ရက္ခိုင်ဝန်ကြီးချုပ် ကျောက်ဖြူလာပြီး ဒေသခံတွေကို ပညာရေးဦးစားပေးဖို့ ပြော

အာရက္ခတိုင်းမ်စ် (၁၉ မေ ၂၀၂၆)

ရက္ခိုင်မှာ တိုက်ပွဲတွေ ဖြစ်ပွားနေတဲ့ကြားက မင်းအောင်လှိုင်ရဲ့ ရွေးကောက်ပွဲအတုကနေ ပေါ်ထွက်လာတဲ့ ရက္ခိုင်ပြည် ဝန်ကြီးချုပ် ဦးနိုင်ဦးဟာ ကျောက်ဖြူမြို့ကို လာရောက်ပြီး ဒေသခံတွေကို ပညာရေး ဦးစားပေးကြဖို့ကိုသာ ဦးစားပေး ပြောသွားတယ်လို့ ဒေသခံတဦးက အာရက္ခတိုင်းမ်စ်ကို ပြောပါတယ်။

စစ်ကော်မရှင်ခန့် ရက္ခိုင်ပြည် ဝန်ကြီးချုပ် ဦးနိုင်ဦးဟာ ကျောက်ဖြူမြို့ကို မေလ ၁၁ ရက်က လာရောက်ခဲ့တာဖြစ်ပြီး ဒေသခံတွေနဲ့ တွေ့ဆုံဆွေးနွေးခဲ့တာ ဖြစ်တယ်လို့ သိရပါတယ်။

ကျောက်ဖြူဒေသခံတဦးက “ဝန်ကြီးချုပ်က ဘာလဲဆိုတော့ ပညာရေး ရက္ခိုင်ပြည်နယ်မှာ သူပြောချင်တာက ပညာမတတ်တဲ့အတွက်ကြောင့်မို့လို့ လူတယောက်က ပြောလိုက်တာနဲ့ အဲဒီဘက်ကို ဇောင်းပေးပြီးတော့ ရောက်သွားတယ်။ အဲဒီလို ဇောင်းပေးပြီးတော့ ရောက်သွားတာကြောင့် ကလေးသူငယ်တွေ ပညာသင်ယူရမယ်။ အတန်းပညာကို အကုန်လုံး သင်ယူရမယ် ဆိုတဲ့ ပုံစံမျိုး ပညာရေးကို ပြောသွားတယ်။ အဓိကကတော့ ပညာရေးကို ဦးစားပေးပြီးပဲ ပြောသွားတယ်။ ပညာရေးကို ဦးစားပေးပြီးတော့ ကျောင်းမှာ ဆိုလာတွေ ဘာတွေ သူတို့ တတ်မယ်။ အိမ်သာဆိုလည်း အကောင်းမွန်ဆုံးဖြစ်အောင် သူတို့ မွမ်းမံမယ်ဆိုပြီးတော့ပဲ ပြောသွားတယ်” လို့ ပြောပါတယ်။

အဲဒီလို တွေ့ဆုံခဲ့ကြတဲ့အခါမှာ ဒေသခံတွေက လက်ရှိ ကြုံတွေ့နေရတဲ့ အခက်အခဲအားလုံးကို တင်ပြ ဆွေးနွေးချင်ကြပေမယ့် အုပ်ချုပ်ရေးမှူးရဲ့ ဟန့်တားမှုတွေကြောင့် ဒေသခံတွေဟာ သေချာ ဆွေးနွေးခွင့် မရခဲ့ကြဘူးလို့ သိရပါတယ်။

စစ်ကော်မရှင်ခန့် ရက္ခိုင်ပြည် ဝန်ကြီးချုပ် ဦးနိုင်ဦးဟာ ‌ဒေသခံတွေနဲ့ တွေ့ဆုံပြီးနောက် တရုတ်စီမံကိန်းတည်ရှိရာ မဒေးကျွန်းကိုလည်း သွားရောက်ခဲ့တယ်လို့ သိရပါတယ်။

ပညာရေးကို ဦးစားပေး လုပ်မယ်ဆိုပေမယ့် ကျောက်ဖြူနေလူထုဟာ နေရာဒေသအသီးသီးကို စစ်ဘေးရှောင်နေကြတဲ့အတွက် လူ သိပ်မကျန်တော့ဘူးလို့ ဒေသခံတဦးက အာရက္ခတိုင်းမ်စ်ကို ပြောပါတယ်။

“ပညာရေးကို လုပ်မယ်ဆို ကျောက်ဖြူမြို့မှာ လူမှ မရှိတော့တာ။ ကျောက်ဖြူက လူတွေက နယ်ဘက်ကို စစ်ဖြစ်မယ်ဆိုပြီး တိမ်းရှောင်သွားကြတာလေ။ ပိုက်ဆံရှိတဲ့လူတွေက ရန်ကုန်မှာ စစ်ဘေးရှောင်တယ်၊ ပိုက်ဆံမရှိတဲ့လူတွေက နယ်ဘက်ကို စစ်ဘေးရှောင်တယ်။ အဲဒီလိုကြတဲ့အခါ နယ်က အခု မဒေးကျွန်းမှာ လူပေါင်း ၃၀၀ ကျော်လောက် ပိတ်မိနေတယ်။ ကျောက်ဖြူမြို့ထဲကို ဝင်လို့ မရဘူး” လို့ သူက ပြောပါတယ်။

လက်ရှိမှာတော့ ရက္ခိုင်ပြည် ကျောက်ဖြူမြို့နယ် တောင်မော်ကြီး ရေတပ်စခန်းဌာနချုပ်ကနေ ရမ်းဗြဲမြို့နယ် စနဲဖက်ကို စစ်ကော်မရှင်က စစ်ကြောင်းထိုးနေလို့ အာရက္ခတပ်တော်နဲ့ တိုက်ပွဲတွေ ပြင်းထန်နေကြောင်းနဲ့ ကျောက်ဖြူမြို့ပေါ်မှာတော့ ဘာတိုက်ပွဲမှ မဖြစ်ကြောင်း သိရပါတယ်။