နှစ်သစ်ကူးကာလတွင် ရက္ခိုင်ပြည်သူများလိုက်နာရန် အချက် ၆ ချက် ULA ထုတ်ပြန်

by Rakhita Timesဧပြီ 9, 2026ဧပြီ 9, 202638 235

အာရက္ခတိုင်းမ်စ် (၉ ဧပြီ ၂၀၂၆)

နှစ်သစ်ကူးကာလ (သင်္ကြန်ပွဲတော်) တွင် ရက္ခိုင်ပြည်သူများ လိုက်နာရန်အတွက် အာရက္ခပြည်သူ့တော်လှန်ရေးအစိုးရက အချက် ၆ ချက် ထုတ်ပြန်လိုက်တယ်လို့ သိရပါတယ်။

အဆိုပါ စည်းကမ်းချက် (၆) ချက်မှာ လူအရေအတွက် အများအပြား စီးနင်းလိုက်ပါပြီး ကားများနဲ့ မြို့ပေါ်များတွင် လှည့်ပတ်ခြင်း၊ ရေကစားခြင်း မပြုလုပ်ရ၊ တမြို့နဲ့တမြို့၊ တရွာနဲ့တရွာ ကားများနဲ့ ကခုန် လှည့်ပတ်သွားလာပြီး ရေကစားခြင်းများ မပြုလုပ်ရ၊ လူစုလူဝေးဖြစ်စေတဲ့ သင်္ကြန်မဏ္ဍပ်များ ပြုလုပ်ပြီး ရေကစားခြင်း မပြုလုပ်ရ၊ လူစုလူဝေး ဖြစ်စေတဲ့ (Show) ပွဲများ ကျင်းပခြင်း မပြုလုပ်ရ၊ ဘုန်းကြီးကျောင်းများတွင် ဥပုဒ်သီလ ဆောက်တည်ခြင်း၊ အလှူအတန်းများ ပြုလုပ်ခြင်းများကို လူစုလူဝေးများနဲ့ မပြုလုပ်ရ၊ ပြည်သူများရဲ့ လုံခြုံရေးကို လေးစား လိုက်နာသောအားဖြင့် မြို့၊ ရွာများအတွင်း ဆောင်းဘောက်များ ဆူညံစွာဖွင့်ခြင်း၊ လူမှုပတ်ဝန်းကျင်ကို အသံ၊ အပြုအမူများနဲ့ အနှောင့်အယှက် ဖြစ်စေတဲ့ လုပ်ရပ်များ မပြုလုပ်ရ စတဲ့ စည်းကမ်းချက် (၆) ချက် တို့ပဲ ဖြစ်ပါတယ်။

အဆိုပါ စည်းကမ်းသတ်မှတ်ချက်တွေကို ပြည်သူ့ဝန်ဆောင်မှုလုပ်ငန်း ဦးဆောင်လုပ်ကိုင်နေကြတဲ့ ဌာနဆိုင်ရာ တာဝန်ရှိသူများကိုယ်တိုင် တသွေမတိမ်း လိုက်နာကြရမယ်လို့လည်း အာရက္ခပြည်သူ့တော်လှန်ရေးအစိုးရက ထုတ်ပြန်ပါတယ်။

အလားတူ ပြည်သူ့ဝန်ဆောင်မှုလုပ်ငန်းနဲ့ သက်ဆိုင်ရာ အဖွဲ့အစည်းများအနေနဲ့ ပြည်သူများကို အကျိုးသင့် အကြောင်းသင့် ပြန်လည်ရှင်းပြခြင်း၊ မေတ္တာရပ်ခံခြင်း၊ အခြေအနေ အဘက်ဘက်ကို ထောက်ရှုကာ သည်းခံ စိတ်ရှည်မှုနဲ့အတူ စည်းကမ်းချက်တွေကို တိကျစွာ လိုက်နာဆောင်ရွက်ကြရန် လိုအပ်ပြီး အချက်အလက်နဲ့တကွ နားလည် သဘောပေါက်အောင် ရှင်းရှင်းလင်းလင်း ပြောကြားပေးရမယ်လို့လည်း ထုတ်ပြန်ထားပါတယ်။