ပုဏ္ဏားကျွန်း စစ်ရှောင်စခန်းအချို့ လေပြင်းတိုက်လို့ ပျက်စီး

အာရက္ခတိုင်းမ်စ် (၃၀ ဧပြီ ၂၀၂၆)

ရက္ခိုင်ပြည် ပုဏ္ဏားကျွန်းမြို့နယ်ရှိ စစ်ရှောင်စခန်းတချို့ဟာ ဧပြီလ ၂၉ ရက်က မိုးသည်းထန်စွာရွာသွန်းပြီး လေပြင်းတိုက်ခတ်ခဲ့လို့ ပျက်စီးသွားတယ်လို့ ပုဏ္ဏားကျွန်းလူငယ်များအစည်းအရုံးထံမှ သိရပါတယ်။

ဧပြီလ ၂၉ ရက် ညနေ ၅ နာရီကျော်တွင် ရွာသွန်းခဲ့တဲ့ မိုးနဲ့အတူ လေပြင်းတိုက်ခတ်မှုကြောင့် စစ်ဘေးရှောင်နေအိမ် အနည်းဆုံး ၁၀ လုံးခန့် ပျက်စီးခဲ့ပါတယ်။

“ မိုးတောင်မရောက်သေးဘူး အခက်အခဲတွေက စလာပြီ။ ရေတအားရှားတော့ မိုးရွာလို့ ပျော်ရမလားမှတ်တယ်။ လေပြင်းပါ ပါလာလို့ အမိုးတွေလန်၊ အကာတွေလွင့်နဲ့ မိုးတွင်းကျလာမှာကို တွေးတောင်မတွေးရဲဘူး” လို့ ပုဏ္ဏားမြို့နယ်ဒေသခံတဦးက အာရက္ခတိုင်းမ်စ်ကို ပြောပါတယ်။

လက်ရှိမှာတော့ ရက္ခိုင်ပြည်က စစ်ရှောင်ပြည်သူအချို့ဟာ ဘေးလွတ်ရာနေရာတွေမှာ ယာယီတဲအိမ်များ ဆောက်လုပ်ကာ နေထိုင်နေကြပါတယ်။

“ အရေးပေါ်လိုအပ်နေတာကတော့ သူတို့တွေ လုံလုံခြုံခြုံနဲ့ နေနိုင်ရေးပေါ့။ အဆောက်အဦးတွေကို ခိုင်ခိုင်မာမာလည်း မဆောက်ပေးရဲဘူး။ စစ်တပ်က အမြဲတမ်းလိုလို လေကြောင်းကနေ တိုက်ခိုက်နေတာဆိုတော့လေ” လို့ ပုဏ္ဏားကျွန်းမြို့နယ်က စစ်ဘေးရှောင်အရေးကူညီလုပ်ကိုင်ပေးနေသူတဦးက အာရက္ခတိုင်းမ်စ်ကို ပြောပါတယ်။

လက်ရှိမှာတော့ ပျက်စီးသွားတဲ့ စစ်ရှောင်နေအိမ်တွေကို ပုဏ္ဏားကျွန်းလူငယ်များအစည်းအရုံးက ကူညီပြီး ပြန်လည် ပြုပြင်ပေးနေတယ်လို့လည်း သိရပါတယ်။