အာရက္ခတိုင်းမ်စ် (၂၅ မတ် ၂၀၂၆)
ရန်ကုန်မြို့က ဘဏ်တွေမှာ ငွေအဝင်တွေ မရှိတဲ့အတွက် ငွေထုတ်တဲ့အခါမှာ ကန့်သတ်မှုတွေနဲ့ တင်းကြပ်လာတယ်လို့ သိရပါတယ်။
အရင်က ငွေထုတ်တဲ့အခါ ကန့်သတ်မှုမရှိပေမယ့် အခုအခါမှာတော့ တရက်ကို ဘယ်လောက်နှုန်းပဲ ထုတ်ပေးမယ်လို့ တိတိကျကျ ကန့်သတ်ထားတာမဟုတ်ပေမယ့် ဘဏ်ထဲရှိတဲ့ ငွေကြေးအပေါ်မူတည်ပြီး ပမာဏနည်းနည်းပဲ ထုတ်ပေးတော့တယ်လို့ ဘဏ်တခုမှာ လုပ်ကိုင်နေသူတဦးက အာရက္ခတိုင်းမ်စ်ကို ပြောပါတယ်။
“ဥပမာ ၃၀၀ လောက်ရှိမှ ၂၀၊ ၃၀ အဲဒီလို ထုတ်ပေးတာ။ နည်းနည်းပဲရှိတဲ့လူက ထုတ်လို့ရတယ်လေ။ သူက တယောက်ကို နည်းနည်းများများရယ်လို့မဟုတ်ဘူး ၂၀ ဆို ၂၀၊ ၃၀ ဆို ၃၀ အဲဒီလို ကန့်ပစ်လိုက်တာ။ တရက်ဆိုတာ ရိုးရိုးအကောင့်ဆိုရင် တပတ်မှာ တခါပဲ ထုတ်လို့ရတာလေ။ နေ့တိုင်းမှမရတာ။ special ကတော့ နေ့တိုင်း ထုတ်လို့ရတယ်။ special လည်း ပါတယ် (ကန့်ပစ်တဲ့အထဲ)။ ဒါပေမယ့် special ကတော့ daily ထုတ်လို့ရတယ်။ ဒါပေမယ့် သူတို့ပေးသလောက်ပေါ့။ ဒီနေ့ ၂၀ ဆို ၂၀၊ ၃၀ ဆို ၃၀ အဲဒီလိုပဲရမှာပေါ့” လို့ သူက ပြောပါတယ်။
အရှေ့အလယ်ပိုင်း စစ်ပွဲတွေကြောင့် ကုန်ဈေးနှုန်းကြီးမြင့်လာမှုနဲ့အတူ စက်သုံးဆီ အခက်အခဲတွေကြောင့် လူထုဟာ ဘဏ်တွေမှာ အပ်ထားတဲ့ငွေတွေကို ပိုမိုထုတ်ယူ လာနေကြတာဖြစ်ပါတယ်။
ဒါကြောင့် ဘဏ်ထဲမှာ ငွေတွေက အသွင်းမရှိဘဲ အထုတ်တွေပဲများနေတာကြောင့် အခုလိုမျိုး ကန့်ပစ်လိုက်တာဖြစ်တယ်လို့ ဘဏ်တခုမှာ လုပ်ကိုင်နေသူတဦးက အာရက္ခတိုင်းမ်စ်ကို ပြောပါတယ်။
“ဥပမာ ဟိုတလောတုန်းကဆို ဘယ်လိုဖြစ်လဲဆိုတော့ special အကောင့်ကို မနက်ပိုင်းကို ၅၀ ပေးတယ်။ ၅၀ ပေးရင်း ပေးရင်းနဲ့ ဘဏ်ထဲမှာ လက်ကျန်ပိုက်ဆံ နည်းလည်းနည်းလာရော ၂၀ ပဲ ထုတ်ပေးတော့တယ်။ အဲဒီလိုမျိုးပေါ့။ မှန်းလို့မရဘူးကွာ။ တနေ့ ဘယ်လောက်ရယ်လို့ မဟုတ်ဘူး။ ပိုက်ဆံနဲ့ ဘဏ်ကိုဝင်တဲ့ customer အပေါ် မူတည်ပြီးတော့ ကန့်လိုက်တာ။ အရင်တုန်းကဆိုရင် ၂၀၀ လည်း ထုတ်လို့ရတယ်။ ၃၀၀ လည်း ထုတ်လို့ရတယ်။ အခုကြတော့ လှိမ့်ထုတ်ကြတော့ အဲဒီလိုတွေ ကန့်တာတွေလည်း ပါတယ်။ အထုတ်များနေတာပေါ့။ အသွင်းထက်ကို အထုတ်များနေတော့ အဲဒီလိုတွေ ကန့်ပစ်တာပေါ့” လို့ သူက ပြောပါတယ်။
ဒါပေမယ့် ဘဏ်တိုင်းမှာ VIP customer တွေရှိကြပြီး အဲဒီ VIP တွေကတော့ လိုသလောက် ပမာဏအတိုင်း ထုတ်ယူခွင့် ပေးထားတယ်လို့လည်း သိရပါတယ်။
လက်ရှိမှာတော့ အရှေ့အလယ်ပိုင်း စစ်ပွဲကြောင့် ရန်ကုန်အပါအဝင် မြန်မာနိုင်ငံတဝှမ်း စက်သုံးဆီပြဿနာကို တွေ့ကြုံခံစားနေရပြီး ကုန်ဈေးနှုန်းတွေဟာလည်း အရင်ကထက် ပိုမို မြင့်တက်လာနေတာကြောင့် အခြေခံလူတန်းစာတွေအဖို့ ရုန်းကန်နေရတာပါ။
ဒါ့အပြင် စုံ/မ ကန့်သတ်ချက်တွေ၊ QR စနစ်နဲ့ ဆီဝယ်ယူရတာတွေဟာလည်း အဆင်မပြေ ဖြစ်လို့ နေကြပါတယ်။
