အာရက္ခတိုင်းမ်စ် (၆ မတ်လ ၂၀၂၆)
မတ်လ ၂ရက်နေ့မှာ ပေးခဲ့တဲ့ ပြစ်ဒဏ်လွတ်ငြိမ်းခွင့်မှာ ရက္ခိုင်ရှိ အကျဉ်းထောင်များမှ နိုင်ငံရေးအကျဉ်းသားနှစ်ဦးသာ ပါဝင်တယ်လို့ PPNM က ထုတ်ပြန်ခဲ့ပါတယ်။
အကျဉ်းထောင် (၃၉) ထောင်မှ နိုင်ငံရေးအကျဉ်းသား (၄၄၀၃) ဦး လွတ်မြောက်ခဲ့ပြီး သူတို့အနက် ရက္ခိုင်ပြည်၊ ကျောက်ဖြူအကျဉ်းထောင်မှ ကျား ၁ ဦး နဲ့ စစ်တွေအကျဉ်းထောင်မှ ကျား ၁ ဦး ပါဝင်တယ်လို့ မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် (PPNM) က ဆိုပါတယ်။
“ကျနော်တို့ PPNM က ရက္ခိုင်ဘက်က အကျဉ်းထောင်တွေနဲ့တော့ အဆက်သွယ် ပြတ်နေတယ်ပေါ့နော်။ ဒါပေမယ့် အခုလက်ရှိ ရရှိထားသမျှ အတည်ပြုထား အတည်ပြုနိုင်တဲ့ အရေအတွက်ကိုပဲ ကျနော်တို့ စာရင်းထည့်ထားတာ ဖြစ်ပါတယ်။ ကျန်တဲ့ အရေအတွက်တွေကတော့ စိစစ်ရဦးမှာ ဖြစ်ပါတယ်ရှင့်” လို့ PPNM က တာဝန်ရှိသူတဦးက အာရက္ခတိုင်းမ်စ်ကို ပြောပါတယ်။
အဆိုပါ စာရင်းဟာ ဒီကနေ့ မတ်လ ၄ ရက်၊ ည ၈နာရီ အထိ စုံစမ်းအတည်ပြုထားတဲ့ စာရင်းဖြစ်တယ်လို့လည်း PPNM က ထုတ်ပြန်ထားပါတယ်။
တပေါင်းလပြည့်နေ့နဲ့ တောင်သူလယ်သမားနေ့ အထိမ်းအမှတ်အဖြစ် အကြမ်းဖက်မှုတိုက်ဖျက်ရေးဥပဒေပုဒ်မ ၅ဝ (ည) နဲ့ ပုဒ်မ ၅၂ (က) အရ ပြစ်မှုကျူးလွန်ပြီး အကျဉ်းထောင်/အချုပ်ထောင်/စခန်းအသီးသီးတွင် ပြစ်ဒဏ်ကျခံလျက်ရှိတဲ့ အကျဉ်းသား/အကျဉ်းသူ ၇၃၃၇ ဦးကို ပြစ်ဒဏ် လွတ်ငြိမ်းခွင့် ပြုခဲ့တာလည်း ဖြစ်ပါတယ်။
33 comments