မူဆယ်မြို့ရှိ ပွဲစားများကို ဌာနဆိုင်ရာများ အရေးယူသင့်
အာရက္ခတိုင်းမ်စ် (၇-နိုဝင်ဘာ-၂၀၂၄)
တရုတ်နိုင်ငံမှာ အလုပ်ရရှိမယ်ဆိုပြီး ချိတ်ဆက်ခေါ်ယူနေတဲ့ မူဆယ်မြို့မှ ပွဲစားများကို ဌာနဆိုင်ရာတွေအနေနဲ့ အရေးယူဆောင်ရွက်သင့်ပြီလို့ ပရဟိတ အသင်းအဖွဲ့တွေက ပြောပါတယ်။
အလုပ်ရရှိမယ်လို့ဆိုပြီး မူဆယ်မြို့ကို တက်လာခိုင်းခဲ့ပြီး ရောက်ရှိချိန်မှာတော့ တရုတ်ဘက်က အလုပ်ခေါ်စာတွေ မကျတဲ့အတွက် တရုတ်နိုင်ငံထဲကို ဝင်ခွင့်မရဘဲ မူဆယ်မြို့မှာ သောင်တင်နေကြတယ်လို့ သူတို့က ပြောပါတယ်။
မူဆယ်မြို့မှာ အရင်ကတည်းက တရုတ်နိုင်ငံဘက်ကို လုပ်သားစေလွှတ်ပေးနေတဲ့ ပွဲစားတွေရှိနေခဲ့ပေမယ့် အခုလက်ရှိမှာ ပိုမိုများပြားလာပြီး ဆိုးရွားလာတဲ့အတွက် မူဆယ်မြို့ရှိ ဌာနဆိုင်ရာ အကြီးအကဲတွေ ကွင်းဆင်းကာ အရေးယူဆောင်ရွက်သင့်တယ်လို့ ပရဟိတအသင်းတစ်ခုမှ တာဝန်ရှိသူတစ်ဦးက အခုလို ပြောပါတယ်။
သူက “အရင်တုန်းကထက်စာရင် တော်တော်ကြီးကို ရုပ်ပျက် ဆင်းပျက်ကြီးကို ဖြစ်လာပြီ။ ရပ်ကွက်တွေထဲကို လိုက်လေ့လာလိုက်ရင် ဒုက္ခရောက်နေတာ ၃၊ ၄ လလောက် ရှိပြီ။ အခုထိ မဝင်ရသေးဘူး စာရိတ်တွေပြတ်လို့။ ဒီပွဲစားဆိုတဲ့ သတ္တဝါတွေကို တော်တော်ကို စိတ်တိုလာတာ။ ဖြစ်နိုင်ရင် မူဆယ်က ဌာနဆိုင်ရာတွေအနေနဲ့ ဒါတွေကို ပိတ်သင့်တယ်လို့တောင် ဦးလေးတို့ မြင်တယ်။ ဌာနဆိုင်ရာတွေက ဒီဟာတွေကို မမြင်တာလား။ ဒါမှမဟုတ် မြင်ရဲ့နဲ့ပဲ လျစ်လျူရှုထားတာလား။ ဒါတွေက တကယ်တမ်း ကွင်းဆင်းလေ့လာလိုက်မယ်၊ တစ်ရက် ခရီး လောက် ကွင်းဆင်းလေ့လာလိုက်ရင် အဖြစ်အပျက်တွေက ပေါ်လွင်လာမှာလေ” လို့ အာရက္ခတိုင်းမ်စ်ကို ပြောပါတယ်။
မူဆယ်ကို ရောက်ရှိတာဟာ ၃၊ ၄ လကြာတဲ့အထိ တရုတ်ဘက်မှ အလုပ်ခေါ်စာတွေ မကျလာ သေးတဲ့အပြင် ပွဲစားတွေကလည်း ပစ်ထားခဲ့ကြခြင်းဖြစ်ပြီး လက်ရှိ မူဆယ်မှာ သောင်တင်နေတဲ့ မြန်မာဦးရေဟာ ပျမ်းမျှ ၅ ထောင် နီးပါးရှိတယ်လို့ သိရပါတယ်။
လက်ရှိ မူဆယ်မြို့က သိန်းသန်းချီ ကားကွင်းမှာသာမကပဲ ရပ်ကွက်အသီးသီးမှာလည်း အခန်းငှားပြီး နေထိုင်နေကြရတဲ့ မြန်မာ အများအပြားရှိနေပြီး တရုတ်ဘက်မှ အလုပ်ခေါ်စာမကျတဲ့အတွက် ဒုက္ခရောက် နေကြပေမယ့် မန္တလေးကနေ တဆင့် မူဆယ်ကို တက်လာကြတဲ့ သူတွေ ရှိနေကြောင်းလည်း သိရပါတယ်။
နှလုံးလှပရဟိတအသင်းမှ တာဝန်ရှိသူက “ဟိုဘက်က သိထားသလောက်တော့ ပိတ်ထားသေးတယ်။ အဝင်မခံသေးဘူးပေါ့။ ပိတ်ထားတယ် သွားလို့မရသေးဘူးတဲ့ သူတို့ကိုယ်တိုင်ပြောတာ။ ဟိုဘက်က စက်ရုံပိုင်ရှင်တွေ ကိုယ်တိုင်လာခေါ်မှ သူတို့က သဘောတူညီပြီးတော့ ထည့်ပေးတာပေါ့။ ထမင်းနဲ့ အိပ်ခကို တရုတ်ငွေ တစ်ရက်ကို ၃၀ ဖြတ်တယ် တချို့ကကြတော့။ အခက်အခဲကတော့ ဒီကုန်ဈေးနှုန်း ကြီးမြင့်မှုတွေပဲ။ ခရမ်းချဉ်သီး တစ်ပိဿာ တစ်သောင်းကျော်။ ကျန်တာတွေလည်း အကုန်လုံးဈေးတွေက ထိုးတက်နေတာမျိုး” လို့ အာရက္ခတိုင်းမ်စ်ကို ပြောပါတယ်။
တရုတ်ဘက်က နယ်စပ်ဂိတ်တွေကို ပိတ်ထားတဲ့အတွက် လက်ရှိ မူဆယ်မြို့မှာ စားသောက်ကုန်နဲ့ လူသုံးကုန် နည်းပါးတဲ့အပြင် စက်သုံးဆီဝယ်ယူရတာ အခက်အခဲဖြစ်နေပြီး လိုသလောက်လည်း မရှိဘူးလို့ ဒေသခံတွေထံမှ သိရပါတယ်။
