အာရက္ခတိုင်းမ်စ် (၁ ဇူလိုင် ၂၀၂၅)
ရက္ခိုင်ပြည်က လွတ်မြောက်နယ်မြေတွေမှာ ချဲဒိုင် (၂ လုံး၊ ၃ လုံးထီ) တွေကို အရေးယူပေးရန် ပြည်သူတွေ အနေနဲ့ လိုလားနေတယ်လို့ သိရပါတယ်။
“ပိုက်ဆံရှိတဲ့သူတွေက စလောင်းကနေကြည့်ပြီ ၂ လုံး၊ ၃ လုံးတွေ ရောင်းကြတယ်။ အလုပ်အကိုင်ရှားပါးတော့ လူတွေက မျှော်လင့်ချက်တွေနဲ့ ထိုးကြတယ်။ ထိုးရင်းနဲ့ ပိုမွဲလာတော့ ခိုးတာ ဝှက်တာတွေ ဖြစ်လာတယ်။ ဒါကြောင့် အာရက္ခတပ်တော်ရဲ့ လူကြီးတွေအနေနဲ့ အရေးယူတာတွေ လုပ်ပေးစေချင်ပါတယ်” လို့ ရက္ခိုင်လွတ်မြောက်နယ်မြေက ဒေသခံပြည်သူ ၁ ဦးက အာရက္ခတိုင်းမ်စ်ကို ပြောပါတယ်။
အာရက္ခတပ်တော်အနေနဲ့ ရက္ခိုင်ပြည်က လွတ်မြောက်နယ်မြေတွေမှာ လောင်းကစားပြုလုပ်ခွင့် တားမြစ်ထားပေမယ့် ချဲထီကိုတော့ ရောင်းချတာတွေ ရှိနေတာပဲ ဖြစ်ပါတယ်။
“အခုဆို တပ်တော်က ဘယ်လောင်းကစားလုပ်တာကိုမှ ခွင့်မပြုဘူး။ တရားဝင်ပြောထားတော့ မလုပ်ရဲကြဘူး။ ချဲထီကျတော့ အောက်ခြေပေါင်းပြီး ရောင်းတယ်။ ဒါကို စီစစ်ပြီး အရေးယူစေချင်ပါတယ်” လို့လည်း သူက ထပ်မံ ဆိုပါတယ်။
ရက္ခိုင်ပြည်က လွတ်မြောက်နယ်မြေအချို့မှာ ၂ လုံးထီကို ၁ ပတ် ၅ ရက်၊ ၁ ရက် ၂ ကြိမ် ရောင်းချနေပြီး ၃ လုံးထီကိုတော့ ၁ လ ၂ ကြိမ် ရောင်းချနေတယ်လို့ သိရပါတယ်။
226 comments