AA ရဲ့ ဒရုန်းကြောင့် စစ်တွေက စကမ တပ်သား ၂၀ ခန့် သေဆုံး

by Rakhita Timesမတ် 3, 2026မတ် 3, 202627 163

အာရက္ခတိုင်းမ်စ် (၃ မတ် ၂၀၂၆)

အာရက္ခတပ်တော်က ဒရုန်းနဲ့ ပတ်ခတ်တိုက်ခိုက်မှုကြောင့် စစ်တွေမြို့ ရွှေမင်းဂံရေတပ်စခန်းက စစ်ကော်မရှင် တပ်သား ၂၀ ခန့် သေဆုံးသွားတယ်လို့ သိရပါတယ်။

“ AA က လက်နက်ကြီးတွေနဲ့ ပစ်တယ်။ မင်းဂံ ရေတပ်စခန်း ရှိတဲ့နေရာတွေအထိ Speed Boat နဲ့လာပစ်တယ်။ ဒရုန်းတွေနဲ့လည်း ပစ်တယ်။ စစ်သား ၂၀ ကျော်လောက် သေတယ်လို့ သိရတယ်” လို့ စစ်တွေဒေသခံတဦးက အာရက္ခတိုင်းမ်စ်ကို ပြောပါတယ်။

ဖေဖော်ဝါရီလ ၂၃ ရက်က စတင်ကာ တိုက်ပွဲပြင်းထန်နေပြီး မနေ့ညအထိ စစ်တွေမြို့ပေါ်ကနေ လက်နက်ကြီးပစ်ခတ်သံတွေ ကြားနေရတယ်လို့ ဒေသခံတွေက ဆိုပါတယ်။

စစ်ရေးအရ ရှုံးနိမ့်နေတဲ့ စစ်ကော်မရှင်ဟာ စစ်တွေမြို့ ရွှေမင်းဂံရွာ တဖက်ကမ်းက ပုဏ္ဏားကျွန်းမြို့နယ် ခမောင်းတောရွာဘက်ကို ဂျက်ဖိုက်တာနဲ့ နှစ်ကြိမ်တိုင်တိုင် ဗုံးကြဲသွားတယ်လို့လည်း သိရပါတယ်။

အလားတူ စစ်တွေမြို့ထဲရှိ အမှတ် ၁၂ ရဲတပ်ထဲတွင် စစ်ကော်မရှင်က လက်နက်ကြီးနဲ့ တပ်စွဲအထိုင်ချထားပြီး ရသေ့တောင်၊ ပုဏ္ဏားကျွန်းနဲ့ ပေါက်တောမြို့နယ်ဘက်ကို နေ့စဉ်ရက်ဆက်ဆိုသလို ပစ်ခတ်နေတယ်လို့လည်း သိရပါတယ်။

ရက္ခိုင်ပြည် စစ်တွေမြို့တွင် အာရက္ခတပ်တော်ရဲ့ ထိုးစစ်ကို ခုခံရန် စစ်ကော်မရှင်က စစ်သင်္ဘော ၁၀ စီးကျော် ထားရှိထားပြီး ဒေသကွပ်ကဲမှုစစ်ဌာနချုပ် (ဒကစ)၊ ခလရ (၂၀) ၊ ခလရ (၂၇၀)၊ ခလရ (၂၃၂) ခမရ (၃၄၄)၊ ခမရ (၃၅၄)၊ အမှတ်(၁၂) နှင့် အမှတ်(၃၆) ရဲတပ်ရင်း စတာတွေနဲ့ ခုခံနေတာလည်း ဖြစ်ပါတယ်။