အာရက္ခတိုင်းမ်စ် (၇ မေ ၂၀၂၆)
ရက္ခိုင်ပြည်က ကျန်ရှိတဲ့ လက်ကျန် ၃ မြို့ကို လာမယ့် ၂၀၂၆ ခုနှစ်နဲ့ ၂၀၂၇ ခုနှစ် မကုန်ဆုံးမီ လက်စသတ်ဖို့ လုပ်နေတဲ့ အာရက္ခတပ်တော်အပေါ် တရုတ်သဘောထား ဘယ်လိုရှိနိုင်လဲဆိုတာ သုံးသပ်မှုတွေ ရှိနေကြပါတယ်။
လက်ကျန် ၃ မြို့ကို လာမယ့် ၂၀၂၆ ခုနှစ်နဲ့ ၂၀၂၇ ခုနှစ် မကုန်ဆုံးမီ လက်စသတ် အောင်ပွဲခံနိုင်ရန် ယုံကြည်ချက်အပြည့်ဖြင့် လုပ်နေကြောင်း အာရက္ခတပ်တော် (AA) တပ်မှူးချုပ် ဗိုလ်ချုပ်ထွန်းမြတ်နိုင် က ဧပြီလ ၁၀ ရက်က ကျရောက်ခဲ့တဲ့ အာရက္ခတပ်တော် တည်ထောင်ခြင်း (၁၇) နှစ်မြောက် အထိမ်းအမှတ်နေ့သို့ ပေးပို့တဲ့ သဝဏ်လွှာမှာ ဖော်ပြထားတာပါ။
တရုတ်ဟာ စီးပွားရေးနဲ့ ဖွံ့ဖြိုးတိုးတက်ရေးအတွက် သူတို့နဲ့ ပူးပေါင်းလုပ်မယ်ဆိုရင် အဲဒီအဖွဲ့တွေကို အပစ်အခတ်ရပ်စဲရေး သဘောတူတတ်ကြောင်း၊ ဒါပေမယ့် AA နဲ့ပတ်သက်ပြီးတော့ တရုတ်သဘောထားကို စောင့်ကြည့်ရမှာဖြစ်ကြောင်း တရုတ်-မြန်မာအရေးလေ့လာသုံးသပ်သူ ဒေါက်တာလှကျော်ဇောက အာရက္ခတိုင်းမ်စ်ကို ပြောပါတယ်။
“အခု မြောက်ပိုင်းဒေသတွေမှာ တရုတ်ရဲ့ လမ်းစဉ်တွေကို ကြည့်တဲ့အခါမှာလေ အပစ်အခတ် ရပ်စဲရေးပြီးတော့ စီးပွားရေး၊ ဖွံ့ဖြိုးတိုးတက်ရေးအတွက် သူတို့နဲ့ ပူးပေါင်းလုပ်မယ်ဆိုရင် သူတို့က အပစ်အခတ် ရပ်စဲရေးကို သဘောတူတတ်တာပဲလေ။ AA က မြောက်ပိုင်းအဖွဲ့နဲ့ မတူတာက သူတို့က တရုတ်နဲ့ တိုက်ရိုက် အဆက်အသွယ်တော့ မနေဘူး။ ကပ်မနေဘူး။ ဒါပေမယ့် တရုတ်ရဲ့ ရင်းနှီးမြှုပ်နှံမှုဖြစ်တဲ့ ကျောက်ဖြူရေနက်ဆိပ်ကမ်းကတော့ သူနဲ့ ပတ်သက်နေတာပဲ။ အဲဒီတော့ ဒါတွေကို ဘယ်လို အပေးအယူ လုပ်မလဲတော့ မသိဘူး။ ဒီ မြောက်ပိုင်းကအဖွဲ့တွေနဲ့ တွေ့တဲ့အခါမှာလည်း AA အဖွဲ့လည်း ပါတယ်လို့တော့ ပြောတယ်။ အဲဒီတော့ အပစ်အခတ် ရပ်စဲရေးနဲ့ ဖွံ့ဖြိုးတိုးတက်ရေးနဲ့ တဆက် တဆက်တည်း ဖြစ်နေမလားတော့ မသိဘူး။ ကျမတို့ နည်းနည်း စောင့်ကြည့်ဖို့တော့ လိုပါသေးတယ်” လို့ သူက ပြောပါတယ်။
၂၀၂၃ ခုနှစ် နိုဝင်ဘာလက စတင်ခဲ့တဲ့ ရက္ခိုင်ပြည် မြို့သိမ်းတိုက်ပွဲအတွင်း လက်ရှိ ၂၀၂၆ ခုနှစ်၊ မေလ အထိ အာရက္ခတပ်တော်ဟာ ရက္ခိုင်ပြည်ထဲက ၁၄ မြို့နယ်နဲ့ ချင်းပြည်နယ် ပလက်ဝမြို့နယ်တို့ကို အပြီးသတ် သိမ်းပိုက် ထိန်းချုပ်ထားပြီး ပြည်မဒေသတွေအထိ စစ်ရေးဖော်ကာ အုပ်ချုပ်ရေးယန္တယားတွေ လည်ပတ်တာပါ။
ဒါ့အပြင် လက်ကျန်မြို့တွေအနက် စစ်တွေ၊ ကျောက်ဖြူမြို့နယ်တို့မှာ တိုက်ပွဲတွေ ဆက်လက် ဆင်နွှဲနေတာပါ။
လက်ရှိမှာ တခြားလှန်ရေးအင်အားစုတွေနဲ့အတူ မကွေး၊ ပဲခူး၊ ဧရာဝတီတိုင်း၊ ချင်းပြည်နယ်၊ ကချင်ပြည်နယ်၊ ရှမ်းပြည်နယ်မြောက်ပိုင်းဒေသတို့မှာလည်း မဟာမိတ်အဖြစ် ဆက်လက် တိုက်ပွဲဝင်နေပါတယ်။
စစ်တပ်က အရပ်သားတွေကို ဗုံးကြဲနေသမျှ ကာလပတ်လုံး ကျနော်တို့အတွက် နိုင်ငံရေးဖြစ်စဉ်တွေကို ဆွေးနွေးဖို့က အလွန် ခက်ခဲနေဦးမှာဖြစ်ကြောင်း၊ စစ်ကောင်စီက အသာစီးရတဲ့ အနေအထားကနေ ဆွေးနွေးချင်နေကြောင်း၊ ဒါပေမဲ့ ကျနော်တို့ကတော့ အဲဒီလို ဖိအားမျိုးကို အလျော့ပေးမှာ မဟုတ်ပါကြောင်း မေလ ၄ ရက်နေ့က The Diplomat သတင်းဌာနဲ့ အင်တာဗျူးမှာ အာရက္ခတပ်တော် (AA) တပ်မှူးချုပ် ဗိုလ်ချုပ်ထွန်းမြတ်နိုင်က ပြောဆိုထားပါတယ်။
