အာရက္ခတိုင်းမ်စ် (၆ နိုဝင်ဘာ ၂၀၂၅)
ရက္ခိုင် – ဘင်္ဂလားဒေ့ရှ်နယ်စပ်တွင် ရှိတဲ့ အာရက္ခတပ်တော်ရဲ့ လုံခြုံရေးစခန်းကို ဘင်္ဂလားနယ်ခြားစောင့်တပ် (BGB) က နိုဝင်ဘာလ ၅ ရက်တွင် လက်နက်ငယ်နဲ့ ပစ်ခတ်ခဲ့တယ်လို့ သိရပါတယ်။
“ဘင်္ဂလားနယ်ခြားစောင့်တပ်ရဲ့ BP-22 ကင်းစခန်းက တပ်ဖွဲ့ဝင်တွေက တပ်တော်ရဲ့ လုံခြုံရေးစခန်းကို သေနတ်နဲ့ ၄ ချက်လောက် ပစ်ခတ်ခဲ့တယ်” လို့ မောင်တောမြို့ဒေသခံတဦးက အာရက္ခတိုင်းမ်စ်ကို ပြောပါတယ်။
ဘင်္ဂလားဒေ့ရှ်နယ်ခြားစောင့်တပ် BP-22 ကနေ အာရက္ခတပ်တော်ရဲ့ လုံခြုံရေးစခန်းကို နိုဝင်ဘာလ ၅ ရက် ညနေ ၅ နာရီခန့်က AK ကျည် ၄ တောင့် ပစ်ခတ်ခဲ့တယ်လို့ သိရပါတယ်။
ဘင်္ဂလားဒေ့ချ်နယ်ခြားစောင့်တပ် (BGB) ဟာ ARSA၊ RSO စတဲ့ အကြမ်းဖက်အဖွဲ့များကို လက်ခံထားပြီး လက်နက်ခဲယမ်းများ ထောက်ပံ့ကာ နယ်စပ်ရှိ အာရက္ခတပ်တော် လုံခြုံရေးတပ်စခန်းများကို တိုက်ခိုင်းနေတယ်လို့ ရက္ခိုင်အမျိုးသားအဖွဲချုပ် (ULA) က ထုတ်ပြန်ထားပါတယ်။
အဆိုပါ ARSA နဲ့ RSO စတဲ့ အကြမ်းဖက်အဖွဲ့များဟာ ဘင်္ဂလားဒေ့ရှ်နိုင်ငံဘက်ကနေ ရက္ခိုင်ပြည်ကို ဝင်ရောက်ကာ မောင်တောမြို့နယ် မြောက်ပိုင်း နယ်စပ်မိုင်တိုင်အမှတ် ၅၁ ကနေ ၅၇ ကြားတွင် အကြမ်းဖက်မှု ကျူးလွန်နေပြီး AA လုံခြုံရေးတပ်စခန်းများကိုလည်း ဝင်ရောက် တိုက်ခိုက်ခဲ့တယ်လို့ သိရပါတယ်။
204 comments