ကျောက်တော်ဗုံးကြဲခံရမှုတွင် ကလေးအပါအဝင် သေဆုံးသူ ၈ ဦးနဲ့ ဒဏ်ရာရရှိသူ ၁၉ ဦးရှိ

အာရက္ခတိုင်းမ်စ် (၁၈ ဇွန် ၂၀၂၆)

ရက္ခိုင်ပြည် ကျောက်တော်မြို့နယ်ကို ရွေးတုအစိုးရတပ်က ဇွန်လ ၁၇ ရက် နေ့လည် ၃ နာရီခန့်မှာ ဂျက်ဖိုက်တာနဲ့ ဗုံး ၂၃ လုံး ကြဲချတိုက်ခိုက်ခဲ့လို့ ကလေးငယ် ၁ ဦးအပါအဝင် ၈ ဦး သေဆုံးခဲ့ပြီး ၁၉ ဦး ထိခိုက်ဒဏ်ရာ ရရှိခဲ့တယ်လို့ အာရက္ခတပ်တော်က ဒီကနေ့ (ဇွန်လ ၁၈) မှာ ထုတ်ပြန်ခဲ့ပါတယ်။ 

ရွေးတုအစိုးရတပ်ဟာ ပထမအကြိမ်အဖြစ် ၂၀၂၆ ခုနှစ်၊ ဇွန်လ (၁၇) ရက်၊ ညနေ (၃) နာရီအချိန်ခန့်တွင် ဂျက်ဖိုက်တာ (၂) စီးနဲ့ ကျောက်တော်မြို့ပေါ်ရှိ ပိုက်သည်ရပ်ကွက်၊ ရွာမရပ်ကွက်၊ ကတ-၃ လမ်းမ အပါအဝင် စုစုပေါင်း အရပ်သား ပြည်သူများ နေထိုင်တဲ့ နေရာ (၅) ခုကို Rocket သီး (၁၃) လုံး နဲ့ ပေါင် (၅၀၀) ဗုံး (၃) လုံး အသုံးပြု တိုက်ခိုက်ခဲ့ပါတယ်။
 
အလားတူ ဒုတိယအကြိမ်အဖြစ် ဂျက်ဖိုက်တာ (၂) စီးနဲ့ ကျောက်တော်မြို့၊ လမ်းမတော်ကျေးရွာ ဈေးဆိုင်တန်း ကျောက်ကွင်းအနီးတစ်ဝိုက်ကို ပေါင် (၅၀၀) ဗုံး (၄) လုံး၊ ပေါင် (၃၀၀) ဗုံး (၁) လုံး၊ Rocket သီး (၂) လုံးနဲ့ ဆက်လက် အသုံးပြု တိုက်ခိုက်ခဲ့ပါတယ်။
 
ရွေးတုအစိုးရတပ်ရဲ့ တစ်နာရီနီးပါးကြာတဲ့ အဆိုပါ လေကြောင်းတိုက်ခိုက်မှုကြောင့် (၄) နှစ်အရွယ် ကလေးငယ်တစ်ဦး အပါအဝင် အရပ်သားပြည်သူ (၈) ဦးသေဆုံးခဲ့ပြီး (၁၉) ဦး ဒဏ်ရာရရှိခဲ့ပြီး လူနေအိမ်များ၊ ဈေးဆိုင်ခန်းများအပါအဝင် အဆောက်အအုံ (၃၀) ခန့် မီးလောင် ပျက်စီး ဆုံးရှုံးခဲ့ရတယ်လို့ အာရက္ခတပ်တော်က ဆိုပါတယ်။

ရွေးတုအစိုးရတပ်ရဲ့ လေကြောင်းကနေ ဗုံးကြဲတိုက်ခိုက်မှုကြောင့် သေဆုံးသွားသူများမှာ အသက် ၄ နှစ်အရွယ် မောင်မြတ်ဟိန်းကျော်၊ အသက် ၂၃ နှစ်အရွယ် မစိုးစန္ဒာ၊ အသက် ၃၆ နှစ်အရွယ် ကိုတူးတူး၊ အသက် ၄၀ အရွယ် ဦးလူချေမောင်၊ အသက် ၄၀ အရွယ် ကိုစောအေးမောင်၊ အသက် ၄၅ နှစ်အရွယ် ဦးမောင်သန်းဌေး၊ အသက် ၆၄ နှစ်အရွယ် ဦးမောင်သာနုနဲ့ အသက် ၇၈ နှစ်အရွယ် ဒေါ်စိန်စိန်တို့ပဲ ဖြစ်ပါတယ်။

ထိခိုက်ဒဏ်ရာ ရရှိသူတွေထဲမှာတော့ အသက် ၉ လ အရွယ် ကလေးငယ်တစ်ဦး ပါဝင်ပြီး အမျိုးသမီး ၈ ဦးနဲ့ အမျိုးသား ၁၂ ဦး ဖြစ်ကာ စိုးရိမ်ရ ပြင်းထန်ဒဏ်ရာရရှိသူ ၄ ဦး ရှိနေတယ်လို့လည်း သိရပါတယ်။

ဓာတ်ပုံများ ပိုမိုကြည့်ရှုလိုပါက t.me/arakhatimes တွင် ကြည့်ရှုနိုင်ပါတယ်။