အာရက္ခတိုင်းမ်စ် (၂၁ စက်တင်ဘာ ၂၀၂၆)
ရက္ခိုင်ပြည်၊ ဂွမြို့နယ်၊ ဆပ်သွားကျေးရွာကို ဒီကနေ့ စက်တင်ဘာလ ၂၁ ရက် နံနက်ပိုင်းမှာ စစ်ကောင်စီက ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာကြောင့် ကျောင်းသားတစ်ဦး အပါအဝင် အရပ်သား ၂ ဦး ထိခိုက်ဒဏ်ရာ ရရှိသွားခဲ့ပါတယ်။
ဒဏ်ရာ ရရှိသွားသူတွေကတော့ ဆပ်သွားရွာမှာ နေထိုင်ကြတဲ့ အသက် ၁၄ နှစ်အရွယ် ၈ တန်း ကျောင်းသား နဲ့ အသက် ၄၄ နှစ်အရွယ် ဦးနေလင်းအောင်တို့ ဖြစ်ကြပါတယ်။
ဒီကနေ့ နံနက် ၁၁ နာရီ မိနစ် ၂၀ လောက်မှာ စစ်ကောင်စီရဲ့ ဂျက်ဖိုက်တာတစ်စီးဟာ ဆပ်သွားရွာထဲကို ပေါင် ၃၀၀ ဗုံး ၂ လုံး ကြဲချခဲ့တာဖြစ်ပြီး လက်ရှိမှာတော့ ဒဏ်ရာရရှိသူတွေကို ဆေးကုသမှု ပေးနေရပါတယ်။
ဗုံး ကျရောက်ပေါက်ကွဲမှုကြောင့် လူနေအိမ် ၁ ဆောင်နဲ့ ဆိုင်ခန်း ၃ ခန်း ပျက်စီးခဲ့ရသလို ဒေသခံတွေရဲ့ ဆိတ် ၂ ကောင်လည်း သေဆုံးခဲ့ပါတယ်။
လက်ရှိမှာ အာရက္ခတပ်တော်နဲ့ စစ်ကောင်စီတို့အကြား တိုက်ပွဲတွေ ပြင်းထန်နေပြီး စစ်ကောင်စီဘက်က စစ်ရေးပစ်မှတ် မဟုတ်တဲ့ အရပ်သား ပြည်သူတွေနေထိုင်ရာနေရာတွေကို လေကြောင်းကနေ နေ့စဉ်နဲ့အမျှ ဗုံးကြဲတိုက်ခိုက်နေတာကြောင့် ပြည်သူတွေ သေဆုံး၊ ဒဏ်ရာရမှုနဲ့ အဆောက်အအုံ ပျက်စီးမှုတွေ ပိုမိုမြင့်တက်လာနေပါတယ်။
