အာရက္ခတိုင်းမ်စ် (၃ သြဂုတ် ၂၀၂၆)
ရက္ခိုင်ပြည် သံတွဲခရိုင် ငပလီမြို့ ဂျိတ်တော်ရပ်ကွက်ကို ရွေးတုအစိုးရက ဒီကနေ့ မနက်ပိုင်းမှာ လေယာဉ်အုပ်စုလိုက်နဲ့ ဗုံး အလုံးရေ ၆၀ နီးပါး ကြဲချခဲ့တယ်လို့ သိရပါတယ်။
“မနက် ၁၀ နာရီခွဲ ပတ်ဝန်းကျင်လောက်မှာ ဂျက်ဖိုက်တာတွေရော၊ Y-12 တွေရော အုပ်စုလိုက်ကို လာကြဲသွားတာ။ ကမ္ဘာပျက်နေသလိုကို ဖြစ်သွားတာ။ တဝုန်းဝုန်း တဒိုင်းဒိုင်းပဲ။ တကယ်ကို ငရဲကျနေသလိုပဲ” လို့ ငပလီမြို့ဒေသခံတစ်ဦးက အာရက္ခတိုင်းမ်စ်ကို ပြောပါတယ်။
အဆိုပါ ဗုံးကြဲတိုက်ခိုက်မှုကြောင့် ငပလီမြို့ ဂျိတ်တော် အမှတ် ၉ ရပ်ကွက်က အနည်းဆုံး ပြည်သူ ၂ ဦး ထိခိုက်ဒဏ်ရာ ရရှိခဲ့ပြီး နေအိမ် ၁၅ အိမ်ခန့်နဲ့ တည်းခိုခန်း ၁ လုံးလည်း ပျက်စီးခဲ့တယ်လို့ သိရပါတယ်။
ဇူလိုင်လ ၂၃ ရက်ကလည်း ရွေးတုအစိုးရဟာ ရက္ခိုင်ပြည် သံတွဲခရိုင် ငပလီမြို့ ဂျိတ်တော ၅ ရပ်ကွက် နဲ့ လင်းသာရပ်ကွက်ကို ဗုံး ၃ လုံး ကြဲချ တိုက်ခိုက်ခဲ့လို့ ပြည်သူ ၅ ဦး ထိခိုက် ဒဏ်ရာ ရရှိခဲ့ပြီး ပုလဲရတနာ (ဘက) ကျောင်းနဲ့ AZ Family တည်းခိုခန်း ပျက်စီးခဲ့ပါတယ်။
အလားတူ ဇူလိုင်လ ၃၁ ရက် ညနေဖက်ကလည်း ရက္ခိုင်ပြည် သံတွဲမြို့နယ် ရွှေလှေကျေးရွာကို ရွေးတုအစိုးရတပ်က ဂျက်ဖိုက်တာနဲ့ ဗုံး ၃ လုံး ကြဲချခဲ့လို့ မိသားစု ၃ ဦး အပါ ပြည်သူ ၄ ဦး သေဆုံးခဲပြီး ၂ ဦး ထိခိုက် ဒဏ်ရာ ရရှိခဲ့ပါတယ်။
