အာရက္ခတိုင်းမ်စ် (၁၀ အောက်တိုဘာ ၂၀၂၅)
ရက္ခိုင်ပြည် သံတွဲမြို့နယ်ကို စစ်ကော်မရှင်က လေကြောင်း၊ ရေကြောင်းကနေ တိုက်ခိုက်မှုတွေ ပြုလုပ်နေတယ်လို့ သိရပါတယ်။
“ဒီနေ့မနက်က Y12 နဲ့လာပြီး ဗုံး ၃ လုံးကြဲသွားတယ်။ ချောင်းဖျားဖက်ကျတယ်။ နေရာအတိအကျနဲ့ အသေအပျောက်တော့ မသိရသေးဘူး” လို့ သံတွဲမြို့ဒေသခံတဦးက အာရက္ခတိုင်းမ်စ်ကို ပြောပါတယ်။
အလားတူ ငပလီကမ်းခြေဖက်ကို စစ်ကော်မရှင်ရဲ့ နေဗီကနေ လက်နက်ကြီးနဲ့ ပစ်ခတ်မှုတွေ ပြုလုပ်နေတယ်လို့ သိရပါတယ်။
“ဒီမနက်ကဆို လှမ်းမြင်ရတာ ၇ စီးလောက်ရှိတယ်။ ဘယ်ကို ပစ်တယ်တော့ မသိဘူး။ ၁၀ ခါလောက် ပစ်သံကြားရတယ်။ အဝေးကြီးက လှမ်းပစ်တာဆိုတော့ ကုန်းပေါ်တော့ မကျဘူး။ ကြည့်ရသလောက် မောင်ရွှေလေး နဲ့ ဆင်ခေါင်းဖက်ကို ပစ်တာလို့ ထင်တယ်” လို့ ငပလီမြို့ဒေသခံတဦးက အာရက္ခတိုင်းမ်စ်ကို ပြောပါတယ်။
စစ်ကော်မရှင်ရဲ့ နေဗီ ၇ စီးခန့်ကို မြင်တွေ့နေရတာကြောင့် သံတွဲမြို့နယ်ဒေသခံတွေဟာ ပင်လယ်ထဲကို ငါးဖမ်းရန် မထွက်ရဲလို့ စားဝတ်နေရေး ခက်ခဲနေကြပါတယ်။
အောက်တိုဘာလ ၉ ရက်ကလည်း Y12 လေယာဉ်ဟာ သံတွဲမြို့ပေါ် ကင်းလှည့်နေတာကြောင့် ဒေသခံတွေဟာ ဘေးလွတ်ရာကို ရှောင်တိမ်းနေကြတယ်လို့လည်း သိရပါတယ်။
ဓာတ်ပုံ – ပုံဟောင်း
1,182 comments