ကျောက်ဖြူတွင် စကမ စစ်အင်အားဖြည့်တင်း၊ မိုးတွင်းမှာ AA ထိုးစစ်ကို ခုခံရန်ပြင်ဆင်နေ

by Rakhita Timesမေ 2, 2026မေ 2, 202624 155

အာရက္ခတိုင်းမ်စ် (၂ မေ ၂၀၂၆)

ရက္ခိုင်ပြည် ကျောက်ဖြူမြို့နယ်တွင် စစ်ကော်မရှင်တပ်က စစ်အင်အားနဲ့ လက်နက်ခဲယမ်းတွေ ဖြည့်တင်းနေတယ်ပြီး မိုးတွင်းကာလမှာ အာရက္ခတပ်တော်ရဲ့ထိုးစစ်ကို ခုခံရန် ပြင်ဆင်နေတယ်လို့ သိရပါတယ်။

“ အရင်ကဆို စစ်တပ်က စစ်ကြောင်းတွေ ထိုးတယ်။ ဒီရက်ပိုင်းထဲ စစ်ကြောင်းမထိုးတော့ဘဲ နောက်တန်းမှာ စစ်အင်အားတွေ ထပ်ဖြည့်နေတယ်။ သင်္ဘောတွေနဲ့ စစ်သားတွေရော လက်နက်တွေရော ပါလာတယ်။ အစာခြောက်တွေပါ ပါတယ်” လို့ ကျောက်ဖြူမြို့နယ်ဒေသခံတဦးက အာရက္ခတိုင်းမ်စ်ကို ပြောပါတယ်။

စစ်ကော်မရှင်ဟာ ဧပြီလ ၂၆ ရက်က စတင်ကာ စစ်သင်္ဘောတွေနဲ့ ကျောက်ဖြူမြို့ကို စစ်အင်အားနဲ့ လက်နက်တွေကို ဖြည့်တည်းနေတာလည်း ဖြစ်ပါတယ်။

“ ပထမ ပို့တာက ဓညဝတီရေတပ်ပေါ့။ အဲဒီကနေမှ ၃၂ ရဲ့တပ်ရင်းကို ပို့တယ်။ ထိုးစစ်ထိုးတာ မတွေတော့ဘူး။ စခန်းမှာပဲ လူအင်အားတွေ ဖြည့်တင်းနေတာ” လို့ သူက အာရက္ခတိုင်းမ်စ်ကို ဆက်ပြောပါတယ်။

အခုလို စစ်အင်အားနဲ့ လက်နက်ခဲယမ်းတွေ ဖြည့်တင်းလာတာဟာ မိုးရာသီရောက်တော့မှာကြောင့် ဖြစ်နိုင်တယ်လို့လည်း နိုင်ငံရေးလေ့လာသုံးသပ်သူတွေက ဆိုပါတယ်။

“ သူတို့ (စစ်ကော်မရှင်) က မိုးတွင်းအတွက် ကြိုတင်ပြင်ဆင်နေပုံရတယ်။ ရက္ခိုင်မိုးက သိတဲ့အတိုင်းပဲ။ ရွာပြီဆို သဲကြီးမဲကြီးပဲလေ။ အဲလိုဆို ဒီကောင်တွေ (စစ်ကော်မရှင်) ဒရုန်းလည်း အသုံးပြုလို့ မရတော့ဘူး။ လေယာဉ်လည်း လာမကူနိုင်တော့ဘူးလေ။ AA က လာတိုက်ရင် ခံတိုက်ဖို့ ပြင်နေတာ ဖြစ်နိုင်တယ်” လို့ နိုင်ငံရေးလေ့လားသုံးသပ်သူတဦးက အာရက္ခတိုင်းမ်စ်ကို ပြောပါတယ်။

စစ်ကော်မရှင်အနေနဲ့ ဓညဝတီရေတပ်ဌာနချုပ်၊ အမှတ် ၃၂ ရဲတပ်ရင်း အပါအဝင် ကာကင်းတွေမှာလည်း ဘန်ကာ၊ ကတုတ်ကျင်းတွေကို ထပ်မံပြီး အသစ် ပြန်လည် တည်ဆောက်နေတယ်လို့ သိရပါတယ်။