အာရက္ခတိုင်းမ်စ် (၂၁ မတ် ၂၀၂၆)
ရက္ခိုင်ပြည်ကို တင်ပို့ရန် ဘင်္ဂလားဒေ့ရှ်ကနေ အာလူးတင်ဆောင်လာတဲ့ ဘုတ် ၂ စီးကို ဘင်္ဂလားဒေ့ရှ်ကမ်းခြေစောင့်တပ် (BCG) က ဖမ်းဆီးခဲ့တယ်လို့ ဒီကနေ့ထုတ် ဘင်္ဂလားဒေ့ရှ်သတင်းဌာနတွေမှာ ဖော်ပြပါရှိပါတယ်။
မတ်လ ၁၉ ရက် နေ့လည်းပိုင်းတွင် ဘင်္ဂလားဒေ့ချ်နိုင်ငံ၊ နိုအာခါလီခရိုင်၊ ဟတီယာကျွန်းအနီးရှိ မဂ္ဂနာမြစ်ဝတွင် ရက္ခိုင်ပြည်ကို ပို့ဆောင်ရန် ခန့်မှန်းကာလတန်ဖိုး တာကာငွေ ၅၇၀,၀၀၀ ရှိ အာလူးအိတ် ၇၆၀ တင်ဆောင်လာတဲ့ ဘုတ် ၂ စီးကို BCG ဖမ်းဆီးလိုက်တာလို့ သိရပါတယ်။
“ ဘုတ် ၂ စီးကို ဖမ်းဆီးရမိခဲ့သော်လည်း တရားမဝင် ကုန်ကူးသူ ကုန်ပစ္စည်းပိုင်ရှင်များကို ဖမ်းဆီးရမိခြင်းမရှိဘဲ ထွက်ပြေး လွတ်မြောက်တယ်” လို့ BCG တပ်ဖွဲ့ပြောရေးဆိုခွင့်ရှိသူ ဗိုလ်အလမ်ဆူဇမ်က ဘင်္ဂလားဒေ့ချ်မီဒီယာများကို ပြောဆိုခဲ့ပါတယ်။
အလားတူ ဖေဖော်ဝါရီလ ၂၆ ရက်ကလည်း ရက္ခိုင်ပြည်ကို တင်ပို့မယ့် ဘိလပ်မြေအိတ် ၁,၁၄၀၊ ပဲအိတ် ၅၀၊ အာလူးအိတ် ၂၀ နဲ့ အချိုရည်များ တင်ဆောင်လာတဲ့ ဘုတ် ၂ စီးနဲ့ ကုန်သည် ၁၉ ဦးကို ဘင်္ဂလားဒေ့ချ်ကမ်းခြေစောင့်တပ်က စိန့်မာတင် (အုန်းကျွန်း) အနီး ပင်လယ်ပြင်တွင် ဖမ်းဆီးခဲ့ပါသေးတယ်။
