အာရက္ခတိုင်းမ်စ် (၁၀ ဇွန် ၂၀၂၆)
ရှမ်းပြည်နယ်မြောက်ပိုင်း၊ နမ့်ခမ်းမြို့နယ် ကောင်းတပ်ရပ်ကွက် ပြန်လည်ထူထောင်ရေးအတွက် အာရက္ခတပ်တော်က ဒီကနေ့ ဇွန်လ ၁၀ ရက်မှာ ငွေကျပ် သိန်း (၁၀၀) လှူဒါန်းခဲ့တယ်လို့ သိရပါတယ်။
“ နမ့်ခမ်းမြို့၊ အမှတ် (၁) ကောင်းတပ်ရပ်ကွက်ဖြစ်စဉ် ပြန်လည် ထူထောင်နိုင်ရေးအတွက် အာရက္ခတပ်တော် (AA) မီးနဂါးစစ်ဒေသ (၁၀၅မိုင် – မူဆယ်မြို့) မှ ကျပ်သိန်း (၁၀၀) တိတိအား စေတနာပြည့်ဝစွာဖြင့် ကူညီလှူဒါန်းပေးခဲ့ပါသည်” လို့ ကောင်းတပ် ပြန်လည်ထူထောင်ရေးကော်မတီက ဆိုပါတယ်။
မေလ ၃၁ ရက်နေ့က ဖြစ်ပွားခဲ့သည့် ယမ်းမတော်တဆ ပေါက်ကွဲမှုကြောင့် ကောင်းတပ်ကျေးရွာရှိ ပြည်သူ ၅၅ ဦး သေဆုံးပြီး ၇၀ ဦးကျော် ထိခိုက်ဒဏ်ရာရရှိခဲ့ပါတယ်။
နမ့်ခမ်းမြို့နယ် ကောင်းတပ်ကျေးရွာတွင် ယမ်းပေါက်ကွဲမှုကြောင့် သေဆုံးခဲ့ရတဲ့ မိသားစုဝင်များကို တောင်းပန်ကာ ကျပ်သိန်း ၁၀၀ စီ ကူညီထောက်ပံ့ငွေပေးအပ်ခဲ့တယ်လို တအာင်းအမျိုးသားလွတ်မြောက်ရေးတပ်မတော် (TNLA ) က ဇွန်လ ၈ ရက်မှာ ထုတ်ပြန်ခဲ့ပါတယ်။
ကွယ်လွန်သူများကို ရည်စူးပြီး ရက်လည်ဆွမ်းသွပ် တရားနာ အလှူတော်ကို ဇွန်လ ၆ ရက်က ကျင်းပ ပြုလုပ်ခဲ့ပြီး PSLF/TNLA ဒုဥက္ကဋ္ဌ (၁) ဒုဗိုလ်ချုပ်ကြီး တားဂျုတ်ဂျား၊ ဒုဥက္ကဋ္ဌ (၂) ဗိုလ်ချုပ် တားခူလန်၊ အထွေထွေအတွင်းရေးမှူး (၁) ဗိုလ်မှူးချုပ် တားအိုမ်တမာဝ်း၊ အထွေထွေအတွင်းရေးမှူး (၂) ဗိုလ်မှူးကြီး တားပါင်လနဲ့ ဌာနဆိုင်ရာအသီးသီးက တာဝန်ရှိသူများ၊ ဒေသခံပြည်သူများနဲ့ ကျန်ရစ်မိသားစုဝင်များ တက်ရောက်ခဲ့တယ်လို့ သိရပါတယ်။
အဆိုပါ ပေါက်ကွဲမှုကြောင့် ထိခိုက် ဒဏ်ရာ ရရှိခဲ့သူတွေအတွက်လည်း လိုအပ်တဲ့ ဆေးဝါးကုသမှုများ၊ ကျန်းမာရေး စောင့်ရှောက်မှုများနဲ့ တခြား လိုအပ်တဲ့ အကူအညီများကို PSLF/TNLA က ဆက်လက် ပံ့ပိုး ကူညီပေးမယ်လို့လည်း သိရပါတယ်။
