အာရက္ခတိုင်းမ်စ် (၃ ဖေဖော်ဝါရီ ၂၀၂၆)
ရက္ခိုင်ပြည် မောင်တောမြိ့်နယ်တွင် ဟိန္ဒူလူမျိုးများ ၇၅ ကြိမ်မြောက် မဟာရာမယန ဟရီနာမ “ ရာမ” အသံမစဲ ပဋ္ဌာန်း ဘာသာရေးပွဲတော်ကို ဇန်နဝါရီလ ၃၁ ရက်ကနေ ဖေဖော်ဝါရီလ ၃ ရက်အထိ ကျင်းပခဲ့တယ်လို့ သိရပါတယ်။
အဆိုပါ ပွဲတော်ကို မောင်တောမြို့နယ်၊ ကျောက်ပန္ဒူကျေးရွာရှိ ရာမ၊ လက္ခဏ တောင်ခြေရင်းတွင် ဟိန္ဒူဘာသာဝင်များ တက်ရောက် ကျင်းပခဲ့ကြတာလည်း ဖြစ်ပါတယ်။
“ ရာမကို ပင့်ဖိတ်ပူဇော်ခြင်း၊ လက္ခဏကို ဆုတောင်ပူဇော်ခြင်းနဲ့ မယ်သီတာထံ ဆုတောင်း ပူဇော်ခြင်းတွေ ပြုလုပ်ခဲ့ကြတယ်လို့လည်း သိရပါတယ်။
ပွဲတော်ရက်များအတွင်း မဟာရာမယန ဟရီနာမ “ရာမ” အသံမစဲပဋ္ဌာန်းရွတ်ဖတ်ပူဇော်ခြင်းကို ပွဲတော်စတင်ခဲ့သည့်နေ့ကစပြီး ဖေဖော်ဝါရီလ ၃ ရက်အထိ ရွတ်ဖတ်ခဲ့တယ်လို့ သိရပါတယ်။
“ ရာမ” အသံမစဲပဋ္ဌာန်း ဘာသာရေးပွဲတော်ကို မောင်တောခရိုင် ဟိန္ဒူလူမျိုးစုရေးရာ ကြီးကြပ်ရေးကော်မတီက ဦးဆောင်ကျင်းပခြင်းဖြစ်ပြီး အာရက္ခတပ်တော် က တာဝန်ရှိသူများ တက်ရောက် ဂုဏ်ပြုပေးခဲ့ကြပြီး ပွဲတော်ဖြစ်မြောက်ရေးအတွက်လည်း အာရက္ခတပ်တော်က မောင်တောခရိုင်ဟိန္ဒူလူမျိုးစုရေးရာကော်မတီကို အလှူငွေ ငွေကျပ် သိန်း ၃၅၀ ပေးခဲ့တယ်လို့လည်း သိရသည်။
