ။ ရန်ကုန်ကနေ မြောက်ဦးဘက်ကို ပြန်သွားဖို့၊ မင်းပြားတို့ဆိုရင် ထိန်းချုပ်ထားတဲ့ လွတ်မြောက်နယ်မြေ နေရာကို သွားဖို့ဆိုလည်း ငွေရေး ကြေးရေး အခက်အခဲ ရှိပါတယ်။ မိသားစုတွေကလည်း အဲဒီဘက်မှာ သက်သက် ကျမတို့က အိမ်ကိုစောင့်ဖို့အတွက် စစ်တွေမှာ နေနေရတယ်။ အိမ်ပျက်စီးဖို့အတွက်လည်း ကြောက်တယ်လေ။ ပြန်လာလို့ အိမ်မရှိရင် ဘယ်မှာ နေရမလဲ။ ပထမတခေါက်တုန်းကလည်း ၂၀၂၅ မှာ အပြတ်သိမ်းဖို့ဆိုပြီး ဗိုလ်ချုပ် ပြောတဲ့စကားနဲ့ ကျမတို့လည်း နေခဲ့ကြတာပါ” လို့ သူက ပြောပါတယ်။
လက်ကျန် ၃ မြို့ကို လာမယ့် ၂၀၂၆ ခုနှစ်နဲ့၂၀၂၇ ခုနှစ် မကုန်ဆုံးမီ လက်စသတ် အောင်ပွဲခံနိုင်ရန် ယုံကြည်ချက်အပြည့်ဖြင့် လုပ်နေကြောင်း အာရက္ခတပ်တော် (AA) တပ်မှူးချုပ် ဗိုလ်ချုပ်ထွန်းမြတ်နိုင် က ဧပြီလ ၁၀ ရက်က ကျရောက်ခဲ့တဲ့ အာရက္ခတပ်တော် တည်ထောင်ခြင်း (၁၇) နှစ်မြောက် အထိမ်းအမှတ်နေ့သို့ ပေးပို့တဲ့ သဝဏ်လွှာမှာ ဖော်ပြထားတာပါ။
ဒေသခံ လူထုတွေအတွက် နေထိုင်ရေးထက် စားဝတ်နေရေး အခက်အခဲက ပိုပြီး ကြောက်ဖို့ ကောင်းနေတာ ဖြစ်တယ်လို့ စစ်ဘေးဒုက္ခသည်တဦးက အာရက္ခတိုင်းမ်စ်ကို ပြောပါတယ်။
“ကျမတို့လိုမျိုးပဲ တခြားလူတွေလည်း တိုက်ပွဲဖြစ်ဖို့ကိုသာ လိုလားနေကြပါတယ်။ ဖြစ်တယ်ဆိုရင် ပြီးပြီလေ။ ပြီးရင် ကျန်ခဲ့တဲ့လူ ကျန်ဖို့၊ သေတဲ့လူ သေဖို့ ဒီလိုပဲ အားလုံးသူ ဆုံးဖြတ်ထားတယ်။ ပြောတဲ့အတိုင်း ၂၅ ခါ ဖြစ်ဖို့၊ ၂၅ မှာ အပြတ် ဖြစ်ဖို့ဆိုလည်း မဖြစ်ခဲ့ဘူးလေ အကြောင်း အမျိုးမျိုးကြောင့်။ အခုလည်း ၂၆-၂၇ ဆိုတော့ တနှစ်နီးပါး ကျမတို့မှာ အခက်အခဲတွေက နက်ဖန် သဘက်ခါ မိုးကျလာရင် ထင်းတွေ ရှားလာပါဖို့။ ထင်းရှားလာရင် စားဖို့ သောက်ဖို့ အခက်အခဲ ဖြစ်လာပါဖို့၊ မိုးရွာလာရင် အလုပ်အကိုင် ရှားပါးလာပါဖို့။ အဲဒီကိစ္စတွေကို တွေးလို့ ညတွေဆို အိပ်လို့ မပျော်ပါ။ တခါတခါ လာတယ်ဆိုရင် ကြောက်စိတ်တွေနဲ့ ကြောက်စိတ်ဆိုတာ စားဖို့ သောက်ဖို့ အခက်အခဲ ကြောက်တာကို ပြောတာပါ။ နေထိုင်ရတဲ့ အခက်အခဲထက် စားဝတ်နေရေး အခက်အခဲက ပိုလို့ ကြောက်ဖို့ ကောင်းပါတယ်။ အဲဒါကြောင့် အမှန်တကယ် တပ်မွေးနေ့ခါ ပြောသွားတဲ့ ၂၀၂၆-၂၇ အခါ အပြီးသိမ်းဖို့ဆိုရင်လည်း ကျမတို့ ၁ နှစ်နီးပါး ထိုင်စောင့်နေရဦးမှာပဲ မဟုတ်ပါလားလေ” လို့ သူက ပြောပါတယ်။
သေနတ်တလက်၊ လူ ၂၆ ယောက်နဲ့ မြန်မာပြည်မြောက်ပိုင်း ကချင်လွတ်လပ်ရေးတပ် ထိန်းချုပ်ဒေသကနေ စတင် သန္ဓေတည်ခဲ့တဲ့ အာရက္ခတပ်တော် ဟာ ၂၀၂၆ ခုနှစ် ဧပြီလ ၁၀ ရက်မှာ ၁၇ နှစ်ပြည့်ခဲ့ပါပြီ။
စစ်တပ်ရဲ့လေကြောင်းဗုံးကြဲခံရမှု အန္တရာယ်ကြီးနေဆဲပေမဲ့ ရက္ခိုင်ပြည်တစ်ခုလုံးရဲ့ ၉၀ ရာခိုင်နှုန်းကို အာရက္ခတပ်တော်က ထိန်းချုပ်ပြီး အုပ်ချုပ်ရေး ထူထောင်ထားပါတယ်။
ရက္ခိုင်ပြည်အတွင်း မြန်မာစစ်တပ် ကင်းစင်အောင် တိုက်ခိုက်သွားမယ်လို့ အာရက္ခတပ်တော်က ကြေညာထားပါတယ်။ ရက္ခိုင်ပြည်ကို ရက္ခိုင်ပြည်သူတွေကိုယ်တိုင် ဆုံးဖြတ်ပိုင်ခွင့်၊ ကိုယ့်ကြမ္မာ ကိုယ်ဖန်တီးခွင့်ရှိတဲ့ ကွန်ဖက်ဒရိတ် ဒေသတခုအဖြစ် ထူထောင်သွားမယ်လို့ ဗိုလ်ချုပ်ထွန်းမြတ်နိုင်က ပြောခဲ့ပါတယ်။
