ထိခိုက်သေဆုံးသူ အမျိုးသမီးတွေအတွက် တရားမျှတမှု ရဖို့လိုသလို စိတ်ပိုင်းဆိုင်ရာ ကုစားမှုတွေလည်း လိုအပ်နေ

အာရက္ခတိုင်းမ်စ် (၂၃ ဧပြီ ၂၀၂၆)

ရက္ခိုင်ပြည်အပါအဝင် နိုင်ငံတဝှမ်းရှိ ထိခိုက်သေဆုံးသူ အမျိုးသမီးတွေအတွက် တရားမျှတမှု ရဖို့လိုသလို စိတ်ပိုင်းဆိုင်ရာ ကုစားမှုတွေလည်း လိုအပ်တယ်လို့ မြန်မာ့အမျိုးသမီးသမဂ္ဂ (BWU) ရဲ့ တွဲဖက်အထွေထွေအတွင်းရေးမှူး ၂ ဖြစ်သူ မယဉ်မျိုးလှိုင်က အာရက္ခတိုင်းမ်စ်ကို ပြောပါတယ်။

“ အမျိုးသမီးတွေ ထိခိုက် သေဆုံးရတဲ့ ဖြစ်စဉ်နဲ့ ပတ်သက်ရင်တော့ ဒီလို အကြမ်းဖက်မှုတွေအတွက်ကို တရားမျှတမှုတွေ ရရှိဖို့၊ ဒီလို အကြမ်းဖက်မှု ကျုးလွန်တဲ့ အကြမ်းဖက် စစ်အုပ်စုကိုလည်း ထိရောက်တဲ့ အပြစ်ပေး အရေးယူဖို့ကိုလည်း ကျမတို့အနေနဲ့ ပြောချင်ပါတယ်။ ပြီးလို့ရှိရင် သေဆုံးရတဲ့ ဖြစ်စဉ်တွေဟာဆိုရင် ဒါက အကြမ်းဖက် စစ်ကောင်စီအနေနဲ့ အပြစ်မဲ့ ပြည်သူတွေအပေါ်ကို ဦးတည်ပြီးတော့မှ အခွင့်အရေး ချိုးဖောက်မှုတွေကို ကျူးလွန်နေတဲ့ဟာကိုလည်း ကျမတို့အ‌နေနဲ့ ကန့်ကွက် ရှုံ့ချတယ်ပေါ့နော်။ ဒါတွေကို ဆက်ကျူးလွန်နေတာတွေက လူ့အခွင့်အရေး ရှူထောင့်ကကြည့်ကြည့် အမျိုးသမီး ရှုထောင့်ကကြည့်ကြည့် အကြမ်းဖက်မှုတွေ ကျူးလွန်နေတယ်ဆိုတာ ပေါ်လွင်နေတာ ဖြစ်တဲ့အကြောင့်မို့ ဒီလိုမျိုး ကိစ္စရပ်တွေကို ရပ်တန့်ဖိုနဲ့ ဒီလို ကျုးလွန်ခံရသူတွေအတွက် စစ်မှန်တဲ့ တရားမျှတမှု ရရှိဖို့ လုပ်ဆောင်ပေးဖို့ လိုအပ်တယ်ဆိုတာကို ပြောချင်ပါတယ်။ လုံခြုံတဲ့ ပတ်ဝန်းကျင်မှာ အမျိုးသမီးတွေ အန္တရာယ်ကင်းစွာ နေနိုင်ဖို့ဆိုရင် ကျမတို့ အခုလက်ရှိ ဖြစ်နေတဲ့ စစ်ပဋိပက္ခတွေ ရပ်တန့်ဖို လိုအပ်တယ်။ ပြီးလို့ရှိရင် တပြိုင်နက်တည်းမှာပဲ အကြမ်းဖက်ခံရတဲ့ အမျိုးသမီးတွေအတွက် စိတ်ပိုင်းဆိုင်ရာ ပြန်လည်ကုစားပေးမှုတွေလည်း လုပ်ပေးဖို့ လိုတယ်လို့ ကျမတို့အနေနဲ့ မြင်မိပါတယ်” လို့ တွဲဖက်အထွေထွေအတွင်းရေးမှူး ၂ မယဉ်မျိုးလှိုင်က ဆိုပါတယ်။

ပြီးခဲ့တဲ့ မတ်လအတွင်း ရက္ခိုင်ပြည်မှ အမျိုးသမီး တစ်ဦး အပါအဝင် တိုင်းနဲ့ပြည်နယ် ၉ ခုမှ အမျိုးသမီး ၈၈ ဦး သေဆုံးခဲ့ပြီး ၅၄ ဦး ထိခိုက်ဒဏ်ရာ ရရှိခဲ့ပါတယ်။

ထို့ပြင် ဖေဖော်ဝါရီလအတွင်း ရက္ခိုင်ပြည်မှ အမျိုးသမီး ၂၂ ဦး အပါအဝင် တိုင်းနဲ့ပြည်နယ် ၁၀ ခုမှ အမျိုးသမီး ၆၃ ဦး သေဆုံးခဲ့ပြီး ၆၆ ဦး ထိခိုက်ဒဏ်ရာ ရရှိခဲ့သလို ဇန်နဝါရီလအတွင်းမှာလည်း ရက္ခိုင်ပြည်မှ အမျိုးသမီး ၁၀ ဦး အပါအဝင် တိုင်းနဲ့ပြည်နယ် ၁၀ ခုက အမျိုးသမီး ၅၅ ဦး သေဆုံးခဲ့ပြီး ၅၄ ဦး ထိခိုက်ဒဏ်ရာ ရရှိခဲ့တယ်လို့ မြန်မာ့အမျိုးသမီးသမဂ္ဂ (BWU) က ထုတ်ပြန်ထားပါတယ်။